السلام عليكم ورحمة الله
ازيكم يابنات عاملين ايه؟؟
جه على بالي اني عايزة اعمل عجينة الشو...فقلت المرة دي بقى اصورها خطوة خطوة عشان اما انزلها تبقى واضحة تماما
انا هكتب الطريقة والمقادير...وف الاخر هكتب الاخطاء الي نتفاداها واحنا بنعمل ماشي؟؟
نبدأ بسم الله
المقادير:
انا بستخدم مج للقياس
مقادير الشو باستري:
كوب ماء...
100 جم زبدة
معلقة سكر
ربع معلقة ملح
150 جم دقيق....يعني حوالي مج الا شوية
خمس بيضات
مقادير الكريم باتسيير للحشو:
2 صفار بيض
خمس معالق سكر كبار ممسوحة..
معلقة دقيق كبيرة مليانة
معلقة نشا كبيرة مليانة
كباية وربع حليب
كمية الكريمة دي هتكفي كمية الاكلير الي هنعملها ان شاء الله
هحتاج كمان شربات...شيرة او قطر ..عشان بلح الشام
وهحتاج شوكلاته لتزيين الاكلير:
مقاديرها...شوكلاته خام حلوة
هسيحها في حمام مائي واخففها بشوية حليب
واخليها مش سايلة اوي لان المفروض اما احطها على الاكلير تمسك مش تسيل من عليه
الطريقة بقى:
طريقة العجينة:
اول حاجه بنجيب حلة ونحط فيها المية والزبدة والسكر والملح
ونحطها على النار
ونسيبها تسيح لحد ماالزبدة تسيح خالص وتبدأ المية تغلي
أكون انا محضرة الدقيق منخول جاهز لاني هضيفه مرة واحدة على المزيج الي بيغلي...فلازم ادلقه مرة واحده مش اقعد انخله عشان مايكلكعش
اول ماحطه اقوم مقلبه بسرعه وطافيه النار واقعد اقلب فيه كتير لحد مايمتزج بالزبدة تماما ويبقى كورة كدا
هلاقي هنا ان العجين مش لازق خالص ف الحلة بتاعتي ولما بقلب بيتقلب معايا كويس وبيتحرك مع حركة المعلقة الخشب
كدا يبقى تمام
اقعد اقلب فيه شوية عشان يبرد واطلع البخار السخن منه
لو عندك عجان ممكن تحطيه ف العجان ف المرحلة دي وتكملي المراحل الجايه ف العجان
انا بصراحة استكلفت اقلب واعمل...كملت بايدي وخلاص :D
هنضيف البيض بيضة بيضة
وكل مانضيف واحدة نقلب كويس لحد مانتأكد انها امتزجت تماما قبل مانضيف الي بعدها...ماشي؟
هنضيف البيض ونلاحظ ان مع كل بيضة قوام العجين بيطرى شوية
المفروض لما اجي استخدم العجينه يبقى القوام لزج كدا عامل زي قوام معجون الاسنان...بمعنى اني لما اضغط على كيس الحلواني يكون بيطلع بسهولة كدا زي معجون الاسنان بيطلع ورا بعضه كدا مش بيقطع...فاهميني؟؟؟
او لما ارفعه بالمعلقة الخشب الاقي بيتدلى منها كدا
كدا تبقى العجينة مظبوطة
ناخد بالها انها بتلمع
اقلب شوية واسيبها تطرى واروح انا اعمل الكريمة الي هحشي بيها
ونروح نشوف طريقة الحشو بقى:
اول حاجه نحط الحليب يغلي على النار
انا هنا حطيته ف حاجه واسعه عشان اما اعمل فيها الحشوة اعرف اقلب كويس وكدا
في مضرب البيض...نحط صفار بيضتين ومعاهم السكر ونضرب كويس اوي لحد مايبيض
وبعدين نضيف لها الدقيق والنشا ونضربها كويس
وهنا هيكون الحليب غلي
ناخد نص كمية الحليب نصبها على المزيج الي عملناه ونضربها معاه كويس
النص التاني يفضل على النار عشان هنرجع المزيج عليه
لما يمتزج كويس ارجع اصبه على النص التاني من الحليب الي على النار
واقلب عشان مايكلكعش لانه هيعمل زي الكاسترد او المهلبية
لما يمتزج والاقيه بيتقل كدا اقلبه كويس شوية واطفي عليه واسيبه يبرد
هنشوف طريقة الكريمة بعدين خلينا نكمل العجينة
طبعا هنا هولع الفرن على حرارة عالية...220 مثلا واسيبه يسخن
واطلع الصواني الي هخبز فيها الاكلير
اجيب كيس الحلواني واوقفه ف كبايه او حاجه عشان اسهل على نفسي اني املاه
وابدا اشكل الصوابع بتاعت الاكلير بيه
