حفلة زواج + ميزانية محدوده = تعالوا ساعدوني (وطلب خاص من بنات البحرين)

يا هلاا والله ببنت بلاادي

الله يساعدكم بصرااحه هالفتره تتعب النفسيه بس ان شااء الله بتعدي على خير

امممم
انا الي سويته لان الميزاانيه كانت منيله بنيله خخخ ان رحت تعدلت في ليله الحنه وقبل لا اتحنى جلووني وكان للاهل بس يعني بيت عمومي وخالاتي وبيت اهل زوجي المقربين ,, ووزعت عليهم عصير وتوزيعات بسيطه وواكل بسيط من طباخ اخواتي وشوي من المطعم يعني معكرونه وبيتزا وسمبوسه من هالاشياء ... ويوم ثاني رحت الصالون ولبست الفستان الابيض وجلوني مره ثانيه فيه
والاكل كان عباره عن بارسيل وعصير
وزفوني لبيتي وكان الله غفورا رحيماا

انا نصيحتي لج لا تاخدين قرض علشان المضاهر ,, خليهاا لاشياء ضروريه وتدرين شبابناا شلون معاشاتهم والحياه صعبه خليهاا علشان بيتج او تسافرين فيهاا تونسين عمرج بدال ما تونسين الناس في حفله والدين بيكون على ضهرج وعلى زوجك

الله يهنيج يا رب ويسعدج

حبيبتي انا عندي تجربتين من هالنوع مب شخصية لي لاني ما تزوجت لوووول .. بس انا مرتبة زواج بنت اخوي و بنت خالتي بهالطريقة ..

بالنسبة لبنت اخوي .. تحنت بروحها .. و سوت لها جلوة بسيطة بس الاهل و صديقاتها والجيران .. وتعدلت لبست جلابية و حطت مكياج بو 10 و شسورت شعرها بس .. و الاكل كان عصير وحلويات و نثور "مكسرات مشكلة" وخذت العشا بارسلات .. ليلة العرس .. راحت الصالون وسوت تسريحة ملجة .. و حطت مكياج ملجة و لبست فستان اوروبي ناااعم كلش .. و راحت صورت مع زوجها فالاستوديو .. و رجعت بيتنا عشان يسلمون عليها عمامها و خوالها .. وسوينا لها زفة سيارات لبيت زوجها .. و على ما هي تصور احنا حطينا العشا للضيوف وبس .. حتى ما جابت كوشة و لا شي .. وباقتها كانت بسيطة جدا .. لان شعرها و مكياجها و فستانها كان اوروبي بحت ناااااعم جدا .. والحمدلله احنا استانسنا وماحسينا انه مب عرس بالعكس غنينا ورقصنا و هالشغلات بس على الضيق .. وبصراحة اريح بكثير من ان يجونج الناس و تقعدين تجاملين فلان و تباشرين علان ..وعقب العرس بيومين سافرت شهر العسل ..



بنت خالتي كانت في خطوبتها مسوية 3 ليالي كل ليلة كانها حفلة و كل ليلة مكياج و شعر و فستان لعروس .. في فالعرس قالت مب مسوية شي .. بتسافر شهر العسل .. فسوت لها جلوة و عرس بليلة وحدة .. فصلت لها فستان نااعم وباقة نعومية .. وهم فصلت ثوب نشل و جلابية و مشمر اخضر مال اول .. ليلة العرس حطت مكياج عروس .. و شعرها سوته تسريحة نص مرفوعه تناسب شي تراثي و بنفس الوقت تناسب الفستان .. ولبست الجلابية و الثوب والذهب مال اول .. و دخلت بالمشمر .. هم في بيتنا الحفلة كانت .. وخالتي حجزت لها وحدة تجليها و جلوها بالمشامر السبعة و عقبها طلعت و بدلت ولبست الفستان واكسسوراته وخذت باقتها و رجعت للكوشة على زفة مع زوجها.. كانت حاجزة كوشة نااعمة و بسيطة تناسب البيت .. والتصوير خذت ام يقين فالبيت صورتها .. وماشاء الله بدعت حتى الالبوم ما كانه في البيت كانه في صالة او في فندق .. راااقي جدا ..



يعني العرس فرحة .. و من بيفرح لج غير اهلج و احبابج و المقربين .. الناس بتجيج مب لانها فرحانه لج .. لا بيجون يتفرجون و ياكلون و ينقدون .. و مدام اهلج واحبابج معاج سوي لج عرس بسيط و افرحي ولا عليج من الناس .. تخسرين عليهم و هم لا حمد ولا شكورا .. لو الواحد عنده مبلغ راهي و سوى معليش بس احط على نفسي ديون عشان حفلة الناس من تطلع بتنساها و انا اتم شهور و سنين في دين .. لا انا اولى بالفلوس من الناس .. هذا رايي و ربي يوفقج و ييسر امورج ..

