سلطة نخي وبيذيان وزهرة على طريقتي الخاصة....!!

هااااااااااي حبيباتي شلونكم مشتاقتلكم موت موت موت و اليوم يايبتلكم طبق سلطة انشالله يعجبكم بس ما انصح للي تسوي رجيم لأنها دهونيات بس يم يم يم لذييييييييذه.........!!!!!!!
بس عاد توعدوني تسوونها وتعطوني رايكم.....؟؟!

*المقادير...
أ-مقادير السلطة...
1-بيذيان(اللي اهو اساس اسمه باذنجان بس احنا بالكويت و الخليج نقوله بيذيان ووضحت لاختلاف اللغات والألفاظ فديتكم).
2-بطاطس مقطعة مكعبات صغيرة منقوعة بماء حار وملح لمدة بسيطة وتالي تقلينها وتصفينها من الدهن.
3-زهرة (عاد احنا نقولها زهره بس مادري بلغة ثانيه شسمونها بس اعتقد قرنبيط والله مادري) المهم هذي تاخذون كل حبة زهرة صغيره مو عوده (كبيره) لأ يعني تكون حبة حبة وصغار وتقلينهم وتالي تصفينهم من الدهن.
4-علبة نخي جاهزة عاد تييبونها من الجمعية يعني معلبة او تييبونها من راعي النخي والباجلاء كيفكم شتحبون وشنو اسهل لكم.
5-طماطم مقطع قطع صغيرة (طبعا الطماطم للي يحب يحط)
6-خس مقطع.
7-بصل أخضر مقطع.
8-بقدونس وكزبرة شوي مو وايد بس ان تكون تعطي طعم خفيف وبسيط عالسلطة تفرمينهم فرم ناعم. وتاخذين بعد معاهم نعناع هم مفروم وتخلين حبتين عدليين يعني ورقتين. للزينه :D...
*((تنقلب المقادير مع زيت زيتون وملح وليمون(بس لا تكثرين عشان لا تصير مياهيه) وفلفل أسود وتنحط بصحن التقديم))...

=لحظه ترى ما خلصنا بعد في شي ((الصوص))....:21_92:
ب-مقادير الصوص...
طبعا تييبييين الخلاط وتحطين فيه هالاشياء..>>>>>
-مايونيز + زبادي + ثوم مطحون + جبن(اما تكون كرافت او كيري على حسب اللي تحبون بس انا احط كيري لان أحلى عندي) + ناخذ شوي من الحمص او النخي يعني جم حبة وعلى حسب رغبتج... تنخلط هالمقادير كلها بالخلاط وتزيدين عليها شوي ماي وتخلين المقادير تنخلط مع بعضها لمن تصير السمك الطبيعي اللي ترغبين فيه....
(تالي تصبين الصوص فوق السلطة بدون ما تخلطينها مع مقادير السلطة...""أو اذا تبون تخلطونهم كيفكم)...

=لحظه لحظه في بعد أدري دوختكم بس ترى اهي ما تاخذ وقت عالقرقه هذي كلها بس باقي أخر شي واهو ((التزيين))....:21_86:
نييب خبز مقطع مربعات صغيرة ونقليها بالدهن زيت زيتون بس لازم يكون الدهن حار عشان لمن نحط الخبز يتحمص ويصير مقرمش وتالي نصفي الخبز من الدهن ونرش عليه شوية سماق ونخليه على كتر ((يعني على جنب الطبق وانا انصح ما ننثره عالسلطة عشان اللي يحب مع خبز محمص ياخذ من على جنب واللي ما يحب ياكل بدونه))....

والحين خلصت وهني وعافية وعلى الله تعجبكم انشالله.......