تطلي البلح من مطبخنا الفلسطيني بالخطوات المصورة روووعة

ا

السـلـطـانـة

عروس متألقة

14-10-2009 | 11:37 PM

كيف حالكم يااحلى صبايا اليوم جيبالكم حلو رووووعة وطعمه خيااال إلي هو تطلي البلح
واللي مافهمت عليا شو معنى كلمة تطلي التطلي = المربى .. ماما عملته قبل فترة وأنا كنت واقفة معها بالكاميرا مشان اصور خصوصا لمنتدى عروس الغااالي ..
طبعاً هادا التطلي مابنفع غير مع نوع واحد من البلح اللي هو البلح الاحمر ورح احطلكم صورته
كل اللي بيلزمنا
بلح أحمر + سكر+قرنفل+ لوز مسلوق + طولة بااااااال :D
المووهيم ومابدي أطول عليكم خلونا نبدأ باسم الله الرحمن الرحيم

هادا هو السيد البلح اللي بلزمني بالوصفة

وأول إشي بنعمله إنا إنأشر البلح وأفضل طريئة لتئشيره هي بالآشارة تاعت الخيار أو باقي الخضروات نسيت اصورها بس بتوقع الكل عاارفها وبعد ما نأشر البلح بكون منظره هيك ..

بعدين بنحطه على النار مع ميا فقط مشان ينسلق وبس نحسه طري شوووو بنعمل؟؟ ياترى
شوفوا وركزوا معي أول خطوة بنعملها أنها بننشله من الميا تاعته بس بنخليها ع جنب وبعد ما نئيمه من الميا بنجيب شوكة وبنطلع النويا وبنحط بدالها لوز من اللوز المسلوء وبنملي محل النويا احيانا بياخد لوزه أو لوزتين أو تلاته ع حسب حجم البلحة ..
وانتبهوووا ما تنكسر معكم البلحة

صورة النوى تاع البلح

وهادا هو اللوز المسلوووق

وهادا شكل البلح بعد ما انسلق وطريق وطلعناه وإمنا منه النوى وحطينا بداله اللوز

طيب يا صبايا هلئيت ركزوا معي منيح
احنا حكينا انه الميا تاعته اللي سلقنا فيها بنخليها ع جنب بالطنجرة وبنحط عليها سكر وقرنفل وبس يدوب السكر وتغلي بنرجع بنضيف البلح عليها تاني ..
طبعا بكون لون المرءة تاعته على أحمر صارت ..

ضفنا السكر

حطينا القرنفل

وبعدين رجعنا البلح اللي محشي لوز على المرقة مشان يكمل استوى ويصير لونه أحمر

يتبع الرجاء عدم الرد لحد ما أكمل ..

ا

السـلـطـانـة

عروس متألقة

14-10-2009 | 11:43 PM

البعض رح يتساءل هل بالصورة الاخيرة بأول الموضوع اللي حطيتها واللي فيها اللوز مبين هل هو طالع من البلح الاجابة يابنات لاء
احنا كمان بنحط مع البلح باقي اللوز اللي ضل بعطي طعم ونكهة وكمان شكل حلووو بالنهاية يعني اللوز موجود جوا البلح وكمان جوا المرءة تاعته ..فهمتوووني طبعاً :cool:

نيجي نكمل يا حلوات لازم نخلي البلح على النار يغلي لحد مايتحول لونه أحمر وتصير مرءته فيها شيء من اللزوجة والكثافة وأورجيكم بالصور ..

لاحظوا أول ما حطيناه كان لونه أصفر لسا .. بس شوية شوية بتحول لونه أحمر سبحان الله كيف لونه اصفر وبعدين خلا الميا تصير حمرا وهو صار احمر .. وهذا يعني انه اللون الاحمر مش بس بالقشرة اللي مبينة النا ..

البلح اثناء الغلياااان

لقطة تانية اثناء الغلي

والآن نيجي للشكل النهااااااااائي للبلح

تفضلووووا

بنخليه يبرد ليلة كاملة وبعدين بنفضيه بعلب او مرطبانات ويتم تناوله على وجبة الافطار او العشاء مع الخبز ..

