طريقتي في العناية بأيدي واظافري .... اتفضلووو :)

السلام عليكم ورحمة الله وبركاتة

ازيكم ياقمرات ؟؟ يارب يكون الجميع بخير

حبيت اعرض عليكم طريقتي المتواضعة في العناية باظافري وبأيدي عل وعسى تستفادو ولو بالقليل

مبدئيا انبه على ان الضوافر عشان تكون صحيه وقويه لازم من شرب اللبن او اكل اي حاجه من مشتقاته انا بعشق الجبن بجميع انواعها واللبن والبيض عندي واجبه اساسيه في العشا فا حاولي انك تدخلي الالبان ومنتجاتها ضمن وجباتك اليومية عشان تكون ضوافرك حلوة وجميلة

تاني حاجة هي جوانتي المطبخ دا من اهم الحجات اللي بتحافظ على طرواه الايد وصلابه الضوافر يعني ممنوع تغسلي مواعين او سجاجيد او اي مهام بتستلزم ان ايدك تفضل في مايه فتره طويلة الا لما تكوني لابسه جوانتي المطبخ عارفة انه في الاول صعب وهتحسي انك مش مالكه الحاجه لكن واحده واحده هتتعودي عليه لان مهما كان الاهتمام بالايد طول اليوم هيضيع مع غسيل مواعين او سجاجيد وخلافه

تالت حاجة الترطيب .. بعد كل مره بتغسلي او تبلي ايدك لازم تحطي كريم مرطب وتدلكيه كويس ومش تبخلي على ضوافرك و الجلد حواليها بالتدليك عشان تستفاد بالتغذيه والترطيب وبلاش كسل في الموضوع دا خلي في المطبخ او الحمام جمب الحوض علبه صغيره من كريم او لوشن الايد وبكده هيكون ادامك طول الوقت وعلى فكرة لو دوامتي عليه فترة مش هتقدري تستغني ابدا عن العاده دي انا بقيت اتوماتيك كده اول لما ايدي يجي عليها مايه اجري احط كريم

رابع حاجه هي الصابون ... عودي نفسك تستخدمي الصابون السائل في غسل الايد عن الصابون الصلب بيفرق جاااااااااامد وعن تجربه انا استخدمت صابون كتير لوكس كاميه فا ديتول وغيره وغيره بس السائل بيكون احلى 100 مره مش بيشد الجلد ولا يجففه و ممكن تجيبي شاورات ماي واي او كامينا وتفرغي منها في علبه شامبو او بامبر فاضيه وتستخدميها في غسل الايد هتحسي الجلد ناعم زي الحرير وبعد فترة لو رجعتي للصابون الصلب هتحسي اد ايه كنتي بتظلمي ايدك وعن تجربة

ال 4 حجات دول اهم بكتييييير من اللي جاي هما اساس الايد الناعمة والضوافر القوية الصحية

منتجاتي في العناية بايدي






1- صابون سائل للايد من كامينا

زي ما قلت فوق الصابون السائل افضل كتير عن الصلب والصابون دا جميل جدا وبتاع لوكس برده حلو اوي ولما بيخلص الصابون من عندي باستخدم الشاور جل مؤقتا على لما اجيب سائل جديد

2- لوشن ميلك اند هني للايد

افضل لوشن ايد استخدمته متوازن جداا لا هو خفيف ماية ولا تقيل ومدهنن مجرد ما احطه على ايدي وضوافري وادلكه الاقي الجلد اتشربه تماما وايدي طريه جدا ماشاءالله

3- كريم الكشمير من اوريفليم ( نسيت احطه مع المنتجات ) بخليه معايا بالشنطه ولازم يكون معايا كريم ايد ومناديل مبلله وانا برا البيت والكريم جميل وترطيبه هايل ماشاءالله

كريم افون ريتش موستريس دهني شوية بستخدمه في الشتا

4- مقشر شهر العسل من بنت عذاري ( موجود بالصورة هو علبه الحلاوة الطحينيه ههههههه )

افضل سكرب استخدمته لجسمي بشكل عام رااااااااائع بكل المعاني نعومة تخبل وجلد طري حاجه جنان بصراحة واللي مش عارفة طريقتة دا الرابط بتاعة
http://forums.3roos.com/t259667.html

5- ماسك الضوافر الطبيعي ( العلبه الصغيره )

الماسك دا مهم خالص عبارة عن زيت زتون وزيت لوز بنسب متساويه و كام نقطه لمون عليهم بدهن بيه ضوافري قبل ما انام بيحافظ عليها من التشقق والتصبغ و بيخلي سطحها ناعم جربوه وهتدعولي

6- شنطة البديكير والمانيكير يلا نفتحها ونتفرج على الحجات اللي فيها










- قصافة الضوافر
- مقص الزوائد الجلدية
- مبرد الضوافر
-اسيتون
- ستيكرات كريستال
- مبرد تاني فيه وجوه للتلميع وتسوية سطح الضفر
- خلات اسنان ( استخدماتها كتير لازاله الجلد حول الضوافر وكمان في رسم المانيكير لانها بديل للفرش الرفيعه والتحكم فيها افضل كتير)
- قطن
- البيس كوت
- بلاستر طبي مدور للفرنش ( موجود بالصيدليات )
- فرشة خاصه بالقدم فيها 4 اوجه فرشه و مبرد كعب وحجر خفاف و اداه ازله الجلد الميت

-مانيكيراتي














طريقة عمل البديكير

البديكير خطوه مهمة اوي بنقوم بيها مره في الاسبوع ومش لازم يابنات نروح كوافير انتي بسهوله ممكن تعمليه في البيت وهيكون احسن واضمن وهتعمليه بزمه عن ما الكوافيره هتعمله

1- هتجيبي اناء وتحطي فيه مايه سخنة على اد ما تقدري تستحملي حرارتها وتضيفي عليها شوية شامبو او شاور جل او صابون سائل للايد اي حاجه متوفره واعصري في المايه لمونه

2- حطي ضوافرك كامله في الاناء وسبيها 10 دقايق

3- بخله الاسنان براحة اوي هتزيحي الجلد اللي حوالين الضوافر هتلاقيه بيطلع بسهوله لان المايه الدفيه خلته طري

4- هتجيبي اي سكرب عندك وانصحك بمقشر شهر العسل وتحطي منه في كف ايدك وابدأي افركي ايدك أكنك بتغسليها استمري في الفرك لحد ما الاسكرب ينشف من الايد ويختفي اثاره

5- بعد ما بتخلصي تقشير هتغسلي ايدك و تبردي ضوافرك بالمبرد وتظبطي شكلهم وتدهني ايدك بكريم تقيل و ترطيبه عالي ومش تنسي تدلكي ضوافرك بالكريم كويس ونامي وشوفي الصبح النعومة والجمال اللي في ايدك

على فكرة اللي ضوافرها ضعيفه ضروري تغلف التدوير بتاع ضوافرها ببيس كوت او ملمع شفاف هيحميها من التشقق و التكسر ... مرري بس فرشه البيس على تدوير حواف الضوافر وسبيه ينشف

داومي على البديكير مره واحده في الاسبوع بجانب الملاحظات اللي قلتها فوق وفي خلال شهر واحد هتشوفي الفرق عامل ازاي وهتدعووولي

بالنسبة للعناية بالقدم شبيهه كتير بالعناية بالايد وفي موضوع انا استفدت منه جداا وهو للقمر ساره افندي اكيد هتستفيدو منه من هناااا

http://forums.3roos.com/t456535.html