حملي الثاني بالرغم من انه كان فيه تكيس صعب.. سبحان الله

السلام عليكم ورحمه الله وبركاته


شحالكن خواتي عساكن بخير

خواتي انا كنت من رواد هالقسم من سنتين والسبب تاخري في الحمل

كان عندي تكيس ولله الحمد حملت بعد علاج دام سنه وحملت بعد العلاج بالكلوميد والحمد الله ربي رزقني بتوأم فديتهم الله يحفظهم من كل شر

خواتي سبب حملي الاول اكيد الدعاء ورب العالمين والعلاج ومع العلاج كنت انزل وزن ماكان عندي هذاك الوزن الزايد كان جسمي عادي على شوي مليان على الخفيف يعني الكل يقولي جسمج حلو بس نزلت 5 كيلو مع العلاج حملت بعد رابع مره من العلاج بالكلوميد

وبعد الولاده والتعب والنفسيه الزفت على السهر والعيال والاهمال في شكلي وجسمي رحت لكذا دكتوره عشان اركب لولب او اخذ مانع حمل بس قالولي عندج تكيسات صعبه وما بتحملين هالفتره ابدن ارتاحي لا تفكرين بالموانع عندج مانع طبيعي

عاد انا ارتحت وحطيت في بطني بطيخه صيفي لووووووووووول

قلت يابنت كفايه اهمال في شكلج لان وزني زاد بعد الولاده وصار جسمي مبهدل فقمت سويت رجيم على الخفيف وخلال شهرين ونص نزلت 7 كيلو والمفاجاه انه الدوره تاخر لما فحصت طلعت حامل الصراحه انصدمت لان الدكاتره قالولي انسي تحملين الحين وانا ماكنت ناويه على الحمل لان عيالي صغار وتعبانه وايد وكنت اريد ارتاح واعوض ريلي ايام الاهمال

بس سبحان الله شاء الله وماقدر فعل


خواتي لاتقولن عندنا تكيس وحملنا صعب جربو تنزلون من وزنكم لو خمسه كيلو وشوفو النتيجه والي وزنها زايد وايد تنزل لين يوصل وزنها للوزن المناسب سبحان الله كان علاجي نزور الوزن

حاليا حامل في بدايه الشهر الرابع

دعواتكم لي والعيالي وزوجي ان الله يوفقنا ويسعدنا ويثبت حملي يارب


اتمنى اني افدتكم ان شاء الله