السلام عليكم ورحمة الله وبركاته
بنات شحالكم وشو اخباركم ان شاء الله طيبين
اول شي انا من الامارات وتوي عرفت ان المنتدى مش اماراتي استغربت بس مب مشكله
والله ما عرفت اشكي لمين ولا احكي لمين غير بدايةً رب العالمين وثم عبادة جنس حواء الطيبين
بنات اللي تقدر تفيدني وتساعدني وربي بدعيلها ليل ونهار
قصتي ان زوجي ملج علي وهو حالياً متقاعد من سنتين وعمره حالياً 25 سنه - تقاعد لانه اصيب بمرض السكر عافاه ربي ان شاء الله . زوجي العزيز يحبني ويبيني اكون وياه اليوم قبل باجر ويحلم باليوم اللي بنجتمع فيه مع بعض بس المشكله انا مب قادرين نعرس لان راتبه التقاعدي قليل جدا ما يغطي مصاريف العرس وانتوا تعرفون, هو ملج علي وسلمني مهري بس 20 ألف والباجي اتفق مع اهلي على جدام ان شاء الله واهلي قدروا وضعه .. زوجي راح يقدم مره ثانيه بالقوات المسلحه عساس يردونه يشتغل بس ما وافقوا عليه بحكم مرضه وقعد يترجا فيهم بس بدون فايده حتى حالته النفسيه دمرانه ما يرمس ما يسولف ولا يضحك ( يقولي هالمرض دمر حياتي ومستقبلي بس هو راضي فيه ودوم يقولي ابتلاء من رب العالمين وصابر ) كل يوم زوجي يحلم بيوم عرسنا وانا احلم اني اكون له أحلى عروس ونتمنى ان هالحلم يتحقق. بنات ارجوكم أرجوكم رجيتكم لرب العالمين اللي تقدر تساعدني بشي ان زوجي يتوظف بالامارات والله العظيم اني بدعي لها طول عمري وبحياتي ما بنسى جميلها, اللي تعرف اي حد ممكن يساعد زوجي او يشغله بشغله محترمه والله انها بسوي لنا جميل ما بنساه لها طول حياتي..
وتذكروا قوله تعالى: من نفس عن مؤمن كربة من كرب الدنيا ، نفس الله عنه كربة من كرب يوم القيامه
بنات رجيتكم تدعون لزوجي بالشفاء من هذا المرض أرجوكم
محبتكم : عاشقة زوجي