قصه حملي العجيبه

السلام عليكم ورحمة الله وبركاته

أخواتي انا متزوجه من سنه و3أشهر بعد ما تزوجت بخمس اشهر حملت وكنا فرحانيين جدا وما خلينا قريب ولا بعيد الا خبرناه ما كملت اسبوعين من بعد الفحص وإلا أنااحس بوجع في بطني ونزل دم خفيف ورحت المستشفى بسرعه تأخرت علي الدكتوره يمكن ساعتين ونصف تقريبا وإلا الدم صار فيضان وأول ما وصلت الدكتوره وشافت الدم من دون ما تفحصني بالجهاز قالتلي البيبي نزل وصورت عشان تتأكد وقالتلي الله يعوضج هذا الدوا وخذي هالابره تشيل وجع البطن وما تحتاجين تنظيف والله كريم رجعت والله يعلم بحالي أنا وزوجي كيف الحمد لله هذا قدر الله وهذي ارادته من بعدها حاولنا ما نظيع أي يوم من أيام التبويض عشان يصير حمل مع انه دوامه جدا بعيد عني ولكن كنا نبذل جهد لمدة 3 أشهر وماصار الحمل وقررنا نروح للدكتوره وكل مره كنا نروح عند الدكتوره تعطينا حبوب كلوميد عشان تقوي او تكبر المبايض كملنا 6أشهر وبعدين بإذن الله حملت ولما عرفت إني حامل رحت للدكتوره على طول وعطتني حبوب الفوليك وقررنا انا وزوجي ما نخبر أحد حتى نسمع النبض وبعدين نقولهم يمكن المره الأولى لأنا خبرنا الناس كلها ما ثبت الحمل والآن راح نصبر شوي وبعدين يصير خير انشاء الله فرحنا وحمدنا ربنا وتصدقنا على هالخبر الحلو وفي كل مره نروح للطبيبه ونحن عند الانتظار نفكر ونتناقش كيف بيكون حجمه وشكله بيكون واضح أو لا كل اسبوعين كانت الدكتوره تعطينا موعد ونروحلها كملت ولله الحمد تسع أسابيع لما رحت للدكتوره كانت قايلتلنا في المره اللي طافت المره الجايه راح أسمعكم النبض وبيكون واضح انشاء الله كل يوم كان يكلمني زوجي فيه كان يحسب الايام للموعد الجاي ويقول متى يجي يوم موعدك ونسمع النبض المهم رحنا ودخلنا عند الطبيبه وجت تكشف علي عشان تسمع النبض حطت الجهاز وصارت تحركه وتكبر الصوره وتصغر طولت شوي وبعدها قالتلي التصوير مو واضح أفضل تروحين الغرفة الثانية اللي يكون فيها التصوير واااضح رحت والابتسامه ما فارقتنا انتظرنا كان زحمه واجد وبعدها دخلنا وصورتني الدكتوره الثانيه وصارت تدور على النبض وتأشر لزوجي وتقوله هذا القلب وتشرحله وإهي قاعده تدور على النبض قالتلي متى كانت آخر دوره لج قلتلها وجلست تحسب وطالعني وترد تحسب وبعدها قالتلي روحي الحمام ونزلي البول اجلكم الله رحت ورجعت ورجعت فحصتني وقالتلي حسب الحساب إنتي في الإسبوع التاسع والبيبي في الإسبوع السابع بداية ما فهمت قصدها والله مافهمت لا أنا ولا زوجي قلتلها كيف يعني قالت البيبي مافيه نبض لما قالتلي كذا حسيت كأنه حد شدلي جذور شعري وبشده صرت أبكي وأكلمها إيش قصدك يعني البيبي ميت صح ؟! ردي صح .. وزوجي يقول استهدي بالله شو هالفال اهي بعدها ما تأكدت ولا قالت هالكلام !! صبري اش فيج مستعجله ! وأنا أحلف لزوجي إنه قصدها إنه ميت لما رجعت سألتها قالتلي روحي عند الدكتوره وإهي تكلمج وقفت البس وطلعت أدورها اختفت وكأن الأرض بلعتها وتركتني ويا ناري رحت ويا زوجي للدكتوره وصرت أنتظر ما يقارب ساعه ونص عشان تجي الدكتوره كل ما أروح مكتبها القى السستر لحاله وتقولي الدكتوره راحت في حالة طوارىْ وحده جاها نزيف تبي تشوفها انتظرت وزوجي يهديني وبعده جت دخلت عليها فتحت ملفي وقرته اتصلت للدكتوره وبعدين قالتلي ياحبيبتي الطفل ما عنده نبض ولا ينمو بإختصار صارله ميت في بطنج اسبوعين ولازم انسويلج تنظيف وباجر بعد المسأله ما تتحمل تأخير سألته شو السبب طيب قالت بدون أي سبب مات وهذي تصير واجد مثل المره الأولى قالتلي بدون سبب طلعت وزوجي ينتظرني برع قلتله والله يعلم بالحال رجعنا والدموع أربع أربع كيف بنقولهم وهم أصلا ما يعرفون إني حامل ! خبرت أمي انصدمت وقالتلي اصلا من متى انتي حملتي؟! صارت الناس كلها تعاتبني لأني ماقلتلهم ويتصلون في يعاتبوني وانا بكره عندي عملية تنظيف وخايفه ولا أدري ايش راح يصيرلي وأنتظر كلمه حلوه تهديني أو دعوه من خاطر بأن الله يعوظني ويصبرني والله إن في وحده قالتلي تستاهلين لأنج ما قلتيلنا أصلا إنج حامل مع إنها تقربلي كثيييير سكرت عنهم وصرت أصارخ وابكي والله ما عرفت ألاقيها من وين وإلا من وين اش صار في الدنيا القريب صار عدو بس عشان ما قلتلهم! الله يسامحهم في حمالي الأول قالولي الغلط منك لأنك قلتي للناس كلها وما صبرتي شوي والحين يعاتبوني ليش خبيتي علينا احترت معامهم مره يقولولي كذا ومره كذا وفي الحالتين مو عاجبهم ويجرحوني في الكلام بعد الله المستعان مايرضي ابن آدم ولا يملي عينه غير التراب انا وين وهم وييين والله يعلم بحااالي وحااال زوووووجي الحين طافن خمس أشهر تقريبا وأنا إلى الآن ما صارلي حمل فاتمنى يأخواتي تكونون أفضل من هؤلاء الناس وتدعووولي بالذريه الصالحه وتعلموني دعاء يثبت الجنين ويحفظه وهو في بطن امه عسى الله أن يبارك فيكم ويسعدكم ولا يحرمكم من غاليكم ..