قصة ولادتي بفرحة حياتي .... حبيبت قلبي.. نور دنيتي..

السلام عليكم و رحمة الله و بركاته

حبيباتي بغيت احط لكم قصة ولادتي ببنوتي ميسم الله يحفظها و يخليها لنا و يجعلها من الذريه الصالحه الباره..

طبعا انا كان موعد ولادتي على 13/6/2009 و كنت انتظره بفارغ الصبر و بنفس الوقت بخووووووف.. و هالخوف كان مصاحبني من دشيت شهري الثامن.. كنت كله افكر في الولاده و اشلون بتكون الآلام.. و فكرة ان كائن حي فيه روح بيطلع مني.. كنت اسمع عن قصص الولاده في اللي كانت تخوفني و في اللي كانت تحسسني ان الولاده سهله..

بس دوم كنت ادعي من أول ما دريت بحملي ان ربي يسهل علي ولادتي و نكون انا و البيبي بخير و نقوم بالسلامه...

نيجي للقصه المثيره خخخخخخخ

طيب.. مثل ما قلت كانت المتوقع اني اولد بتاريخ 13/6/2009 و جاء هاليوم و عدى و انا لساتني ما ولدت.. صادني إكتئاب.. صح كنت خايفه بس كنت متشوقه اشوف البيبي و تكون في حضني.. و طبعا زوجي كان كل يوم يسألني ( هاه كيف اليوم بتولدي؟؟)

بالمستشفى عطوني موعد لو ما ولدت اراجعهم على تاريخ 16 رحت لهم كشفوا علي و كل شي كان اوكي و قالوا لي لو ما ولدتي قبل تاريخ 25 راح نعطيج شي يحفز الولاده (يعني طلق صناعي)

يوم الأربعاء تاريخ 17 بالليل صار ينزل عندي افرازات مع دم.. توقعت انه عادي ليش ان اليوم اللي قبله عملوا لي فحص داخلي (وقتها تلوعت من هالفحص حسيت اني برجع).. و طنشت السالفه.. بس عالساعه 3 فجر يوم الخميس صارت تجيني آلام أول مره احس فيها.. ما قدرت انام و هالآلام تلعب فيني رايحه جايه.. صحيت زوجي و قلت له عن الإفرازات اللي.. تحمس الرجال هههههه قال لبسي عباتج علشان نروح المستشفى خخخخخ مستعجل اكثر عني.. قلت له ننتظر لين الصبح لأن الآلام مو متواصله يعني كانت كل نص او ربع ساعه و احيانا ما تيجي.. عالصبح الساعه 8 رحنا للطوارئ و سوا لي الفحص اللي تحت و قالت لي الممرضه مفتوح واحد سانتي و حطت لي جهاز التخطيط.. كان يبين عندها ان في انقباضات بس مره تكون قويه و مره خفيفه .. قالت لي احسن ارجع البيت و انتظر لين يزيد الإنقباضات و تكون قويه و متواصله أو لما ينزل علي ماي أو دم.. و قال لي اتحرك و امشي علشان ينزل البيبي و يسهل الولاده (صح نسيت اقولكم اني كنت كسوووووووله بشكل و ما كنت امشي كثير إلا قبل اسبوع من موعد ولادتي).. خفت لايكون البيبي بعده ما نازل و اتعذب وقت الولاده << تو الناس هههه

طلعت من الطوارئ و زوجي يسأل غير عن الإتصالات اللي كانت يسويها كل شوي و يسأل هاه كيف كيف كيف.. قلت له بعد... المهم رجعت البيت و مشيت شوي .. و كالعاده تعبت و طنشت ليش ان الألم راح ولا صرت احس فيه .. و اليوم الثاني نفس الحاله من الفجر و انا كله مو قادره انام و تعبت و الألم اخس عن قبل.. و كله رايحه جايه بالغرفه و زوجي جالس يطالعني يقولي اوديج.. اقوله لاء ننتظر شوي.. لين الساعه 7 و نص الصبح قلت يالله وديني ما قادره عالألم.. رحنا مره ثانيه الطوارئ و نفس الحاله قالوا لي بعد.. رجعت البيت و نفس الحاله خف الألم.. يوم السبت الفجر من الساعه وحده و لا قدرت انام و الألم رجع لي كل ربع ساعه و نفس الشي الساعه 7 الصباح رحنا للطوارئ انا و زوجي و نفس الكلام (الرحم مفتوح واحد سانتي و الإنقباضات مو قويه).. عاد هنا زوجي قالي شكلج تتعيري.. ضايقني و ما بغيت اكلمه و رديت البيت و هو راح الدوام.. بس هاليوم الألم ما رضى يخف مثل قبل.. حاولت اريح على السرير بس الألم كان يصيدني و ما قدرت انام و كله كنت امشي بالغرفه و اقرا الآيات و الأدعيه و الحمدلله كانت تخف.. و كل ما ترجع ما اقدر لا انام ولا اجلس ولا حتى اوقف.. كله امشي و امشي بالغرفه.. و لما يخف شوي احاول انام خمس او عشر دقايق و افز من نومي من الألم.. و اقرا الآيات و الأدعيه و ارجع انام.. (عذاب والله).. لا قدرت آكل ولا أنام ولا اجلس..

