أحنا كنا مقررين بس أولد بالسلامة وقبل لا رجع الدوام أشوف لي سفرة على الطاير أغير فيها جو.. ولكن ولدي كان بيموت خاطره في ماليزيا كل ماشاف صورنا أنا وأبوه قال ماوديتوني...وقلت يله دام أحنا بنخسر نروح مكان الولد يستانس فيه ويغير جو والأهم أنه بلد نظيف وإسلامي يعني الأكل حلال..
المهم بالأخير قررنا نحجز لماليزيا وجلسنا أنا وزوجي نسوي الحجوزات على النت.. ماصار ساعة رحنا بيت أهلي نتغدى مع الجماعة الا يقولون كا أعلنوا في الجزيرة ظهور أول حالة إصابة بالمرض
.. واي أنصدمت قلت شهالقرادة من أولها.. (والحين حتى فريجنا يمكن فيه)المهم قلت لزوجي ماراح نلغي شي ونتوكل على الله وجدامنا شهر لموعد السفر إذا صار تطورات خلاص نلغي الحجوزات وأمرنا لله ...
السفر مساءا 5/6/2009
الخطوط: طيران الإتحاد عن طريق مطار أبوظبي
الوصول: ظهرا 6/6/2009
أترككم الحين مع الصور.. وقولوا ماشاء الله على عبدالله..
هذي صورة كوالالمبور من الطيارة وصورة للمدرج... وبعدها عبودي بالمطار وهو حاط الكمامة...
أخذنا تاكسي المطار أول ماتطلعون من بعد الشنط تلاقون مكتبهم تدفعون وبعدين يعطونكم الرصيد وتطلعون وتشوفون تكاسي الشركة واقفين (70 رنجت لسنواي لاجون)..
أتجهنا مباشرة لفندق سنواي لاجون Pyramid Tower وبسرعة خلصوا إجراءتنا وماقصروا عطونا حجرة تطل على البارك مباشرة كان منظر ولا أروع (الغرف شوي صغيرة أحنا لما رحنا أنا وزوجي من قبل أخذنا السويت وايد كان أحلى وأوسع وبالمطبخ والصالة والبلكونة) المهم أهم شي تكون نظيفة... وهذي صورة للغرفة وصورة لمنظر الغرفة..
أول يوم قضيناه بالمجمع وعبودي لعب بالألعاب...
اليوم الثاني.. من الصبح تفطرنا ومباشرة على البارك وأخذنا التذاكر حق 3 باركات الألعاب والحيوانات والماء... وهذا عبودي في ال WildPark وبعدين في ال Water Park...
وبعدها تغدينا في الطربوش بداخل المجمع بس قعدته برع تطلع على البارك...
