انا قررت اكتب هالموضوع نصيحه لكل بنوته من 11 ورايح
ولكل ام عندها بنوتات بدو يهتمون بنفسهم من خلطات وغيره
من واقع تجربتي وعشان اللي صارلي مايصيرلهم
اولاً: تحملي تاخذين أي خلطه من النت أو كريمات وماسكات للوجه تحملي ثم تحملي ثم تحملي
بشرة الوجه حساسه جداً وخصوصا فترة البلوغ لي 20 سمعيني ترا سويتها قبلج ومابقى شي ماحطيته فوجهي واليوم انا ندمانه:(
عندج العسل وماي ورد وزيت الزيتوون غيره لاتستخدمين
ماي الورد حطي بعلبه رشاش ورشي على وجهج يرطب البشره ويوردها
وزيت الزيتون خليه مره بالشهر واذا بشرتج جافه خليها مرتين
العسل خلطيه معا ماي شوويه وحطي على البشره ولين بشيلينه لاتفركينه لا شيليه بلطف
عندج مشاكل ثانيه حب شباب , كلف , اثار, بقع وغيره
روحي لدكتوره معروفه لاتلعبين بروحج ولاتصدقين خلطات النت
وتحملي تسوين سكراب لوجهج
ونصيحه: البقع السودا بالوجه تتكون نتيجة الوسخ المتراكم وتبني فوقه طبقات الجلد وبكذا صعب تشيلينه لكن بعد كل ماتطلعين من البيت رجعي غسلي وجهج بالماي واذا حسيته وسخ واايد غسلي بصابونه زينه
معلومه:الكريمات والغسولات والسكرابات وكل شي بتعلق للوجه هي للمرا فوق ال 30 لان فهالسن البشره ماتكون حساسه مثل احين
تحذير:: المكياج لايلمس بشرتج لاتقولين ماستغنى عنه خلج على الحمره والكحل والمكياج خليه للمناسبات الكبيره مثل زواج وغيره
ثانياً: المنطقه الحساسه
مثل ماقلت فوق تحملي تجربين اي خلطات او كريمات وغيره
خلج على اللي باقوله
الحلق: حفي بالموس وتركي الحلاوه تراها ضاره واذا استمريتي عليها من هالسن على ماتتزوجين بتشوفين المنطقه مترهله كنها لوحده عيوووز
شيلي بالموس ولاتتعمقين وايد وحاسبي وفي كذا طرق ياتكونين رغوه بصابون بيبي جانسون وتشيلين
او الحلق الجاف حطي نشا وشيلي
وبعد ماتشيلين يا تحطين ماسك من النشا وماي الورد او كريم سودو
والحلق كل اربعين يوم
وحولى تلبسين كلوتات اللي تيي شورتات عشان ماتصير المنطقه سوده ولازم المنطقه تكون ناشفه على طول
واذا لاحظتي اى التهابات ولا افرازات مو طبيعيه هلى طول روحي للدكتوره
وفي الايام اللي غير الدوره لبسي الفوط اليوميه اللي مثل كيرفري مع ان مافظلها لانها نفس ماركة الويز شوفي شي صناعته المانيه لانها احسن
تحذير: لاتغسلين المنطقه بصابون عشان ماتقتل البكتيريا النافعه ولا تستخدمين غسولات للمنطقه معليج من اللي يتكلمون بالنت لانها ضاره وكل الدكاتره ماينصحون بها ماي وبس وحتى غسول الماي والملح ممكن تستخدميه مره بالشهر بس والما يكون دافي وملعقه صغير جداً فكوب يعني مايكون مالح وايد بس نسبه قليله وتغسلين من برع بس يعني لاتحطين طشت وتترسينه ماي وملح وتقعدين فيه لا خطر بس من برع
ثالثاً: الشعر
لاتستخدمي الجل ولا الموس ولا سبريهات ولا الستشوار لصحة شعرج
تقدرين تزيتين شعرج باحد الزيوت
زيت السمسم , زيت الخروع, زيت الزيتون, زيت النارجيل , زيت اللوز
كل اسبوع من الجذور لي الاطراف بس مو لدرجه انه ينقط لا بكميه معتدله تكفي الشعر بلا زياده ولاتنسن المساج هو الاساس 5 دقايق
البلسمات لاتستخدمينها لانها تسبب تساقط رهيييب
حمام زيت اذا يناسبج سويه
ومشطي شعرج كل يوم عشان تتحرك الدوره الدمويه
ولاتخلين شعرج جاف استخدمي كريمات للشعر
مثل كريم man الابيض
أو كريم فاتيكا
والحنه خليها كل شهرين او 6 شهور على حسب نوعية شعرج
رابعا: التشققات البيضا او الحمرا
هي خطوط تطلع بالجسم ياكون حمرا او بيضه نتيجة الضعف والمتن
واذا طلعتلج صعب ترووح
فاحسن شي هو الوقايه
- رطبي جسمج بالكريمات
- شربي ماي واايد
أخيرا هذي اللي كنت بقوله وكل ام عندها بنوتات صغار تهتم فيهم وتمنعهم من الاشيا اللي ممكن تضر بشرتهم وجسمهم