انا كنت ناوية استنى على ماعمله تاني لأني نسيت اصور بعض الخطوات
بس قلت انزله وخلاص واستحملوني بقى...:D
عشان خاطر لوتس حبيبتي
المقادير:
كوبايتين دقيق
معلقة خميرة جافة...ونفورها بمية دافية او حليب دافي
حليب دافي للعجن
رشة ملح
معلقتين سكر مطحون
حوالي ربع كوبايه زبدة
بنجيب وعاء ... ونحط فيه الدقيق والملح والسكر ونقلبهم الاول
ونضيف الزبدة
وبعدين ضفت عليه الخميرة وعجنت
هنا بقى نشوف العجينة عايزة ايه؟...لو بتلزق ف الايد يبقى ناقصها دقيق..
لحد مانوصل للقوام المناسب الي هو ان العجينة تبقى كرة متماسكة وتلم كل الاجزاء الي في الطبق الي بنعجن فيه والي لازقة على ايدي
ونسيبها تخمر...لحد ماتتضاعف
بعد ماتخمر...نجيبها...ونرش السطح الي هنعمل عليه بالدقيق
اكون محضرة جنبي طبق فيه زبدة طرية...مش متسيحة..لا طرية اسيبها تتطرى بس
ومعايا فرشه
اعجن العجينة تاني...وبعدين افردها بالنشابة على شكل مربع...وادهنها بالزبدة واطبقها 3 طبقات وافردها تاني بالنشابه
وبعدين اكرر نفس الي عملته...بس اعكسها
يعني اقلب العجينة بدال ماكانت بالطول اخليها بالعرض...وادهن زبدة واطبق وافردها تاني بالنشابة
واكررها
اكتر من مرة لان تكرار الدهن بالزبدة والفرد ده هو الي بيعمل الطبقات جوه
ولما اخلص اطبقها واسيبها ترتاح ف التلاجة شوية
حوالي نص ساعة او ساعة
وبعدين طلعتها...فردتها مستطيل سمكه متساوي...حوالي نص سنتي او سنتي
واكون محضرة في طبق جنبي القرفة مخلوطة بالسكر
ادهن العجينة بالزبدة...وبعدين احط عليها القرفة بالسكر...احط كمية كويسة ماستخسرش فيها حاجه :D
وبعدين الف العجينة زي السويسرول كدا....واقطعها حلقات بسكينة حاده...ويفضل سكينة الخبز الي هي مشرشرة عشان اللفة ماتتفكش
وارصها جنب بعض في الصينية
وبعدين اسيبها تخمر شوية...وطبعا الفرن يكون سخن من فترة
احطها في الفرن...على درجة حرارة متوسطة الى مرتفعة...حوالي 200 او 220
ولما تستوي لو حبيت ممكن افتح الشواية عليها شوية من فوق
نحضر الصوص بقى...
بنجيب حوالي نص كوباية حليب...3 مكعبات جبنة كيري...نص كوباية سكر...ونخلطهم مع بعض هتعمل جليز سايل شوية...نلاحظ هنا ان مانخليهوش مسكر اوي يعني ممكن نقلل السكر هنا لان العجينة نفسها فيها سكر والحشوة بالقرفة والسكر...فلو عملتها مسكرة اوي مش هعرف اكلها
واصبه عليها...وبألف هنا وشفا
وادي اول طبق...شوفوا الطبقات من الجنب...بس للاسف مش باينة اوي
وان شاء الله هعيدها تاني واصورها كويس وبالتفصيل
بس مستنية ارائكم ودعواتكم
وبعدين تقييماتكم :)
