السلام عليكم ورحمة الله وبركاته ،،
قبل يومين سافرنا من المنطقة اللي أقيم فيها حالياً ( فورت كولنز ) بولاية كولورادو ، إلى منطقة ثانية وهي عاصمة ولاية كولورادو ( دنفر ) ،، وتبعد حوالي الساعة والنصف عنا .. <<<< جالسة تعطيكم معلومات عن الولايات وعواصمها :tongue:
طبعاً الهدف من السفر هو التسوق من الأسواق العربية المتواجدة في العاصمة ، وبالمرة زرنا عدة أماكن من ضمنها حديقة الحيوانات ..
الجولة في الحديقة كانت ممتعة لولا الجو الدافئ جداً اللي تفاجأنا فيه ولا عاملين حسابه :confused: - على اعتبار إن الفترة الأخيرة الأجواء كانت باردة - ..
يعني كنزت نفسي والعيال بالصوف :D وتوكلنا ،، لولا اني عاملة حساب للعيال وجايبة لهم غيار وإلا كان غرقنا فيها رطووبة :tongue: ..
وعاد قلت بجي أراويكم كم صورة من مجموعة صور كثييييييييرة أخذتها في حديقة الحيوانات :)..
ونبدأ من المدخل ،،
مقابل البوابات شفت غرش فيها ماي بارد ترشي فيها وجهك عشان الإنتعاش وعشان تغطي على حرارة الجو :( ، وشريت منها ثلاث لي وللعيال ..
الحديقة كبيرة الصراحة بس ما كبر حديقة الحيوانات اللي بالإسكندرية :wink: ، ولا مجال للمقارنة حتى ،،
والحين نبدأ مع صور الحيوانات الكاشخة هناك ،، ما أخفيكم إني شفت حيوانات لأول مرة في حياتي ،، تابعوا معاي :)
الأسد انتظرناه عسب يشوف علينا شوي ولا عبرنا :tongue:
تذكرون المسلسل الكرتوني تيمون وبومبا ،، وأخيراً شفت بومبا على الواقع :D
وشفت الجمل أبو جبلين :D
وشفت هالحيوانات الغريبة ،،:eek:
وهاي النمر واحليله في رقاد ، ومن بين كم صورة صورته اياهم جبت هاي عشان تشوفون لسانه كيف ثانيها ،، وبنوتي مودي كل ما تشوفه تقلده :D
وهالحيوانات مدري شو اسمها الصراحة :o
تعرفون هذاك الحيوان اللي يشفط النمل ،، صراحة اندهشت من خلقة الله ،، يعني فمه جد عبارة عن شفاط وجلس يسوي العملية قدامنا بعد ،، والصورة تتكلم :)
وهنا صورة جماعية للبطاريق ،،
وأيضاً صورة جماعية لنوع من الطيور حبيت لونها يا سبحانه ،،
وهالطير ما أشوفه إلا بالكرتون :tongue:
وهنا صور مجموعة من الطيور أيضا ،،
وفي الختام ، أعرض لكم صورة الغلاف لموضوعي :tongue:
إن شاء الله استمتعوا بالموضوع والصور المعروضة :)
والسلام عليكم ورحمة الله وبركاته ..