تعبت من زوجي القاسي

السلام عليكم
شو اخباركم بنات , من بعد الله سبحانه وتعالى ابغي مشورتكم ونصايحكم والدعاء لي بالهدايه وهدايه زوجي واولادي.
انا متزوجه من اربع سنوات وزوجي تغير هالسنه صار قاسي معي بشكل كبير , المهم اانا من فتره مخلتنه على راحته يطلع ويسهر لين الفجر وقلت بروحه بيشووف اني ساكته بيحترم عمره وبيحس على دمه وبيتعدل لوحده بس مافي فايده , وهو يشتغل خارج الامارات ويوم يرجع للاجازه الوقت كله يقضيه مع اصدقائه ونحن مالنا مكان بحياته.
لي يومين مب قادره اتحمل الوضع ونتكلم من ورا خواطرنا لاانا طايقته ولا هو طايقني , وتضاربنا امس في الليل وطلعت الي بخاطري كله وعدم مسئوليته واهتمامه فينا وانتقدته وانتقدني المهم الموضوع كبر وقلت لزوجي اني مليت من هالعيشه حياتي مقسمه مابين ابوظبي ودبي عند اهلي وعند اهله وابغي استقر , قالي عندي بيت جاهز ملك اسكني فيه قلتله ماريد اسكن فيه واتجيب عيالك من الحرمه الاوله يسكنون عندي ابغي بيت ثاني او تأخذنا مكان شغلك قالي عطيني يومين افكر وارجعلج خبر المهم رده ماطمني احس ناوي نية شينه وخايفه وندمت ليش تكلمت بالموضوع المشكله قهرني بعدم اهتمامه بالموضوع والكلام الي اقوله له , وقعدت ابكي طوووول الليل ماسأل عني ولا طيب خاطري لو بربع كلمه وطنشني ورقد عني ونحن لنا على هالوضع سنه ونص وشاكه ان طليقته مسويه شي مادري شو الحل وانا متضايقه من هالوضع يمكن انا اسلوبي استفزازي وعصبية , بس ماحس بأي حنية او حب او موده او رحمه من ناحية زوجي اتجاهي بعكس ماكان قبل طيب معي ويداريني برغم كانت في مشاكل بس كنت اقول زوجي طيب وهالوضع بيتغير قريب .
اسفه ازعجتكم بس ارجوكم شوفولي حل ودعولي انا الله يهدينا وترجع ايامنا نفس قبل واحسن يارب.