ازيكم ياأحلى بنات
عملت من كام يوم الدوناتس وفرحت اوي اوي انها طلعت مظبوطة جدااااا
شوفوها واحكموا :)
المقادير:
بيضة
خميرة..لو خميرة بيرة اعملي مثلا نص القطعة الي بتبقى بربع جنيه دي
لو فورية ممكن معلقة مثلا منها
وانا عملت بخميرة بيرة
لبن دافي حوالي ربع كبايه
حوالي ربع كباية زيت
اربع معالق سكر للعجينة نفسها...
دقيق بقى على حسب ماتاخد معاكي....انا بدأت بكوبايتين لكن لان المية الي فورت فيها الخميرة كانت كتير احتجت ازود كمان لحد مابقت متماسكة
المهم ف الاخر ان توصلي لقوام يتفرد معاكي ومايمسكش ف ايدك خالص
ولو بتعجني ف طبق عجين هتلاقي كل العجين اتلم مع بعضها ومش لازق نهائي ف الطبق
للاسف نسيت اصوره بس بجد كان طالعه جميل اوي
بتسيبيها تخمر لحد ماتتضاعف
بعدين بنرش السطح الي هنعمل عليه دقيق وهنا في طريقتين
الطريقة الاولى اني اكور العجين كور صغيرة وبعدين ابططها واخرمها من النص او اسيبها كدا
والطريقة التانية الي انا عملتها ...فرد العجينة كلها بالنشابة وبعدين ماكانش عندي قطاعة الدوناتس...فجبت كوباية وغطا ازازة
بقيت اقطعها دواير بالكباية
وارجع اخرم الدايرة بغطا الازازة :)
الجيش بيقولك اتصرف هههههههههههههههه
وبعد مانقطعها نسيبها تخمر تاني
هتلاقيها رفعت كمان
وعليت كدا
بجيب الزيت بسخنه الاول وبعدين اوطي النار
واحط فيها الدوناتس
نلاحظ هنا حاجتين
اول حاجه...مانزحمش الطاسة بعدد كبير من الدوناتس لانها بتنفش
تاني حاجه... نقلبها كل شوية عشان لو ناحية استنيت عليها على ماتستوي وبعدين قلبتها هتشقق من النص كدا ويبقى شكلها مش سمووث كدا
فمش لازم نستنى على كل جنب لما يستوي
اقلبها كل شوية احسن
تالت حاجه نطلعها وهي فاتحه شوية لان بعد ماتبرد بتحسيها اغمقت كمان شوية
اه وحاجه كمان...نطلعها على مصفاه عشان تصفي الزيت لو فيها عشان ماتبقاش تقيلة
بعد كدا بنكون محضرين التزيين بتاعها
وادي طرق مختلفة للتزيين
اول حاجه جليز السكر
بتجيبي 3 معلقة حليب كبيرة على 3 كباية سكر مطحون وتخلطيه جامد ...هتلاقي السكر بقى سايل كدا
ونحطه في طبق او حاجه
واول مانطلع الدوناتس من الزيت نغمسها فيه من جهة ونقوم عادلينها على طول وحاطينها على الطبق عشان الجليز ينزل كدا منها ويعمل شكل حلو
وشوية وهيجمد عليها ويبقى جميل اوي
الطريقة التانية
صوص الشوكولا
في طريقتين
الاولى الي انا عملتها...جبت شوكولاته خام وسيحتها ف المايكروويف...وبعدين ضفت عليها حليب وماحبيتش اضيف زبدة لان الدوناتس مقلية ف الزيت فكفايه دهون
وبردو نحط الدوناتس فيها سخنة
التانية ... بتجيبي زبدة تسيحيها على النار بس تاخدي بالك مش تغير لونها
يعني مش تستني لحد ماتتلسع
وتحطي عليها كاكاو...وتقلبيه وتضيفي لبن لحد ماتوصلي للقوام الي عايزاه
القوام يكون تقيل شوية عشان يلزق على الدوناتس
بعد مانعملها بالشوكولا ممكن نرجع نحطها في فورماسيل سواء شوكولا او ملون
كان عندي بس نسيت اصوره :o
بس بجد طلعت زي الجاهزة بالظبببببببط
دي صورتها من الجنب عشان تشوفوا ازاي هشة
وادي اول طبق :) لاجمل بنات
مستنية رأيكم كوووووولكم
