يالاه نستعد معا لرمضان - كل سنة وانتن طيبيات

zeyood;10085399:
كل سنة وانتن طيبيات يا اخواتى العزيزات
عايزة اعرف كل واحدة فيكم بتقضى رمضان ازاى وايه استعداها لرمضان
عايزين هنا نعمل ملف لاكلاتنا وعزيمنا واهتماماتنا بالبيت والاولاد
يعنى :-
1- بتفرزى الاكلات ولا كله طازة ؟
2- احب الاكلات التى تقومى بعملها دائما فى رمضان ؟
3- نسبة العزايم لديك اقد ايه فى هذا الشهر الكريم وايه اهم الاكلات التى تقومى بعملها فى العزائم ؟ وعادة عدد المعوزميين كام
4- كيف تقومى بالاهتمام بالبيت لاستقبال العزائم ؟ وهل تقومى ببعض التجديدات ام تنتظرى للعيد
5- احلى الحلويات التى تكثرى منها فى رمضان ؟
6- اذا كنت تجيدى صنف معين من الاكلات او الحلويات برجاء ذكره فى هذا الملف فنحاول ان نجمع هنا اكبر قدر من الاكلات والحلويات الناجحة تكون مرجع لنا فى رمضان
7- اذا كان عندك اولاد ؟ كم اعمارهم وعددهم وكيف تتعاملى معهم لتقومى باعداد الطعام وايضا التفرغ للعبادات
8- والاهم بقى كل واحدة تحاول تقدر لنا الميزانية المحتملة فى هذا الشهر الكريم بالنسبة لها وتفاصيل الميزانية ايه .

يالاه عايزين تفاعل يا عروسات وان شاء الله حابدا معاكم لما اشوف تفاعلكم اذا كان الموضوع يعنى لكم شيئا - ولا تنسوا تقييم الموضوع اذا اعجبكم
وارجو اخواتى اذا استفدتم من هذا الموضوع مع بداية رمضان " لا تحكموا الان الا بعد التفاعل منكم " ارجو ان تدعو لى ان ما فى رحمى يكون بنتا جميلة معافاة

Boody we zady;10086832:
موضوعك حلو قوي يا زيوووووووووووووووود

1_أنا بحب الأكل ( الخضار يكون طازة ما دام في موسمه ) بس عادي اللحمه و الفراخ عشان مش جنبي سهل أجيب فجبته و حطيته في الفريزر

2- و الله الواحده لازم تنوع في رمضان

3-طبعا أهل جوزي لازم نعزمهم و ساعات أصحابه بس أهلي عشان في مدينة تانيه فا مش بيجوا

4- كل التجديدات طبعا للعيد ان شاء الله

5-الحلويات الباردة عشان الدنيا حررررررررررررررر

6- عندي بودي و زادي ربنااااااااااااااااا يهديهم يا رب مش عارفة حأعمل ايه خايفة أفطر بسببهم هههههههههه

7- عن نفسي بصرف بزياده عن كل شهر بس بحاول أجمع كل حاجتي قبل ما يبدأ ان شاء الله

zeyood;10085399:
كل سنة وانتن طيبيات يا اخواتى العزيزات


وانتي والأمة الإسلامية كلها بخير وسلام :)


عايزة اعرف كل واحدة فيكم بتقضى رمضان ازاى وايه استعداها لرمضان
عايزين هنا نعمل ملف لاكلاتنا وعزيمنا واهتماماتنا بالبيت والاولاد
يعنى :-
1- بتفرزى الاكلات ولا كله طازة ؟
الخضار بشتريه مثلج واللحوم كمان والسمك الفيليه والجمبري بس طبعا متنظف
اما الدجاج بالذات والسمك البلطي بجيبه طازة عشان بيبأة فيه زفارة لما يتفرزن
الخبز بشتريه كمية وافرزنه وكمان جتلي مانجو من مصر قطعتها قطع وفرزنتها عشان نشربها في رمضان، وناوية ان شاء الله اقطع بصل واهرس توم واحطهم في الفريزر اختصاراً للوقت عشان انا بشتغل.


2- احب الاكلات التى تقومى بعملها دائما فى رمضان ؟
بصي هو جوزي متعود ياكل اول يوم (بط - ملوخية - كشك - مكرونة بشاميل - غير بأة السلطات وشوربة لسان عصفور لازم)

أما انا فمتعودة مع أهلي (رز بالخلطة - لحم عرق رستو - جلاش باللحم المفروم - بابا غنوج - وأي نوع خضار - دجاج)
وبما اننا اول يوم بنفطر عند ماما فتقريبا النظام التاني هو الي ماشيين عليه، اما انا أكتر حاجة بحب اعملها البابا غنوج والجلاش باللحم المفروم اتعودت عليها فرمضان وكمان القطائف


3- نسبة العزايم لديك اقد ايه فى هذا الشهر الكريم وايه اهم الاكلات التى تقومى بعملها فى العزائم ؟ وعادة عدد المعوزميين كام

بالنسبالي ممكن اعزم مرة أهلي واصحاب جوزي بقسمهم على مرتين ومرة جارتي.. بس رمضان دة شكل العزايم فيه هتبأة اكتر عشان صحاب جوزي بيتجوزو وهضطر اعزمهم هم وزوجاتهم :D:confused:

بالنسبة للأكلات طبعا نوع من المحاشي + نوعين لحوم ونوع دجاج + اي اكل بيتعمل في الفرن سواء مكرونة بشاميل او جلاش باللحم المفروم، واهم حاجة السلاطات والشوربةو العصائر ووالحلويات.. طبعا انا دايما بحب اعمل الحاجة الي بتميز فيها..

