قصة حقيقة للعبرة ...

السلام عليكم ورحمة الله وبركاته

هذي قصة سمعتها من احد صديقاتي المقربات عن وحدة تعرفها وانا سمعتها من مدة طويلة اتمنى اني انقلها لكم بدون نسيان اي شئ ... وهي إن دلت على شئ فهو ان الله يمهل ولا يهمل وان الظالم بالنهاية ينال جزاءه

القصة يا بنات ان في بنت يتيمة مالها أحد وفقيرة كانت تبي الستر ,ففي حرمة من جيرانها او معارفها جابت لها عريس ووصفت العريس على أنه ميسور الحال ومحترم ومتدين وحسبما اتذكر راحت واخذت البنت لاحد البيوت وقالت لها هذا بيت فلان يعني العريس طبعا شافوه من برع وكان فخم وحلو. البنت المسكينة وافقت على أمل ان الله يعوضها عن الحرمان والوحدة. وتزوجت بس اكتشفت أن زوجها موظف بسيط وما عنده لا بيت ولا شئ وان الحرمة كذبت عليها . بس هي رضت بنصيبها وتابعت حياتها مع زوجها خاصة انها شافته زين بعض الشئ وجابت عيال وعاشت ببيت صغير على قدهم , بس بعد فترة تغير زوجها وصار سيئ الاخلاق وصارت له علاقه مع وحدة ثانية سيئة الاخلاق بعد واتزوجها واهمل زوجته واولاده وانطرد من شغله وصار يعيش مع زوجته الثانية وطبعا كان يشرب عادي خاصة الثانية متحررة وعادي عندها وهي اللي تصرف عليه. واما الاولى المسكينة صارت تشتغل شغالات بسيطة بحكم انه ما عندها شهادة بس عشان تصرف على نفسها وعيالها والجيران يساعدوها باللي يقدرون عليه.

شوفو هنا عدالة الله . تعرفون الحرمة اللي كذبت عليها في مواصفات العريس . عندها بنت وجاء واحد يخطبها وسبحان الله قالهم نفس المواصفات انه زين ومحترم وميسور الحال وعنده بيت فخم وبعد اخذهم يشوفو هالبيت الفخم . وسبحان الله بعد الزواج اكتشفو انه لا عنده فلوس ولا بيت . يعني اللي هي سوته في اليتيمة صار في بنتها.