ا

السـلـطـانـة

عروس متألقة

15-10-2009 | 02:18 AM

بستنى آراءكم وان عندكم استفسارات وهل بتعرفوا هاي الوصفة قبل هيك او عندكم طرق تانية الها ياريت نفيد ونستفيد يا صبايا

م

ماذا اقول

مراقبة أركان البيت والمطبخ ومشرفة ركن الأزياء ، عضو فريق التطوير بالمنتدى

15-10-2009 | 02:22 AM

يسلمو ايديكي حبيبتي على المربى-التطلي-
انا بعمله بنفس الطريقه بس بخللي لونه اغمق يعني بخليه يستوي اكتر علشان يقعد مده اطول
ويعطيكي العافيه

م

ماذا اقول

مراقبة أركان البيت والمطبخ ومشرفة ركن الأزياء ، عضو فريق التطوير بالمنتدى

15-10-2009 | 02:28 AM

طبعا هدا مربى مشهور جدا عندنا في فلسطين
ويكاد يكون حصريا عندنا

a

amira hesham

عروس برونزية

15-10-2009 | 02:51 AM

حلو اوى الطريقه دى تسلم الايادى يا قمر

ا

السـلـطـانـة

عروس متألقة

15-10-2009 | 02:54 AM

فعلا هو خاص بالمطبخ الفلسطيني ومشهور جداً في فلسطين وحياك الله اختي الغالية ماذا أقول وشكرا على تشجيعك المستمر ..

yassmarmar تسلمي حبيبتي على مرورك اللي شرفني

v

vanilla cake

عروس ماسية

15-10-2009 | 04:59 AM

تسلم يدج حبيبتي بس أول مره أشوف هالطبخه باين عليها لذيذه

ا

السـلـطـانـة

عروس متألقة

15-10-2009 | 05:48 AM

حياكي الله حبيبتي معاكي حق لانه هاي الاكلة فلسطينية وتقريبا غير معروفة في باقي الدول العربية
لوجربتيها مارح تندمي ان شاء الله

ا

العولمة

عروس مبدعة

15-10-2009 | 12:03 PM

يسلمو حبيبتي بس تعرفي هادي اول مرة اشوف الطريقة

^

^ السفيرة^

مشرفة سابقة

15-10-2009 | 12:29 PM

ماشاء الله عليج ياالغالية

طريقه حلوه وسهله وكل شئ واضح ومرتب

تسلم الايادي يارب

m

miss sh

عروس ماسية

15-10-2009 | 12:31 PM

طبق غريب جدا عالعموم يسلمو

ا

السـلـطـانـة

عروس متألقة

15-10-2009 | 11:12 PM

أنا مقدرة استغرابكم لكن لانه مش مشهورة بالدول العربية لو جربتوها رح يتحول الاستغراب لسعادة من لذة الطعم وروعته

ح

حبيبه الكل

عروس رائعة

16-10-2009 | 12:59 PM

روووووووووووعة مجهود لطيف

ا

السـلـطـانـة

عروس متألقة

17-10-2009 | 03:01 AM

حبيبة الكل مرورك هو الروووعة غاليتي

ا

السـلـطـانـة

عروس متألقة

18-10-2009 | 03:43 AM

____________________________

p

pnncEsS M!Ss

عروس ماسية

18-10-2009 | 04:57 AM

تسلم يدج حبيبتي بس أول مره أشوف هالطبخه باين عليها لذيذه

أ

أم نجود الأحساء

مشرفة سابقة

18-10-2009 | 10:01 AM

تسلم ايديكي وايد الماما ياعسل

ا

السـلـطـانـة

عروس متألقة

26-10-2009 | 10:49 PM

_______________________________

ا

السـلـطـانـة

عروس متألقة

26-10-2009 | 10:50 PM

ملوكة وام نجوود مشكورات حبيباتي وحياكم الله