انا ف الاول كنت بحاول اضغط على الكيس بايد واقطع بالايد التانية بسكينة
بس كانت صعبه عليا لاني مش بعرف استخدم ايدي الشمال كويس...فبقيت اعمل ازاي؟
اضغط على الكيس بايديا الاتنين عشان اكون الصابع...وبعدين اقوم ناتشه لفوق كدا مرة واحدة يقطع وخلاص
كدا اسهل واسرع
مانشيلش هم ان النوزل الي استخدمناها ف تشكيل العجين مشرشرة لان كدا او كدا لما هيتحط ف الفرن هيعلى اوي والشرشرة دي هتروح :)
لما نخلص بنحط الصواني ف الفرن على الحرارة العالية دي
ومانفتحش خالص عشان مايهبطش
لمدة 10 دقايق على 220 وبعدين ممكن نهدي النار ل200 لمدة كمان 10 دقايق
وبعدين نطفي ونسيب الاكلير ف الفرن عشان مايطراش...نسيبه عشان يجمد اكتر من حرارة الفرن
ده بعد ماطلع من الفرن
نحط الكريمة في قمع التزييين...وانا هنا قدامي اختيارين
يااما اني اشق الاكلير زي الساندوتش..وهنا ممكن استخدم النوزل الي على شكل نجمة
وانا عملت كدا
او اخرمه من تحت بحيث يبقى مش باين
واستخدم النوزل الرفيعة ادخلها واحشي بيها
شايفين من جوه ازاي فاضي مفيهوش عجين؟
بكون محضرة الشوكلاته...الي هستخدمها للوش
ندهن بيها الاكلير
وده طبق لأحلى بنات يارب يعجبكم :)
او استخدمه لبلح الشام
بجيب طاسه واحط فيها زيت عميق...ولااااااااااااااااااااازم يكون الزيت بارد
اقطع فيها بلح الشام...
وبعدين احط الطاسة على نار هادية...المفروض احافظ على ان الزيت يفضل بارد ومايسخنش اوي عشان تنشف معايا وتبقى هشة من جوه زي الجاهز
هنلاحظ انها اتنفخت وابتدت تتقلب لان الجزء الي بيستوي تحت بيبقى كثافته اقل من الي فوق فبتقوم مقلوبة
هسيبها كدا تستوي براحتها ماحاولش اعلي الزيت عشان تحمر
هي هتحمر لوحدها :)
واقلبها على الجنبين ولما توصل للون الي عايزاه اطلعها ف الشربات الي بكون محضراه من قبل كدا عشان يكون بارد
وده بعض ماطلع...بالهنا والعافيه عليكم :)
وده من جوه...شوفوا ازاي هش وفاضي
ممكن هنا نخرمه ونحشيه قشطة او كريمة
نيجي بقى للحاجات الي ناخد بالنا منها :)
اولا...الحلويات دي بتحتاج كمية من المواعين :D
فطبعا لما نخلص ونحط الحاجات ف الفرن او كدا ننضف المطبخ
ماعلينا...نيجي للمفيد
اول حاجه الاكلير بيبقى سهل جدا انه يتكسر او يتخرم
فلازم الصينية الي احطه فيها تبقى نوعيتها نضيفه جدا وتقيله..بحيث مايلزقش فيها
لانه لو اتخرم من تحت يبقى خلاص...الواحدة دي مش هتنفع تتقدم
تاني حاجه...وانا بعمل الشوكلاته لو هسيحها ف المايكروويف
ماعليش الحرارة اوي
عشان ماتنفصلش الدهون عن الشوكلاته وبكدا تبقى طعمها متغير ومش ظريف
تالت حاجه:
الكريمة الي عملناها لو بنعملها في حلة من الي بتلزق اخد بالي اقلب كويس عشان ماتلزقش
ولو لزقت اخد بالي اني وانا بشيل الكريمة ماخدش من الطبقة الي لزقت عشان الطعم مايغيرش
رابع حاجه :)
لو بلح الشام برد وحابة تسخنيه لاي سبب...ياريت بلاش لان حتى لو سخنتيه ف المايكروويف هيطرى
خامس حاجه :)
انا استخدمت نفس النوزل لبلح الشام والاكلير
ومع زلك انتو شايفين فرق الحجم...ف العجينة نفسها مش بعد السوا
ازاي بقى؟
وانا بعمل الاكلير كنت بضغط زيادة ف نفس المكان عشان العجينة توسع شوية
وهي اساسا بتنفش فكبرت
انما ف بلح الشام كنت بضغط واقطع على طول
فبتطلع بالحجم الاساسي بتاع النوزل...وبردو هي بتنفش بعدين
انا كدا اكون خلصت...يارب يعجبكم الوصفات
واتمنى لو عجبتكم تدعولي ربنا يحقق لي الي بتمناه
ولو اي حد له استفسار انا موجوده :)
في أمان الله
