اليوم باكتب لكم قصة ولادتي بأحلى قمر (حصة) شيخة البنات

بسم الله الرحمن الرحيم
السلام عليكم بنات، بغيت احط لكم قصة ولادتي بحبيبة القلب حصة، بس قبل ما تقرونها ادعولي أن الله يعيني على تربيتها وتنشئتها النشأة الصالحة وان الله يهديها ويجعلها من عباده الصالحين

طبعا الي يعرفني يعرف اني ولدت بعملية قيصرية اختيارية بسبب خوفي من الولادة الطبيعية وتبعاتها من تشقق الى آخره، وعطتني د. هدى في العسكري الي كنت اتابع معاها موعد بتاريخ 14-6 الصبح الساعة 9، وقالت لي ترقيد قبله بيوم يعني 13-6، وصلت المستشفى العصر وقامو مثل ما مريتو كلكم بهالمرحلة يحطون هاذي الجهاز الي يشوف نبض البيبي وفي نفس الوقت اذا فيه طلق او لا، وشاء رب العالمين ان اذوق بداية الطلق الي ما كنت ابي اذوقه وبدا معاي المغرب ليلة العملية وشافوه في الجهاز، وقالو لي عندج بداية طلق ، اذا زاد عليج بنسوي لج عملية في الليل بيكون الي على الكول اهمه الي بيسوون لج، قلت الله يستر، وما وعيت الساعة 10 في الليل الا الطلق بعد ياني مره ثانيه وزادت حدته شوي، وقالو لي ترا اذا زاد عليج وتوسعتي ودخلتي مرحلة الولادة الثانية ما راح ينفع نسوي لج قيصرية، قلت توكلو على الله، ومني مناك قالو لي ريحي لين اتييج الدكتوره الي على الكول وتقرر شنو بتسوي لج، فقلت حق امي تنام وانا قعدت مسجات مع ام قصوده هههههههه لين الساعه 3 الفجر على ما اتذكر ، المهم حسيت وانتو بكرامه ان بروح الحمام حق خروج، ما قمت عن الحمام الا الدم في المرحاض عزكم الله وعز السامع ومت من الخوف، قلت ياك الموت يا تارك الصلاة ، شكلها البنت معزمة تطلع من المكان الي مابيها تطلع منه ههههههههههه، المهم يات الدكتوره شيكتني الا انا متوسعه 2 سنتيمتر وخيرتني مابين ان انطر لين موعد عمليتي الصبح مع الاستشارية وفي هالشي مجازفة اني اتوسع زود وبعدين مافي مجال للقيصرية وبين انها اهي الي تسوي لي العملية فتوكلت على الله واخترت الاختيار الثاني، وجهزوني للعملية وانا ارتجف من الخوف، وكنت من قبل موصية امي الله يحفظها، لأني داشه عملية، مادري اطلع منها حية لو ميتة، كل شي بيد الله، وصيتها ان اذا مت ما تسميها حصة لا تسمي بنتي على اسمي وان اهي الي تربيها مثل ما ربتني التربية الصالحة، المهم اكدت على امي الوصية، وحبيتها على يدها وطلبت منها انها تدعي لي، ودخلوني غرفة العمليات، قبل لا ادخل الغرفة حطوني في غرفة استراحة، ياتي فيها ممرضة بحرينية الله يجازيها عني خير الجزاء ويجعله في ميزان حسناتها، عطيتها الكيمره وقلت لها تصور بنتي في جميع لحظاتها وبوصخها ، ووافقت، وساسرتني على صوب من غير محد يسمع، وقالت لي شوفي انتي داخله عمليه مو سهله وهالحزة الفجر كل الموجودين على الكول (انترن) يعني دكاتره تحت التدريب، وطبيب التخدير الي بيطقج ابرة الظهر ما قط شفته من قبل، فنصيحة مني اذا طقج من اول مره وما تخدرتي يعني فشل طلبي دكتور تخدير ثاني ترا من حقج، هاذي مو لعبة هالابرة اذا انطقت غلط ممكن تسبب شلل، قلت لها ان شاء الله، ودزوني وقعدوني على السرير، ياني الدكتور الهندي مال التخدير وقعدني على السرير بطريقة معينه، وبدا يعطيني ابرة الظهر وجيكني شافني ما تخدرت ، يعني طقني غلط مثل ما توقعت الممرضه، قامت الممرضة تطالعني تبيني اطلب دكتور تخدير ثاني، انا