وفي ناس هعزمهم على سمك وجمبري اسهل ح اجة بصراحة
وبنوع فيهم علا اد ما بقدر


4- كيف تقومى بالاهتمام بالبيت لاستقبال العزائم ؟ وهل تقومى ببعض التجديدات ام تنتظرى للعيد

انا الحمدلله جبت خدامة غسلتلي السجاجيد والستائر وحيطان المطبخ والحمام (أعزكم الله) والثلاجة.. اما انا فعلي الترتيب يعني بصراحة هوو دة التجديد الي بحب اعمله.. انظم بيتي اكتر لأن عندي طفلين مبوظنلي الدنيا خالص
وكمان لية طقوس خاصة قبل رمضان وهي اني اجمع الفوانيس بتاعتي وبتاعة اولادي من السنين الي فاتت واعلقهم في سلك منور على الحائط وبين كل فترة والتانية اشغلهم كلهم مع بعض اولادي بيفرحو بيهم اوي.
اما اهتمامي بالبيت لاستقبال العزائم بيكون اهم عندي من الأكل نفسه، لأني بحضر من ابلها بيوم كل حاجة.. تنظيف وتلميع وتعطير وفنفس اليوم بخرج ادوات السيرفيس برة في الصالة من اطباق شوربة لأطباق غرف لشوك ومعالق لأكواب.. عشان افضي المطبخ وكمان عشان تبأة الحاجة دي جاهزة من ابل الفطار ومجيش ساعتها اترخم بحاجة
كمان اهم حاجة عندي لاستقبال الضيوف ان يكون حمامي نظيف ومحضرة صابونة جديدة وفوط نظيفة الفهم بطريقة حلوة وشيك، غرفة نومي فارشة فيها مفرش جديد عشان لو حصل ان زوجة حد من صحاب زوجي دخلت غرفتي، وطبعا السجاجيد معمولة بالفرشة ومعطرة كويس هي والفرش والستائر.. وبحاول اشغل شمعة معطرة في الصالة طول منا واقفة في المطبخ عشان تخلي البيت ريحته كويسة


5- احلى الحلويات التى تكثرى منها فى رمضان ؟

مفيش احلا من القطائف والكنافة بالقشطة وو كمان الجلاش بالمهلبية.. دي احلا حاجة بحب اكلها في رمضان.


6- اذا كنت تجيدى صنف معين من الاكلات او الحلويات برجاء ذكره فى هذا الملف فنحاول ان نجمع هنا اكبر قدر من الاكلات والحلويات الناجحة تكون مرجع لنا فى رمضان

بصراحة في حاجات كتير بعرف اعملها وكويس اوي، بس مش هينفع اكتبها دلوقت نظرا لضيق الوقت

7- اذا كان عندك اولاد ؟ كم اعمارهم وعددهم وكيف تتعاملى معهم لتقومى باعداد الطعام وايضا التفرغ للعبادات

عندي طفلين بنتي الكبيرة عندها سنتين ونصف وابني الصغير عنده 7 شهور، وبصراحة معذبني خاصة في موضوع التنظيم والترتيب.. مكركبنلي البيت خالص وما عندي اي خدامة

عشان كدة ربنا يستر رمضان دة.. انا هحاول اعمل الأكل من ابلها بيوم عشان اروح تاني يوم الصبح الدوام واجي احاول انام وانيمهم معايا شوية وبعدين اقوم احضر في الأكل. بصراحة لسة مجربتش رمضان ومعايا ابني الصغير ربنا يستر
وبالنسبة للعبادات مافي اي وقت لأي عبادة.. ولادي مضيعين كل وقتي .. والله حتى النوم ما بنام

8- والاهم بقى كل واحدة تحاول تقدر لنا الميزانية المحتملة فى هذا الشهر الكريم بالنسبة لها وتفاصيل الميزانية ايه .

بالنسبة للميزاينة بصراحة رمضان شهر البركة، يعين كل حاجة بيبأة فيها بركة.. بس هي ممكن تزيد شوية عشان العزايم..

يالاه عايزين تفاعل يا عروسات وان شاء الله حابدا معاكم لما اشوف تفاعلكم اذا كان الموضوع يعنى لكم شيئا - ولا تنسوا تقييم الموضوع اذا اعجبكم
وارجو اخواتى اذا استفدتم من هذا الموضوع مع بداية رمضان " لا تحكموا الان الا بعد التفاعل منكم " ارجو ان تدعو لى ان ما فى رحمى يكون بنتا جميلة معافاة

أسأل الله العلي العظيم ان يرزقك فتاة جميلة مسلمة صالحة كاملة الخلقة سليمة معافاة وأن يقر عينك بها .. اللهم آمين