اكلتنا كبد فراخ بطريقة جديدة
المكونات :
بصل وفصين توم وفلفل احمر حلو ومكعب ماجي ومعلقة صغيرة نشا ومعلقة صغيرة زعتر وملح وفلفل اسود ومعلقة صغيرة خل عنب احمر وكبد دجاج وسبانخ
نحط معلقة زيت في طاسة ونحمر فيها كبد الدجاج كويس جدا جد ا
بعد ماتتحمر نشيلها ونحطها في طبق ونخليها على جنب لحد ما نحتاجها
نحط معلقة زيت تاني في الطاسة ونحمر البصل والثوم
وبعدين نحط عليهم الفلفل الاحمر والزعتر
ندوب مكعب الماجي في نص كوب ماء وندوب معلقة النشا في ربع كوب ماء ونحطهم على الخليط ومعاهم معلقة خل العنب الاحمر
ونخليهم على النار يغلوا شوية وبعدين نضيف الكبدة المحمرة ونسيبهم يغلوا شوية على النار
نشوح السبانخ في حتة زبدة وفص توم مهروس مع شوية ملح وفلفل وبعدين نفردها في طبق التقدين ونغرف الكبدة عليها
ونقدمها مع رز ابيض او خبز
وعلى فكرة اللى مش بيحب السبانخ ممكن مايحطهاش خالص لانها مش داخلة في مكونات الكبدة اوي يعني ممكن نستغنى عنها خالص
اما الحاجة الحلوة فهي تيراميسوا على طريقتي سهل جدا ولذيذ
دي الحاجات اللى محتاجينها
كيك اي نوع وكوب نسكافية وعلبة قشطة و 3 قطع جبن كيري وكاستر معمول بالطريقة العادية وكريمة خفق
هنخفق الكريمة مع 3 معالق كبيرة سكر ودة شكلها
هنرص طبقة كيك ونرش عليها النسكافية بس مانكترش
هنحط الجبنه والقشطة على الكاستر بعد ما يبرد ونقلبهم سوا وبعدين نحطهم على الكريمة كدة
نحط نص خليط الكريمة على الكيك وبعدين نعمل طبقة تانية من الكيك ونرشها بالنسكافيه وبعدين باقي خليط الكريمة ونزين الوش بالكاكاو البودرة ودة شكلها
وبالهنا والشفا
