صرت أكره سوالف الشبه (الطفل يشبه أمه أو أبوه)

مرحبا يا اخوات
كيفكون ان شا ءالله طيبين
الحقيقة حابة افضفض لعل احد ردودكم يخفف عني
وبنفس الوقت عل وعسى احدكم يستفيد من موضوعي بحيث انكم تتجنبون تجريح الناس بسبب موضوع الشبه
الموضوع يمكن البعض يعتبره سخيف بس الأمهات اللي ينحطون بالمواقف اللي راح اذكرها اكيد الموضوع بيهمهم
الموضوع هو حكاية الشبه ... اقصد شبه الأطفال ... الطفل يشبه أمه أو أبوه
وبنفس الوقت الموضوع له علاقة بالجمال

هم نقطتين دايما اتعرض لهم :
النقطة الأولى:

القصة ومافيها ان العائلة اللي انا عايشة فيها (أهل زوجي) مدري كل ما يجيهم حفيد (جميل) يصروا على أنه طالع عليهم ،،، حتى لو ما كان طالع عليهم
في البداية انا لما شفت بنتي تشببهم وحلوة عادي ماهمني بس اللي همني انه لما جبت البنت الثانية في البداية شبههوا فيها لانها كانت حلوة بس لما كبرت وتغيرت بدوا ينكروا انها تشببهم...والمشكلة انه حماتي أول ما جبتها قالت عنها (سمراء مثل خالها - يعني مثل أخوي) مع العلم انها من البداية كانت تشببهم واعمامها و عماتها سمرين ...ليش ماقالت سمراء على عمتها أو عمها

من فترة قصير حصل موقف لسلفتي بوجودي
كنا مجتمعين وسلفتي تكلمت عن فلانة وعلانة يقولون ان بنتها (الحلوة طبعا) تشبهها...حماي ما عجبه كلامها وعارضها بأن الطفلة طالعة عليهم مو عليكِ ! (مع العلم اني اشوف ان بنتها تشبههااااا يعني طالعة على امها) ... بصراحة استغربت من موقف حماي ليش هالأسلوب وليش دايما الاصرار بأن احفادهم الحلوين يشبهونهم...((مع العلم انه دايما يمدح بجمال بناته وعياله ويقول انهم احلى عيال وان بناته احلى من سلفاتي .. الخ))
بنفس الوقت سلفتي كسرت خاطري والله حسيتها تفشلت و زعلت مع ان والله الشاهد بنتها تشبهها بس كلام حماي ضايقها

النقطة الثانية:
الناس اللي تغار مني وودها تقهرني تتعمد بأكثر من مناسبة تبين لي أن (بنتي الحلوة) ما تشبهني حتى لو اضطرت انها تفصفص بنتي من الرأس للقدم علشان تقهرني زيادة
ودي اعرف بس شو تستفيد هالناس وياكثرهم لكن وحدة منهم وقفة لي بالمرصاد

هاذي وحدة من اول ماشافت بنتي وهي تمدحها وتبين لي انها حلووووووة و بنفس الوقت تقللي ما تشبهك .. غير غير ما تشبهك ..وانا بالبداية ما أفهم شقصدها
ليما اللي حواليها يحاولون يراضوني ويقولن في شبه وهي بالفم المليان لاااااااااااا مافي شبه
العين غير
الخشم ماله خص
الفم غييييييييييير
الحواجب لااااااااااااا غير
الخدود ما تشبهها
...

طيب ليش هالأسلوب ...من طلب منك تفصفصين بنتي علشان تثبتين لي انها ما تشبهني
وتتوالي المناسبات و بكل مناسبة اذا حد شبه بنتي الحلوة فيني تنقز من بين الجمهور و تصر على ان بنتي ما تشبهني....

شو استفادت

غير انها اوجدت فجوة بيني وبين بنتي ...و حساسية بيني وبين بنتي
كلما اشوف جمال بنتي اتذكر اسلوبها وكلامها اتضايق وكلما اشوف شكلي بالمرأة احس إني اقبح وحدة بالعالم...مع العلم اني عادية لكن فرق بين مستوى جمالي وجمال اهل زوجي

و ساعات اقول ياليتني ما تزوجت عائلة جميلة علشان ما اكون اضحوكة للناس لأن للأسف الناس مو شايفين خير .. من يشوفون بنتي الحلوة ينفجعون و يجلسون يقارونون بيني وبين بنتي ...وياكثرهم ...الأقارب..الجيران...البعض يعلق بدوما ما يقصد شيء وهاذي الفئة أعرفها واعرف ان نيتها صافية ... لكن البعض واضح من اسلوبهم و من تكرار مواقفهم انهم قاصدين تجريحي ... يعني لا تقولون انتي محسسة من الموضوع .. أنا ما حسست الا لما عرفت ان في ناس تتعمد تجرحني ...

لاتقولون غيرانة من بنتها ولا حاسدتها ..أحمد الله ان عندي بنت حلوة ..انا من اول ماشفتها خفت عليها من الحسد لكن كيف الناس تسيء التصرف وتتعمد تجرح.... الظاهر ان الناس هم اللي حاسديني لان عندي بنت حلوة و ما همهم غير يجرحوني ويضايقوني بجمالها و بقصة شبهها....


بس حبيت افضفض وياليت كلامي يلاقي صدى في قلوب الناس اللي ماهمها غير تجرح لانها ما تدري شو العواقب
فكروا انه كلما حصلت حساسية بين الام وبنتها بسبب موضوع الشبه تذكروا انكم كل مرة تكسبون إثم لانكم توجدون فجوة بين الامهات و أطفالهم بدل ما أنكم تلمون الشمل

للعلم الموضوع نفسه ينطبق على شبه الأخوات (الناس الليت تحب تقارن بين الاخت الحلوةوالاخت القبيحة).....

الله يهدينا اجعين