وأخيراً نفسيتي خلتني اكتب قصة ولادتي (الجزء الثاني)

يله خلينا نكمل هالقصة......

المهم وصلت لما قعدت مع الكل وشرب قهوة ...وعدا الليل وصارت الزحمة تخف وقعدت انا امي لحالي وكانت حتبات معاي قلت لها لا تباتي روحي نامي وبكرا تاليلي بدري عشان حيمشوني شوي وبروح احاول ارضع ((هياتي)) وطول الليل السرير نسيوه مرفوع وانا في وضع شبه جالسة رنيت على الممرضات كانت الساعه 2 الليل مافي حد سمعني والغرفه مسكرة والجرس عطلان ورقبتي وجعتني شوي بس قلت يله هانت احنا قربنا الصبح.. جاء الصبح على خير وكلي شوق اشوف بنتي ...واتصلت ف امي تعالي تعالي وإذا بها تقولي انا في الطريق ...وفي نفس الوقت جات صديقتي الي بالصدفة تشتغل قرب العيادة ووصلها مسج ولادة هيا وجات تشوفني...

حاولت امي وصديقتي يوقفوني ويمشوني نزلو رجليا الأول للأرض ..بعدين جلست إذا بيا احس بصداع غريييب وفجأ دون سابق انذار
وكلها 30 ثانية وزاد الصداع وسرعان ما بديت اصرخ واقول لا يا ماما صداع غريب غريب راسي فيه شي امي قعدت تسمي وتقول شفيك اقول راسي يا ماما كأن فيه قنبله بتتفجر وقالتلي حاولي توقفي قلت رجليا ميته ما احس بيهم تقولي ماما يله يا بنتي بلا دلع اقسمت والله يا ماما ما احس بيهم
ووقفتني غصب وإذا بيا احس كأن في ماي باردة نازلة من راسي إلى رقبتي ووصرت اصرخ ولميت الناس واشوف الممرضات اخر شي واغمى عليا
مجرد صحيت قلت لأمي ايش صاير ...تقولي والله ماني عارفه شفيك حاولنا نقومك اغمى عليك
قمت قلت ماما خليني احاول ثاني صار الظهر بروح اشوف بنتي...رفعت امي السرير وصار الصداع يرجع كل مارفعت السرير زيادة
تصدقو والله من قوة الصداع صارو عيوني حمر ...واسمع طنين في اذوني كأن في مدفع في راسي وصار راسي يرجف لحاله كأن فيا حالة صرع ((اللهم اعفينا))
وبمجرد يسطحوني يروح الصداع ....طلبنا الدكتور وسألني على الأعراض وراح من دون ما يقولي ايش فيني ومارجع الدكتور طول ذاك اليوم
ثالث يوم احاول احرك رجولي وانا راقدة تتحرك عادي لفوق وتحت بس مجرد ما اقيم نفسي شوي تموت فيني كل الحركه ويجيني صداع غريب كأني لميت كل صداعات العالم في راسي
وجاء الدكتور وصارحني ...أتذكر كانت معاي اختي وبس...قال بكل برود حالتك يا شيراد تحدت مرة كل ألف مرة وهي عبارة لما طلعنا منك ابرة البنج من ظهرك طلعت معاها نقطة دم وهاذي النقطة المفروض ما تطلع وعطلت لك العصب الحسي ...سألته والحل: قال الحل نستنى خمس أيام لو مارجعتي لطبيعتك حنسويلك عملية نرجع فيها نقطة الدم
انا لما سمعت الكلام إنهرت وأختي انصدمت وطلعت مع الدكتور واسمعها تصرخ عليه وتهاوشه
طبعاً انا نفسيتي تعبت اول شي طلبت اشوف بنتي وانا في السرير وبدت عندي رحلة العذاب ...ركبولي قسطرة لاني صعب ادخل الحمام أكرمكم الله وبطني انتفخت من الغازات عطوني حبة تطرد الغازات وصارو يلبسولي حفاضات وجاني إسهال واختي تعبت وياي كل ربع ساعه تغيري حفاظ وشوفو نفسية الوحدة لما تكون قوية وتدخل على اساس بتولد وتوصل لدرجة صارو يغيرون لها حافضات....ولمدة خمس ايام كل يوم يجيني دكتور شكل والكل يجمع انها تحدت مرة كل الف مرة والعملية خطيرة في هاي الحاله ... صرت ابكي بصوت عالي واقول لخواتي يا خسارة ما بشوف بنتي وانا بصحتي ...بنتي الي حلمت فيها راح تشوف ام كسيحة...صرت اقول لماما سقطت اربع مرات وتحملت ادوية وأبر وفترة حمل عصيبة وفي النهاية ما اقدر حتى ارضع بنتي ودموعي نازلة وصرت استغفر وابكي ....وكل شوية تصيبني حاله ويضطروا يهدوني بالإبر
جاني دكتوري الي ولدني ((جزاه الله خير)) ولولا الله ثم هو ماعرفو ايش فيني ...قالي يا شيراد ياليت الخطأ صار مني ...عمليتك على احسن حال وجرح العملية ممتاز وبنتك في ألف خير الغلط خارج إرادتي بس بسويلك تحاليل كاملة يمكن اقدر اتوصل لحل لحالتك ...بس طلب مني احاول ارضع بنتي ...طبعاً انا متسطحة لمدة 15 يوم ما اقدر اقيم راسي حتى لأن في هالحاله الصداع راح يدبحني
واختي وامي كانو يطلعو صدري ويحطو (هيا) فوقه لعلها ترضع بس يا عيني بنتي ما تقدر وصارو يشفطولي الحليب ويرضعونها بس الوضع صعب عليهم صارت معظم الوقت ترضع من الحليب الصناعي ...وانا في الحاله ركبت لي الحراره وصخنت وصارت حرارتي 41 شفت الموت
((حرارة ...وإسهال...وشلل)) يا سلاااااااااااااااااااام
صارت دموعي ما توقف بس اقول الحمدلله...خواتي اشوف عيونهم متورمة مايقدرو يبكوا قدامي بس يطلعو من الغرفة يبكون واسمع صياحهم
واقول ايش فيني قولولي حنشل خلاص حصير مقعدة؟؟؟
بعد 15 يوم توصلو ان الي عندي إلتهااااب حاااد في العصب الحسي ...وهني ابتدأ العلاج مضادات حيوية قوية كل 6 ساعات في الوريد إضافه إلى البندول في الوريد وكان كل ما تخلص جرعه البندول عبارة عن 100 مل يزيدوني الثانية 3 أيام وانا على هالحاله اشوف بنتي بس ربع ساعه في اليوم واحاول اشفط الحليب وبس

