قصة ولادتي بالتفصيل الملل

قصة ولادتي بولدي محمد (الله يحفظة لي قولوا آمين)

طبعا بقول لكم القصة بالتفصيل الملل وان شاء الله ما انسى منها شي (حبيت انوه اني بكر وماكنت اعرف للولادة وآلامها واتفاجأت انها جدي صدق الجنه تحت اقدام الامهات):
بتاريخ 11- 9 وكالعادة طبعا كل ساعتين الحمام دام اني نايمة والساعه 9 رحت الحمام الله يكرمكم الا ماي الجنين ينزل بس مو واجد شوي وقلت اكيد اليوم بولد،، ويجي لي الم كل 5 دقايق بس كلش خفيف ومحتمل بس ما قدرت انام كلحين انقز من السرير،، المهم تواصل الالم للمغرب وبعدين كل الالام راحت ،،،، آآآآآآآخ يعني ما بولد اليوم،،، المهم بنام في الليل ما قدرت كل 5 دقايق انقز على آلام خفيفه واستمرت معاي بس كلش خفيفه لكن ما قدرت اغمض عيوني وزوجي يحن علي يباني اروح المستشفى واني ارفض،،، يوم 12-9 رحت بيت ابوي واتفطر معاهم يوم شافتني امي على طول عرفت اني اطلق وتجيني آلام مع اني ما كنت امبي اقول علشان لا تحاتيني وقالت ليي سيده عقب الفطور المستشفى،،
اتفطرت واني مستحمله الالم لانه خفيف وطلعت مع زوجي على اساس اروح المستشفى وفي الطريق غيرت رأيي قلت ليه توه الناس خلنا نروح البيت واذا زاد الالم بروح المستشفى،، المهم رحت البيت وشافتني ام زوجي وعرفت وقامت بخرتني وسوت ليي حليب وزعفران وفي الليل ما نمت طبعا وزوجي يحن عليي واني معاندة وصليت الفجر مع زوجي ورحنا المستشفى عقب الحنه وقاسوا الرحم وكان فاتح 3سم وحطوا التخطيط ،، ظليت للساعه 8 الصبح في المستشفى وبعدين جت الدكتورة وسيده طلبت خروج للبيت ما استحمل لصراخ الي هناك.. اتفاجأت الدكتورة وقالت انتي حالت ولاده وبننقلش فوق للجناح حق ولاده قلت ليه لالالالا بروح البيت ما اقدر استحمل وبالغصب الا وافقت بعد ما وقعت على مسؤوليتي....
رحت البيت وامبي انام بس مستحيل الآلام تزيد وزوجي ما خلاني رد رجعني الساعه 10 الصبح ونفس الحاله فاتحه 3 ونص تقريبا وارد ارجع البيت،، وخليت زوجي ينام شوي واني ميته من لصياح بروحي في الصاله وبعدين اتصلت فيني الوالدة وقالت اتقعدين زوجش او امر اوديش المستشفى ،، هني استسلمت قلت خلاص وقعدته من النوم ورحنا المستشفى الساعه 1 ونص الظهر ،، وصلت 4 سم وعلى طول غرفه الولاده وسيده طلبت منهم ابرة علشان ارتاح شوي وانام لانه صار ليي 3 ايام ما نمت وعطوني الابرة واتخدر منها بس كل شوي يجي الالم وافتح عيوني واتألم وكل شوي يزيد ويزيد وكنت متصبرة ما اصارخ وبعدين خلاص يوم وصل الرحم 8 سم فقدت اعصابي والالم صار يموت واني اصرخ وزوجي يصيح برى وكل شوي يدخل ايشوفني ويقرى عليي والممرضه تقرى عليي وخلاص وصلت 10 سم هني ما قدرت احس شي بيطلع مني واصارخ فيي شي بيطلع وسيده:confused: برزوا معداتهم وابتدى الدفع والتنفس،،، احبس نفسي وادفع واصارخ وما بين كل دفعه والثانية احس يغمى عليي وارد اوتعي واقول ليهم بنام وهم يرشون ماي عليي علشان اوتعي وادفع وادفع يمكن 5 او 6 مرات على ما طلع احلى قمررررر بدنيتي (محمد نور عيني) وكانت الساعه 9 و45 تقريبا بالليل...وكل الآلام راحت وابتدت الخياطه اول شي كنت احس فيها بعدين طلبت بنج وما حسيت بشي ومن التعب كنت انام واقعد واسأل الممرضه خلصتون واتقول للحين يمكن ساعه كامله اتمللت وتعبت....
شرف حمودي بتاريخ 13-9-2009م،،، ادعوا الله يخليه ليي ان شاء الله :D