قصة ولادتي << بكريه وبغربه

السلام عليكم ..
اخباركم عروسات كروشات ورشيقات ؟
وحشني المنتدى :)

انا الحمدلله ولدت يوم الاحد بتاريخ 1/11/2009 وجبت احلى كرار الله يخليه ان شاء الله ..
انا المفروض اولد تاريخ 29/10/2009 وهو الموعد الي محددتنه لي الدكتوره الي اتابع معها ..بس قضاء الله وقدره تاخرت وهو شيء طبيعي للبكر ..

بتاريخ 28/10 كان عندي موعد مع الدكتوره وكان يومها نازل مني افراز بسيط اصفر مايل للاحمر .. وقلت لها وقالت لي اذا بس مره نزل وقليل عادي ..بس اذا على دفعات بين فترات لازم تروحين المستشفى .. قلت لها طيب .. ورجعنا البيت وماسوت لي فحص تتاكد من الرحم .. في الليل حسيت بالم مثل الم الدوره بس اشد في ظهري وبطني ورجولي .. كان يجي بين ثلاث الى اربع ساعات فكان عادي .. بس وقت الم لازم زوجي يمسك لي ظهري لان كان قوي .. وتمشيت لي ساعه .. ونمت وماخبرت امي بشيء علشان لا تخاف وتحاتي ..

تاريخ 29/10 نفس الشيء كلا الم وتعب بس بدون افرازات .. امي انتبهت لي اني تعبانه سوت لي دارسين و جلست اكل تمر .. وقريت ادعيه وسور تسهيل الولاده ..وطلعت اتمشى بالسوبر ماركت لان الجو بارد عندنا مااقدر امشي برا .. والاهل مو مقصرين في كل فريضه كانوا يدعوا لي بولاده سهله ..

تاريخ 30/10 زاد الالم اكثر واكثر .. وانا ساكته متحمله .. وكنت اقراء الادعيه والسور واكل تمر واشرب في الدارسين .. الساعه 8:30 الليل رحت اشتري العربه مع الكارسيت لاني ماشريتهم .. وبعدها رحنا السوبر ماركت نتمشى وناخد كم شغله للبيت .. وحنا هناك حسيت ارجولي ماتشيلني مو قادره امشي .. قلت لزوجي وقال خلاص نرجع البيت .. رجعنا ودخلت الحمام وانتوا بكرامه وفي نفس الافرازات بس كثيف مره .. قلت له نروح المستشفى نشيك ايش في .. رحنا وامي وابوي معانا وحملت امي الشنطه الي مجهزتنها قلت لها لا مو ولاده قالت احتياط تظل بالسياره ..

رحت على الساعه 11:00 الليل قالوا لي بتجيني دكتوره مو الي كنت اتابع عندها بس دكتورتي بتكون على الخط معاها .. قلت لهم طيب اهم شيء حرمه مو رجال .. قالوا حرمه .. دخلت علي ولا اهي تسالني تبغي اتكلم معاك عربي ولا انجليزي .. اطالع فيها اقولها اتكلم الاثنين بس عربي احسن علشان المصطلحات حقت الولاده .. قالت الي انا عراقيه وتطمن قلبي .. قالت اوكي وفحصتني وامي وزوجي معاي بالغرفه .. وقالت مفتوح 4 سم ..:eek: ولاده .. اطالع في الاهل اقول لهم من صجها .. قالت بشيك عليك بعد ساعتين نتاكد .. قلت طيب .. جاتني على الساعه 1 تقريبا قالت الي 5 سم .. فرحت وقتها بس كنت اتوقع اكثر بماانه ولاده .. قالت اخر فحص بعد ساعتين بعد .. وانا اعد في الدقايق متى تجي تفحص مع اني مااحب الفحص .. قبل تجي تفحص انفتح كيس الماي ووسخت السرير والممرضات ساعدوني في التغيير ونادوها وقالت لي اخر فحص بشوف .. فحصت الا تقول ماشاء الله 8 ونص خلاص ماباقي شيء .. وانا على اعصابي من الالم وامي تقراء لي القران وزوجي يهدي فيي وساعدني في وقت الطلق .. بعد نص ساعه جت الدكتوره حقتي وبدء الشغل الحامي .. ظلوا ثنتينهم معاي علشان تترجم لي ايش صاير .. يقولون الى امي ماشاء الله عليها صبوره .. اول مره نولد بنت صغيره وتكون بهالصبر ..

كل ماجاني طلق دفعت بقوه وموباين شي والالم قوي لان مااخدت ابرة الظهر ولا شيء وتعبت من الالم .. وقالوا لي بنستدعي دكتور اطفال لان البيبي شرب من ماي الرحم ونبغى الدكتور يكون موجود اول مايطلع .. قلت طيب .. وحطوا الدكتور ورا الستار ينتظر .. وانا كل مادفعت يبان شوي من راس البيبي وينادوا زوجي يشوف .. وامي على قلبي قامت تصيح وهي تشوفني اتالم قلت ياليتني مادخلتها معاي االمها ويايي .. طلع جزء كبير من راس البيبي وزوجي يقول لي يالله اخر دفعه والبيبي يطلع .. ودفعت بقوة وطلع حبيبي قلبي كرار ونور امريكا على الساعه 6:00 الصباح مع وقت الصلاة .. لما طلع شفت الدكتوره تغير لونها ونقلبت واخدوه على طول للدكتور بدون مانشوفه .. وانا اسال عنه وهي تقول طيب بس ينظفوه ويجيبوه لك .. وزوجي ماخلو يقرب منه .. جاني يهدي فيي وباسني على راسي وطاحت دمعته على قلبي .. تعبته معاي .. انتظرت شوي وبعدها قالت لي باطلع المشيمه قلت لها طيب .. ضغطت على بطني مرتين والحمدلله المشيمه طلعت على طول بدون شيء .. صابني جرح خفيف قالت لي مايحتاج خياطه يلتام لحاله .. بعدها جابوا حبيبي قلبي وقبوشي كرار وحطوه على صدري بس دقيقتين واخدوه ينظفوا اله الماي ويراقبوا تنفسه ..

ظل حياتي بالمستشفى 5 ايام علشان يراقبوا التنفس وكل شيء .. وكنت رايحه جايه في المستشفى علشان ارضعه واطمن عليه .. والحمدلله قالوا لي ان كل شيء معه تمام وصحته بخير..

عاد تصدقون .. انصدمت من شيء .. وحنا نتكلم مع الدكتورتين بعد الولاده .. عن ليش ماسوون توسعه او خياطه لي .. عاد يقولون اصلا ممنوع هدا الشيء الا للضروره .. تقول لي العراقيه اصلا امريكا تحاول تمنع السعوديه من هالشيء لان طبيعة الرحم تتوسع على حجم البيبي فماله داعي توسعه و خياطه.. قلت لها طيب وانا الحين نجرحت خفيف ليش ماخيطتوني .. قالت لي جرحش مايحتاج تقول الي قد مفصل ونص هذا يخيطوه .. يعني لاعبين علينا بالسعوديه علشان الفلوس ..

هذي قصة ولادتي .. والله يسهل على جميع الحوامل .. ويرزق الي ينتظرون يارب .. :D