شوفي حبيبتي عندك كذاااا حل لمشكلتك....

بس انتي هدي ولا تتورترين عشان تقدرين تفكرين بهدوء وبحكمه....

خذي نفس كبييير الحين واهدئ....
شوفي ياقلبووو...

الحل الاول مثل ماقالو لك الاخوات انك تسوين حفله الحنه او الجلوه هي العرس
بس احس كذا بتصير خبيصه وماراح تنفهم...
بس اذاارتحتي سويها

الحل الثاني....انك تسوين عرس بس مايكلفك يعني يكون ببيتكم وتستغلين المساحات فيه تسوينهاعرس وانتي وفرتي قيمه المكان وزيني بشكل بسيط وممكن انتي تقدرين تسوينه مع خواتك صدقيني ترى الابداع مرررره حلووو شوفي الصور بالنت وطبقي شبهها مافيها شي بس لا تحرمين نفسك الفستان الابيض يبق عليك قيمه الاكل والكوشه اذا بتصممينها برى....
والتصوير يا تجيبين من برى او تخلين احد من العايله شاطر يصوركم

الحل الثالث....يقولون من بغى الدح لا يقول اح
خذي قرض وسلي عمرك للان هذي ليلتك وهذا يوم سعدك.....بكرى تتندمين تقولينليتني لو علىالاقل سويتلي عرس صغيرون او شي للان احسن ليله للبنت ليله عرسها والناس تزفها

الحل الثالث....
حبيبتي الايام بينكم والسفرات ان شاءالله تكثر تقدرين تستغنين عن السفر وتسوين عرس بعد بفتره بتسافرون....
يعني بالقليل 6 شهور وبتسافرون
حتى اذا ودك بالسفر اجليه لفتره وسافري لمكان قريب كذا عن نفسك والسفره الكبيره خليها بعد فتره


هذا كذا حل قلته لك واي مساعده انا موجوده بالخدمه
واذا حابهاعطيك افكار للعرس البيتي ترى انا موجوده واقدر اساعدك من الالف الى الياء....
بس انتي قولي

البنات .,

كفو .. و وفوا !.,

وإنتي أوردي مخططة وحاطه كل شي في بالج

*

إنتي سويتي حفلة خطوبة وما قصرتي عزمتي إلي يعزون عليج كامل من أهل ومعارف وربعج .. وكل الناس!.

والحين في الزواج .,

بتسافرين شهر عسل معتبر وحلو وهذا الشي بإختيارج .,

يعني تقدرين تسوين لج ليلة ( زواج & جلوة ) مرة وحدة

لكن!.

بتكاليف بسيطة جداً ومحدودة + بحدود أهلج وأصدقائج فقط ( يعني شي عائلي )

*

إذا بيتكم مساحته كبيرة وتساعد على هالحفلة سوي في البيت " يعني صالتكم تشيل إلى 100 شخص "

بس إذا ما عندكم مكان في البيت وضييييق .,

حجزي لج ( مآتم أو صالة ) رخيصة ومساحتها زينة

يعني سعر إيجارها ما يتعدى 180 دينار .. وربما أقل بوايد بعد .. يعني تلقين مواتم على 80 إلى 100 دينار بعد!.

وصالات رخيصة هم بعد تلقين من 120 إلى 180 .. وايد ويشيلون أزيد حتى من 100 شخص

بس يعتمد على المساحة وعلى المتوفر عندج

*

وحجزي لج ملاية زينة ورخيصة أيضاً هي تجليج وهي تحيي هالحفلة العائلية

و وايد ملايات ما شاء الله

أسعارهم حلوة , وإهما زينين .,

يعني ملاية ما تاخذ أزيد من 120 دينار

وفي ملايات أسعارهم من 80 إلى 120 دينار .,

*

الأكل .,

مثل ما قلتي بارسلات & مشروبات غازية أو عصاير

وطبعاً ما بيكلفونج وايد لأنهم بحدود أهلج وربعج

وحاولي ما تعزمين أكثر من 100 شخص .. لأنه شي عائلي

يعني سوي كإحتياطاً 200 بارسل أكل , خبرج كل وحدة بتقول تبي لفلانة ولعلانة

فأخذي إحتياطج بعدد معقول

*

نجي لج إنتي الحين .,

حجزي في إستديو كشخة ومرتب مثلاً : سكوب , صحاري .. إلخ

تصوير داخلي فقط .,

وعندهم باكجات متنوعة للتصوير الداخلي

وحجزي لج فستان أبيض .. والصالون & باقتج

وجهزي روحج من مشتريات العرس وما شاكل .,

وبس!.

