لما كان إبني صغير كنت أستخدم الخلاط الصغير اللي يكون بالعلبة مع خلاط العصير وكان خلطه زين بس طريقه إغلاقه وسكب الأكل منه مو عملية... المهم كان يأدي الغرض وأنا وقتها ماكان عندي خبرة بهالأمور والحمدلله مشى الأمر ...
هالمرة ماكان عندي خلاط وطبعا بنتي صغيرة للحين على الأكل بس كنت ناوية أزور صديقة أختي الوالدة وماعرفت شنو أهديها لبنتها.. اللي معاي بالمكتب قالت لي مافي أحسن من هالهدية وفعلا رحت شريتها ونويت أشتري لبنتي الا مافي الا خلاطة وحده وأضطريت أخذها للبنت وأجل لبنتي.. وببداية الأسبوع نويت ابتدي اعطي بنتي مهروس التفاح ولازم طبعا خلاط.. رحت مذركير العادي (البيبي شوب) وشريت وحده بعشرة دينار وبالمرة مانفعت مثل ماتحطين التفاحة تطلع يادوب تقطعها قطع صغيرة.. ورجعتها لهم..
صديقتي اللي معاي بالمكتب شرتها من المحل اللي جنب بيتها وماشاء الله هرست الفواكة هرس.. وبالأمس جربنا البطاطس والجزر قلنا نشوف درجة طحنها.. ماشاء الله هرست الأكل هرس
طبعا الخلاط تجي معاه 3 برطمانات زجاجية لتحفظي الأكل بالثلاجة لكذا يوم....عجبني حجمها صغير حتى لو بتطلعين وبتاخذينها معاج..
وهذي هي صورة الخلاط....
ولبنات البحرين هذا هو سعره في أي ماكس ب 18.900 يعني قولوا 19،، المحل اللي تروح له صديقتي بالرفاع يبيعهم ب 21 دينار بس قالت له كل مكان ب 19 وعطاها إياها بهالسعر.. يعني لايقصون عليكم.. يمكن تقولون السعر غالي بس لو قارنتوها باللي موجود في سنتربوينت بتشوفون مافي فرق وايد والأهم إن معاها الزجاجات..
وعلى فكرة حصلت هالمعقم هدية لبنتي بعد من شركة مولينكس بس مافتحته لأن أمي بالمرة ماتحب التعقيم الا على الطريقة القديمة في القدور... حد مجربها منكم؟؟ وشلون تعقيمها؟؟؟؟
سامحوني هذرت عليكم وايد وقلت لكم قصة حياتي.. بس دوم أحب لما أستفيد من شي أفيد الأمهات اللي معاي بالمنتدى يكون ياخذون فكرة..
اللي يعجبها موضوعي مابي منها غير دعوة (ربي يحفظ لي عيالي من كل شر ويبلغني فيهم)