عالساعه 8 المسى من نفس اليوم ما قدرت استحمل هالألم قلت خلاااااااااااااااااص بروح المستشفى وخليهم حتى يسوا لي عمليه اهم شي يخف والله تعبت.. نزلت ادور على زوجي لقيته يلعب بلايستيشن مع اخوانه:dontknow: .. ناديته قلت تعال وديني.. قال لحظه.. هاللحظه كانت نص ساعه:UP202:.. و انا ماسكه نفسي و مستحمله و كله امشي.. جاني و قلتله يالله وديني.. الفيلسوف قالي لا بعده مو وقته.. تعالي نمشي برا البيت :sa24:.. مشيت و كل ما صادني انقباض كنت اسأله كم الساعه.. كم.. كم.. و الحين؟؟ قالي مو كأنها كل ثلاث دقايق؟؟ قلت ادري بس حضرتك مو ناوي توديني!! راح عني مفجوع يسأل عمتي و انا رحت وراه و الدموع في عيوني خلاص.. و صادني انقباض غيره و شافتني عمتي قالت له ايش نتنظر يالله وديها..

وصلنا الطوارئ الساعه 10 و كشفت علي الممرضه و على طول قالت لي ولاده و اشوفها تتحرك بسرعه.. سألتها كم سانتي مفتوح؟؟ قالت 8 ونص إلى 9 سانتي .. والله ما عرفت شو كان شعوري ذاك الوقت.. ارتحت و خفت في نفس الوقت!! و انا ادور زوجي و اقوله اتصل بأمي خبرها.. دخلت غرفت الولاده الساعه 10 و ربع سحبوا مني دم في حالة احتجت لدم بعدين.. و حطوا لي سقايه ليش اني صار لي كم يوم ما آكل مثل الأوادم و حطوا جهاز التخطيط و جاتني الممرضه اللي راح تولدني ما شاء الله عليها ذوقت و طيبه و حسن تعامل و جلست تكلمني و تطمني.. و طول الوقت كانت عمتي معي..

كان كل ما يجيني انقباض عمتي تقرا علي وحسيت كأن شي بيطلع و تذكرت امي كانت تنبهني لو حسيت كذا بيكون البيبي يتحرك علشان يطلع ولازم ما امسك و امنعه مو زين للبيبي.. طيب لما حسيت كذا حاول ادفع.. و نزل علي ماي البيبي ذاك الوقت عالساعه 10 و ثلت.. راحت عمتي نادت الممرضات وجات و جابت عدة الولاده معاها و ضربتني ابره عند الفخذ علشان ما أتألم كثير وقت الولاده..

بديت الولاده الساعه 10 و 36 دقيقه و الممرضات يعلموني شلون و يقولوا لي خذي نفس و زفري كل ما حسيتي بألم .. اقولهم ما احس بألم احس كأن شي بيطلع.. تقولي ايوه هذا البيبي .. و كنت احاول اطبق اللي يعلموني اياه وقت الولاده و كل شوي زفره.. و هم يقولوا خلاص قرب قرب.. نشوف راس البيبي خلاص.. و انا اقول معقوله؟ انا ما احس براس البيبي!! لا يكون يكذبوا علي.. تعبت من الزفر و قلت لها خلاااااااااص ما اقدر و الله تعبانه ما اقدر.. و الممرضه تقول لا تقولي ما اقدر.. قولي يا رب اجعله من الذريه الصالحه .. يالله ما باقي شي خلاص البيبي وصل بس يحتاج شوية مساعده منج... وانا ازفر.. و فجأه حسيت بخفه لا ألم ولا شي حسيت كأن بطني فاضي و راح التعب.. اقول ايش صار؟؟ قالوا لي جبتي بنوته.. بس دقايق و اسمع البنوته حبيبت قلبي تصيح و صوتها واطي فديتها حطوها حضني على صدري و كانت صغيروووونه و بستها.. و قلت الحمدلله الحمدلله الحمدلله..

و بكذا يوم السبت المساء بتاريخ 20/6/2009 الساعه 11 و دقيقه شرفت نور دنيتنا و حبيبت قلبنا بنوتتنا الحلوه ميسم تملي علينا الدنيا انا و ابوها.. الله يحفظها لنا و يجعلها من الذريه الصالحه..






نصيحه مني يا بنات اهتموا بأكلكم زين خاصه قبل الولاده راح تحتاجوا لكامل قوتكم .. لا تهملوا المشي نهايه الشهور ابدا.. ولا تخافوا من الولاده لأنها والله ما تخوف ابد توكلوا على الله و هو بيسهل كل صعب..

اكيد ما نسيتكم و دعيت لكم كلكم ان ربي يرزق كل مسلم محروم الذريه الصالحه.. و يسهل ولادة كل اخت و تقوموا بالسلامه انتوا و البيبيز...




الله يرزق كل اخت مسلمه الذريه الصالحه