*

ليلة الحنة .,

لا تسوين ولا شي

تحني قبل حفلتج بيومين

وفي البيت .. وخلاص!.,

لا تعزمين ولا شي .. ولا تكلفين على نفسج

*

لو بتراعين الميزانية وبتحسبين كل شي بترتيب و إقتصادية

يمكن الميزانية تطلع لج من 650 إلى 800 دينار حق كل شي ..

وبجذي تكونين لبستي الفستان الأبيض وصورتي وما فاتتج هالذكرى + حصلتي على جلوة عائلية مرتبة ومنسقة قبل السفر

*

ولا تفكرين تاخذين أي قروض أو جمعيات

دام عندج ميزانية محدودة .. سوي بلي متوفر عندج ولا تزيدنها أبداً

مب حلو تحطون على ظهركم أقساط وبلاوي ثانية , غير أقساط السيارات

*

موفقة يا رب (f)

رايي من راي هذيان عاشقة

بنات كفو

انا من رايي

انج تسوين حنه بروحج خواتج وخواته بس

والعرس تسوي شي بسيط جذا

مثل ماقالت حلم العذارى اذا بيتج او بيته عود سوييه في بيت

اذا لا

فأجري خيمه او صاله صغيره

واذا تبين مسرح في محلات ياجرون مسارح رخيصه

و الاكل بارسلات او بوفيه حق 80 شخص

واجري فستان عرس وتمكيجي وسوي شعرج واستانسي

ولا تحرمين روحج من ليله العمر ( سألي مجرب اللي هي انا )

احلى ليله في العمر

وليله ماراح تنعاد مره ثانيه

يعني ماتقدرين تقولين اذا ماوست هالشي المره بسويه مره ثانيه

مستحييييييييل

وان شاء الله مايصير الا كل الخير

الله يوفقج ويهنيج ماعرف في هاي السولف بس دعيت لج

هلا اختي انتي حالج من حالي ، سويت حفله خطوبة والحين ، افكر اني اسوي عرس بسيط وطبعاً اهلي ، واهله فقط ...

اني فكرت ان : البس فستان ابيض ، واسوي هو عرس وهو جلوه ، يعني العرس والجلوه في يوم واحد ، عن الخساير ، واتحنه قبل بيوم او يومين بروحي او اجيب حنايتين وتحني الاهل واني ...

العرس والجلوه طبعاً بتكون في نفس اليوم واني فكرت في ماتم ... او في الصالات : مثل: فاطمة كانو ، ابي ذر ، عايشة المؤيد ، هاي الصالات ، اجارهم على 50 دينار او 40 دينار ، واختاري وحده وسعرهم زين...

والشي الثاني على الاكل ، بارسلات احسن من بوفيه ، واخذي قواطي بيبسي ، وسفن آب .... إلخ ...

لا تاخذين قرض ، ولا تخسرين روحج ، استفيدي بالفلوس اللي بتخسرينها في العرس بشهر العسل روحي انتي وزوجش واستانسوا ...

اني هذا اللي بسويه لين فكرت أعرس ...

وموفقه حبيبتي ...

:D

وحده من ربعي سوت عرسها في البيت ماسوت شي غير انا سوت بوفيه صغير حق الاهل ويابت لهادي جي في البيت ولبست فستان ابيض ناعم كلش وبس وصورت

حل اخر
واذا انتي خاطرج في عرس وعندج ميزانيه في حدود الالف دينار سوي حفلتج في صاله الدانه اللي في سند بتطلع عليج بحدود الالف دينار حق 200 شخص وشامله الاكل والتصوير والدي جي وكل شي يعني يبقى عليج فستانج وتعدلج

خيروني مثلج بين العرس والسفر
اول شي اخترت السفر
بس بعدين ايدت العرس وبقوه لان ماراح يتكرر اما السفر لاحقه عليه .. بس قررنا نقعد ليلتين في الفندق

انتي امسوية حفلة في الخطوبة سوي لج حفلة بسيطة في البيت او مكان واسع ولبسي فستان ابيض واخذي بارسلات من اي مخابز ويبي جلاية في نهاية حفلتج والحنة مب لهدرجة صعبة ممكن تحنين في الصالون وبدون معازيم اذا بالبيت انتي وخواتج وارشح لج صالون نهلة ما يكلفج 70 دينار ويبي لج وحدة من المصورات عندهم .

هلا اختي انتي حالج من حالي ، سويت حفله خطوبة والحين ، افكر اني اسوي عرس بسيط وطبعاً اهلي ، واهله فقط ...

اني فكرت ان : البس فستان ابيض ، واسوي هو عرس وهو جلوه ، يعني العرس والجلوه في يوم واحد ، عن الخساير ، واتحنه قبل بيوم او يومين بروحي او اجيب حنايتين وتحني الاهل واني ...