فكرت في هاللحظة، انا بروحي متوسعه 2 سنتيمتر، وهمه بروحهم تأخرو ما بغو يودوني حق العمليه بعد انطر اييني دكتور تخدير ثاني الله العالم متى بيي، المهم سكتت وقال لي الدكتور راح احاول مره ثانيه، قامت الممرضه وقالت دكتور مو هاذي الوضعيه الصح لازم المريضه تحني ظهرها هلون وهلون ومني لازم اتطقها، قلت في قلبي حشا هاذي بياع خضرة مو دكتور الي الممرضه اتعلمه، المهم سوا الي الممرضه قالت له وفعلا على طول حسيت اني ريولي مب شايليني تخدر نصي التحتي من البطن ورايح، وشالوني وسدحوني على السرير وعلى طول حطو الستاره الخضرا وبدو يشقوني، ياني دكتور التخدير وقال لي بنحط لج قرآن على اذنج، ما يبيني اسمع ملاحظاتهم، قلت له معلي حط، وحط الهدفون على اذني، وما وعيت الا الاذان مال الحرم المكي يصرخ مره وحده، شتخيلون وضعي، قلبي طاح عند ريولي ، قلت اشهد ان لا اله الا الله وان محمدا رسول الله واشهد ان الموت حق وان الحياة بيد الله، خلص الاذان بدت سورة الحمد وبعدها البقرة، المهم سمعت صوت شي في الباك غراوند قعدت افكر صوت شنو ذي، بعدين يوم حطيت بالي عدل الا اهو صوت بنتي حشاشة قلبي تصيح اول ما طلعوها من بطني، قلت حق دكتور التخدير الي قاعد عند راسي شيل السماعه ابي اسمع صوت بنتي رفض في البدايه بس يوم اصريت عليه شالها وسمعت صوتها، قلتله ييبها لي قال لا ، بنوديها اينظفونها ويكشف عليها دكتور الاطفال بعدين بنييبها لج، والله يا بنات ان يوم يابوها لي حسيت ان دخلت قلبي من اوسع ابوابه ، شفتو لما يقولون حب من اول نظره، هاذي الي صادني، قلت في قلبي خلصو بسرعه ، ابي الم بنتي في قلبي، المهم اسمع صوت الشفاطه الي تشفط الدم من الرحم، مره وحده الا اسمع الدكتوره تصارخ على النرسات ما اشوف ما اشوف مشو الدم الي على عيني ، مادري شسوت وتنطش الدم عليها وعلى الستاره الخضرا الي جدامي ، مت من الخوف ، قلت لا انا ميته ميته، اهم شي طلعو بنتي بالسلامه ، ولا انا خلاص راحت علي، تالي عقب فتره الا الدكتوره الي تسوي لي العملية تسألني من ور الستاره، فلانه؟ قلت نعم، الا تقول انتي تلعبين رياضه؟ صراحه تعجبت من سؤالها وجاوبتها : حاليا لا، بس قبل لا اتزوج كنت اركب خيل ووقفت لأن خرعوني البنات، قالو لي الي تركب خيل احتمال ما تحمل لأن الرحم يرتفع فوق، الا تقول: انا خيطتج بس الخياطه انفتقت من كثر ما عضلات بطنج وايد مشدوده، وبارد اخيطج مره ثانيه بخيط نايلون مادري شنو، المهم انه هاذي تقنيه الخياطه القديمه، وصار دكتور التخدير على اعصابه لأن يبييها تخلص الخياط قبل لا افج من البنج، المهم عقب ساعه الا ربع خلصت، جود النرسات نظفو بنتي وطلعوها حق امي وقعدت اتصيح صياح لأنها اخيرا شافت ضناي، وهالشي امنية حياتها، ولأن شافتها اتشابهني 100 بالميه ، ما خذت ولا فتفوته من ابوها، وزوجي يوم شافها استخف مب مصدق انه شاف بنته، وقعدو ثنينهم يصيحون ، يوم بديت افج من البنج شوي حسيت ببروده فضيعه وقمت ارتجف رجفه قويه مثل السعفة استمرت معاي لين الظهر قالو لي النرسات عادي من اثر البنج ورجعوني غرفتي في الجناح ومايابوها لي الا ثاني يوم الصبح عقب ما سبحوني حق ارضعها، اه على ذاك اليوم يوم لميتها في حضني واهي تصيح وانا اصيح من الفرحه، والله كل ما طرا علي دمعت عيني.


اذا عجبتكم القصه لا تنسون التقييم :)