شحالكن ؟
عساكن بخير
اليوم بشارككم بأول لوك لي .. هاللوك سويته لما كنت معزومة عند ربيعتي وكانت العزيمة ثالث يوم العيد
اول شي نظفت بشرتي وريحتها فترة من الميك اب .. ورطبتها بمرطب لوريال .. وايد حلو وخفيف ع البشرة خاصة ان بشرتي دهنية
وتركتها 10 دقايق لين ما البشرة تمتص المرطب .. وما حبيت احط كونسيلر ثقيل فأستخدمت كونسيلر مكياجي .. خفيف وتغطيته حلوة
وبعد ما حطيته تحت عيوني .. استخدمت بودرة مضغوطة من بورجوا
هالبودرة رووووووووووووعه .. تغطيتها وايد حلوة واحس انها اكثر بودرة ناسبتني .. وزعتها على ويهي وعلى رقبتي عسب ما يبين فرق فاللون بين الويه والرقبة
بعدين بالفرشاة حددت حواجبي بالشادو البني وتعمدت يكون خفيف شوي
بعد الحواجب انتقلت للعين
استخدمت باليت مكياجي ( رينبو ) ... بديت بالشدو الابيض اللي عليه رقم 1 نحط بالفرشاة تحت الحواجب ومديته شوي لتحت للزاوية الداخلية للعين
بالشدو رقم 2 الوردي حطيت منه فالزاوية الداخلية للعين ومديته على الجفن المتحرك لين نص الجفن
بالشدو رقم 3 البنفسجي اوزع الشدو على الزاوية الخارجية عند عظمة الجفن الثابت بس انتبهوا اني ما نزلت وايد يعني ركزت على العظمة
بالشدو رقم 4 الاحمر خذت بالفرشاة شي بسيط وحطيته بين الشدو الوردي والشدو البنفسجي ودمجت من بينهم
وآخر شي بالشدو رقم 5 البنفسجي الغامج استخدمت الفرشاة المايلة ونحدد من تحت العين بس نحاول نعرض التحديد ومديته لين آخر العين ودمجته مع الشدو البنفسجي الفاتح اللي استخدمته قبل
بعدين حطيت شدو وردي مايل للأحمر وفيه لمعه حلوة بين الشدو الوردي والبنفسجي و موهته ودمجته مع الشدو الاحمر
وهني يبين اللون اوضح
بالشدو الاسود من مكياجي حددت العين بالفرشاة المايلة من تحت من عند منابت الرموش ودمجته مع الشدو البنفسجي
الحلو في هالشدو ان سواده فاحم وينفع وايد للوك السموكي .. خذته من مجموعه بلاك آي من مكياجي .. ما استغنى عنه ابداً
وبعدين حدت العين من فوق بالآيلاينر ( اسمحولي نسيت اصوره ) ومديته لين فوق شوي مثل مارلين مونرو .. وبالفرشاة المايلة مرة ثانية مديت الشدو الاسود اللي حددت فيه العين من تحت ووصلته لين الآيلاينر ودمجته معاه
وكحلت عيني بكحل مكياجي اللي بعد ما استغنى عنه
وبعدين حطيت مسكارا للرموش العلوية والسفلية وحاولت اكثفها .. وماسكرا مايبلين رووووووووعه بكل معنى الكلمة
وبفرشاة الخدود حطيت البلاشر على الخدود ... وبعدين بشكل خفيف حطيت بودرة بالاسفنجة على مكان البلاشر عسب يطلع خفيف وطبيعي .. ويكون البلاشر لونه عنابي خفيف
ننتقل للشفايف . أول شي حطيت مرطب الشفايف
وبعدين حطيت روج ماخذته من بودي شوب .. رووووعه وطعمه يجنن .. وبشكل خفيف نحط غلوس من ريفلون .. هالغلوس يجننننننننننن كل ما يخلص ارجع آخذ نفسه
هني عسب يكون اللون اوضح
وبعدين استخدمت بدل البودرة الحرة .. بودرة من نيفيا .. خفيفة وحلوة وحطيتها تحت العيون
وآخر خطوة فالميك اب نحط الجليتر .. انا حطيته تحت الحواجب .. لمعته واااايد حلوة و خفيفة وما اطير بسرعه .. هذا احلى شي فيها
وهذا رسم تقريبي للوك النهائي
بعدين استشورت شعري وسويت بف خفيف من ورا .. وهذي صورة تقريبيه لشعري بس شعري شوي اقصر ولونه اسود
وحطيت هالطوق عشعري
ولبست اكسسواراتي اسمحولي ما صورتهم لأن اختي ماخذتهم
وبالاخير لبست بدلتي الوردية
ولبست عباتي السوارافيسكي .. الكم فرنسي وطويل ومبطن بساتان ووايد حلو فاللبس .. يعطيج فخامة
وهني صورة اقرب لديزاين السوارافيسكي اللي فالعباية ونفسه فالشيلة
وبهالشكل خلصت من لوكي
ان شا الله يكون عيبكم .. الصراحة هذي اول تجربة لي فشرح لوك ..وان شا الله اكون توفقت فهالشي
انتظر رايكم .. واذا عيبكم لا تنسون التقييم