العرس والجلوه طبعاً بتكون في نفس اليوم واني فكرت في ماتم ... او في الصالات : مثل: فاطمة كانو ، ابي ذر ، عايشة المؤيد ، هاي الصالات ، اجارهم على 50 دينار او 40 دينار ، واختاري وحده وسعرهم زين...

والشي الثاني على الاكل ، بارسلات احسن من بوفيه ، واخذي قواطي بيبسي ، وسفن آب .... إلخ ...

لا تاخذين قرض ، ولا تخسرين روحج ، استفيدي بالفلوس اللي بتخسرينها في العرس بشهر العسل روحي انتي وزوجش واستانسوا ...

اني هذا اللي بسويه لين فكرت أعرس ...

وموفقه حبيبتي ...

نفس اللي كنت بقوله لج اشوفه حل شامل وكامل للموضوعج و نصيحة لاتاخذين قرض عشان مظاهر ترى مايسوى خليه لج ولزوجج و سافروا شهر عسل حلو وذكريات احلى يارب

ربي يسيير لج ودعواتج لي بالزوج الصالح وبقضاء الحاجة

تحياتي

البنات ماقصرو
سوي زفاف لو بسيط بس ضروري تلبسي الفستان الابيض وتصوري حتى لو حاولتي يكون مختصر وبسيط
لأن الليلة مهمة في حياتش ومابتنعاد لازو تستمتعي بها وتسوي كل اللي نفسج فيه

يتراوالي البنات ماقصرو ما خلو لنا شي نقوله غير الله ييسر لك ان شاء الله

و فكري بالسفر وين بتروحين و شبتسوين بتحسين كانك تخططين حق عرس :)

عندي فكرة وايد حلوة(i) سوي عرسج في البيت حطي الدي جي و كشخي بالفستان وزفة حلوة على عشا بسيط ولا توزيعات و لا خرابيط كنا أنروح الأعراس ما فيها توزيعات ولا شي بس الحين أطلعو طلعة بهذي التوزيعات الصراحة مالها داعي خساير على الفاضي واللة الناس أيقطونها أول ما يوصلون من العرس بس مشروبات و بعدين وليمة و اللة أيهنيكم و سافري و أستانسي(f)

سالفتج مثل سالفتي ..


ابي اسوي زواااج وابي اسافر شهر العسل .. وفوق هذا ابي أأثث الشقة..

والمبلغ اللي عندي يسوي لي شي من ها الثلاثة بس .. او شيئيين بس مو على أصول ..


يعني ما اقدر اسوي به عرس فخم .. واسافر .. ولا اقدر أأثث الشقة كامل واسوي عرس فخم ..


هذا احنا البنات كلنا نحتاار نبي نسوي كل شي .. ومانبي نتنازل ..



ربج كريم .. الله يوفقج ويسهل عليج امورج ..

أختي، بآقولج آنه اشسويت وكان الحمد لله عن قناعه ومب متحسفة أبداً

حفلة خطوبة في البيت، كانت شي محترم والمعازيم مب اكثر من 100 شخص، يعني عائلية... أما الزواج، فرحت تعدلت (ميك اب وتسريحة) ولبست فستان أبيض وصورت معا ريلي وسافرنا على طول في نفس الليلة...

السفرة كانت 19 يوم والحمد لله استانسنا فيها واااااايد، وما آعتقد انه اي سفرة بعدها ممكن اتكون في مثل حلاوتها.... يعني من وجهة نظري، العرس شنو؟ حاله حال الخطوبة، لابسة فستان والناس قاعده واكل وتصوير...

لكن السفر واااااايد احلى، وخاصة لمنطقة يديدة ما قط رحتوها ولفترة طويلة نسبياً... يعني اتمين اتذكرين المواقف الصغيرة اللي كنتوا اتمرون فيها، اشلون ردة فعلكم على الاشياء اللي اتشوفونها اول مرة، الاناسة اللي كنتوا فيها خاصة انكم توكم متزوجين وما عندكم اي ارتباطات او مسؤوليات.

علماً انه محد خيرني بين العرس والسفر، يعني مني ومن نفسي قلت مآبي عرس ولا شي، كفاية حفلة الخطوبة، حتى قالوا لي اهل ريلي سوي حنة وجلوة على الاقل، بس آنه ما رضيت...

آحس انه حلو انه عندج حفلة وحده اتذكرينها وعايشة في بالج، وسفرة وحده حلوة ترجعين بذاكرتج لها كل ما اتواجهين مشاكل الحياة......

هاي تجربتي وبالتوفيق حبيبتي.

اختي سافري وتوكلي على الله احسن من العرس