اني عمري 19 ومتزوجه صار لي سنه وعندي بنوته عمرها 4 اشهر تزوجت بعد قصة حب الحمد لله عايشه مع زوجي ومرتاحه وااجد ومعاملته لي واجد زينه وطيب وحنون ومو مقصر وياي بس المشكله اهله اني ساكنه وياهم في حجره وحده وعندي حمام وانتو بكرامه الخاص واهله كانو عادي وياي اقعد وياهم واكل وياهم واطلع وياهم كل شي اسوي كنت اقول لهم عنه كنت راضيه اعيش في حجره وي زوجي واني مرتاحه وياه وي اهله ميخالف بس عقب ما ولدت بنتي صرت في بيت امي شهر ورجعت عقبها بس شهر بعد صارت مشكله بيني وبين حماتي الكبيره اهي عندها بنت توها مكمله سنه وكنا نأخذ لبنتها وبنتي نفس اللبس وصارت مشكله تافهه بسبت هالسالفه معنى اهي كبيره بس تفكيرها مال جهالو المهم اني قلت الى زوجي ان عمتى الا اهي امه بتتغير عليي لان كل تقعد وي بنتها واكيد بتغيرها عليي ومن تقريبا اسبوع صار كلام بين زوجي وامه وقامت امه وقالت لنا انها ما تبغينا وياه لا نأكل ولا شي ولا تبغي تشوف بنتا انتو شفتون جده ما تبغي تشوف حفيدها اصلا بنتي ما ليها شغل بسالفه واهي بعدهي صغيره ما تفهم !!
مسامحه طولت عليكم بس اني اختصرت لكم اشياء وواااجد ما قلتها عن حمواتي الباقي الا اهم خوات زوجي اهم ما شاء الله 6 4 متزوجات والخامسه قريب بتنخطب والسادسه صغيره بس اهم ع طول في بيت عمي قاعدين ويسوون المشاكل
عاد من صارت السالفه وزوجي يدور شقه عشان نطلع بروحنا والحمد لله حصلنا ونهاية هالشهر بنطلع !!
بس بعد اني محتاره لان حبيتهم واعتبرت عمتي نفس امي احبها وما كنت اتخيل ان بطلع عنهم لان تعودت عليهم
انتون اشرايكم في السالفه اطلع بروحي ولا اظل وياهم واتحمل المشاكل معنى زوجي يبغي يطلع لان تعب من مشاكلهم حتى ابوه ما يحبه تدرون ان ما حمل بنتي الا مره وحده اول ما ولدت!!
شوورو عليي خواتي واني ما ابغي زوجي يقطع امه مهما كان اني وبنتي ما تبغي تشوفنا خلاص ما بنخليها تشوفنا ولكن ولدها بعد!!
مسامحه ع الاطاله عورت راسكم
انتظر ردودكم ومشورتكم