بعد 3 إيام صرت اقدر اقعد على السرير من دون صداع ....بس فني دوخة اما مشي ما اقدر جابولي دكتورة علاج طبيعي وداومت معي لعند ما صرت اوقف صرت امشي بالكرسي المتحرك اروح لهيا في الحضانه ...وصارت بنتي اول بنت في العيادة تطول فترة طويله
وشوي شوي بدلت خطواتي
واللحين اقدر امشي بس بشوي ما اقدر اهرول ولا اقدر اقوم بعمل البيت زي اول والسياقة صارت بصعوبة بالغه ...حتى حمام بنتي للحين امي وخواتي يحمموها ..(الحمدلله على كل شي ))
بس ابيكم يا جماعه تتعضو لعدة اشياء
1- أن الألم لابد منه في الحياه ياليت تحملت فك الربط من الرحم ولا الجحيم الي شفته وأن الألم عبارة عن كفارة
2- المفروض لما طلعت من غرفة العمليات بلاش الدوشة والناس المفروض تسطحت وقعدتي غلط في غلط هي الي ساهمت في نقص الأكسجين في راسي ومن ثم إلتهب العصب الحسي
3- تعلمت ان كل حد في الحياه مهما كان قوي وما يصعف حيجيه يوم ربي يحطه في اختبار إيمانه
كان صعب عليا اشوف نفسي مشلولة ويغيرون لها حفاضات وكل هالآلم ....بنتي الي كنت عشانها بغيت ابرة الظهر عشان اشوفها اول وحدة .....مع الي صار لي شفتها بعد 3 ايام شفتو كل تراتيبي الي قمت بيها ما نفعت
حتى القسطرة الي أكدت على الدكتور لا تحطها إلا بعد البنج في العملية
صارو يركبوها كل يوم ويرجعوها واتحمل فيها وقلت في خاطري يا ليت تحملت هالقسطرة ولا هالعذاب
خلصت حكايتي واللحين (هياتي بين ايديا)) وادعولي يا بنات اكمل علاجي على خير وارجع زي ما كنت وظهري ورجلي يرجعون لحالتهم.....

توتا توتا خلصت الحدوته

بالمناسبة أحب اشكر اختي في الله زوجة المهندس كانت تتصل فيا طول هالفترة وتسأل عني ...وياليت تدعو لها بالذرية الصالحة
وكل بنات قسم موضوع حوامل البكريات لأن سؤالهم عني كان على طول وأرجوكم أدعو لأختي حمض النيتريك الي طلعت صدقة عشان صحتي ولا تنسوها بالدعاء....