شخباركم خواتي ..؟؟
عساكم مرتاحين و طيبين دوم يا رب
طبعا اليوم فظيت .. احم احم ..
وقلت خلينوا افيد خواتي .. اللي قاعدين يبنون بيوتهم ..
و اللي قاعدين يشطبون .. بنصايح خفيفة يمكن راح اتفيدكم
و اللي عندها اي نصيحه او افادة .. حياها الله ..
قبل كل شي ..
احب اقول .. قصيدتي الحلوة ..:o
اللي بنت بيتها و سكنت فيه- اقوللها - عساه بيت عامر :cool:
و اللي قاعده تبني - و تعاني شراتي - اقوللها - شدي حيلج :ss:
و اللي تتريا البيوت الجاهزة - اقوللها - ان شاء الله يعطونكم البيت في اقرب فرصة:)
و اللي ساكنة مع أهل زوجها - اقوللها - شدي على ريلج شوي - ورمسيه و عن الهيازة (6)<< في كل شي اتدخل
طبعا اللي ما دخلت موضوعي الأول ..
حياها الله ..
هذا هو الرابط ..
http://forums.3roos.com/t458547.html
أول شي ببدأ بالأبواب .
طبعا عشان يطلع البيت حلو و متوازن ..
اختاري ابواب البيت الداخلية كلها نفس اللون و نفس الشكل ..
صدقوني ان البيت راح يطلع مرتب و كلاسيك..
لأني استغرب من بيوت .. باب غرفة الاطفال غير .. و باب الخدم غير ..
و باب الغرفة الرئيسيه غير .. صدق .. مب حلو يطلع المنظر ..
تقدرون تغيرون ابواب الحمامات .. و تخلونها ساده .. لأنها تكون داخل الغرف ..
و باب الحمام - عوزكم الله - تختلف مواصفاته عن باب الغرفة ..
باب الحمام لازم يكون من النوعية اللي تتحمل الرطوبه و الماي ..
لأن أغلب البيوت ابواب الغرف تكون في الصالة .. يعني في نفس المكان..
و للعلم .. اقل باب سعره 1200 درهم اماراتي .. يعني يكون من الزين ..
و لا تاخذون صيني قوم ب 400 و 600 درهم .. لأن الخشب ماله ظعيف و رديء.
منطقة الاستحمام
اغلب البيوت حاليا قامت تخلي هالنوع من الشاورات ..
اللي شرات الكبائن .. لأنها تعطي مساحة أكبر للحمام ..
و اللي بتختار .. انصحها انها تختار الزجاج .. مع اني من البداية ما كنت مقتنعه من الزجاج .
و خفت انه يتكسر من الحرارة ..
و عقب اقتنعت بالزجاج .. لأن البلاستيك المقوى .. يتأثر بالحرارة ..
و يوم بتاخدون الشاورات .. اتأكدوا من متانه الزجاج .. و ما يكون خفيف ..
يعني ما يكون اقل من 6 مل.
و خدوا من المحل ظمان .. ضد التأثر بالحرارة .. عسب اذا انكسر من الحرارة ترجعونه..
wc
حاولي فد ما تقدرين ان الاشياء اللي بتكون في الحمام ..
تخدم مستخدمي الحمام ..
مثلا .. انا مركبه wc صغير في حمام الأطفال ..
لأني حسيت ان بيخدمهم .. بدال ما اتمين ماسكتنهم او انهم يحطون كرسي عسب يقعدون
خزائن الملابس
احرصي انج تقسمين خزائن الملابس بعد تفكير عميق ..
يعني قسمي على حسب احتاياجاتج و احتياجات زوجج..
و سوي مكان حق سدات الملابس الداخلية .. و حق خزانه الذهب ..
و احرصي ان الارتفاع من داخل يكون مناسب لطولج و طول زوجج..
عسب ما تتكسف كندورة ريلج او عباتج لأن المساحة الداخلية صغيرة ..
او الارتفاع قصير ..
و فوق .. سويلج مكان واسع حق الشراشف او المخدات و اللحافات..
السلم أو الدرج
حاولي قدر ما تقدرين انج تنسقين في اختيار جرانيت او رخام السلم مع ارضية الفيلا
و مقبظ الدرج .. اختاريه من النوع الثجيل .. عسب يركز عدل و ما يتهزز..
و في النهاية .. اختمها ب كلام حلو ..
شوفوا .. ترى هذا تهديد بسيط جدا جدا ..(6)
اذا [COLOR=magenta]ما قيمتوني .. ذاك التقييم الحلو الغاوي ..(y)
ما بنزل ولا صورة .. حتى صورة قطو ما بنزل ..<< اوني - اعرف اهدد بعد ..:wink:
اسولف ..
انتظروني في باقي مواضيعي عن البيت
اختكم ..
(f) قصايد دبي (f) [/COLOR]
