انا نزلت الموضوع ده من فترة بس يومها الموقع وقع والموضوع اتشال :D
حظوظ بقى ههههههههههه
فهنزله تاااااااااني اهو
دي طريقة ورق العنب بتاعي ...جربوه وقولولي رأيكم
وأدي شكله ف الاول اهو عشان يفتح نفسكم تكملوا الموضوع
المقادير بقى:
الخلطة:
نص كيلو ورق عنب...معرفش كان كدا ولا ازيد الحقيقة :D
3 كوبايات رز
ربطة بقدونس وربطة شبت
بصلتين
كيلو الا ربع طماطم
ملح وفلفل وكمون وبهارات
بطاطس
اول حاجه بقشر البطاطس وارصها في الحلة من تحت عشان المحشي مايلزقش فيها وبكون حاطه زيت ف الحلة
بفرم البصل...واحط زيت في حلة تانية واشوح فيها البصل شوية
وبعدين اضيف عليه الطماطم والتوابل واسيبها تتسبك
لما تستوي...نضيف الرز المغسول والخضار ونقلبهم وندوق الملح لو محتاج نزوده نزوده
وبكدا الخلطة تبقى جاهزة
نبدا بقى نحشي...وانا بحب ارصه بالطريقة دي
سطر ورا بعضه كدا ف النص ونصين دايرة حواليه
والدور الي بعده السطر يبقى بالتبادل ...الحلة كدا مش بتتفرط لما بقلبها
لحد مانخلص خالص
ونحط طبق صيني فوق الحلة مقلوب عشان يمنع المحشي انه يتفك
نحضر بقى الشوربة الي هنسوي بيها المحشي
تمر هندي...مبلول ومصفى كويس...بكون بالاه من الصبح ومحضراه
سكر لتحلية التمر الهندي...بضيفه وادوق لحد مايعجبني بس انا بحبه مزز شوية
عصير لمونتين كاملين
ملح .. توم باودر
مكعب مرقة دجاج ماجي
بخلطهم واحطهم على النار يغلوا وادوبهم ف بعض كويس
وازود المحشي بيهم
بحيث يبقى ارتفاع السوايل حوالي 1 سم فوق المحشي
واهز الحلة كويس عشان ينزل لتحت العصير
وبعدين احطها على النار...واعلي النار لحد مايغلي ويتشرب المية شوية وبعدين اهدي عليه واسيبه يستوي
وادي شكله اهو
شوفوا من الجنب ماشاء الله مفيش ولا واحد مفكوك
وادي طبقي
وعملت جنبه فراخ بالبصل بموووووت فيها ::)
وووووبس كدا
اتفضلوا معانا
ولو عجبكم الموضوع ماتنسوش التقييم
وتدعولي ان ربنا يحقق لي امنيتي :)