الى الحوامل اللواتي يلدن في شهر سبتمبر (9)

السلام عليكم ورحمة الله وبركاته

شخباركم حوامل ان شاء الله بخير

وحشتوني صار لي فترة ما دخلت

شخباركم ويه الحمل ان شاء الله كل اموركم تمام الله يتمم لكم على خير

الصراحة انا تعبانة واااايد ونفسيتي زفت بس قلت ادخل اقول لكم عن سبب تغيبي عن المنتدى كل هالفترة

الصراحة انا فقدت الجنين تاريخ 11/7 يوم السبت وطبعاً تعرفون انها بنت

والقصة

ليلة السبت كانت تتحرك الطفلة بشكل طبيعي وحتى الصبح لما قعدت كانت تتحرك طبيعي المهم قمت لبست ونزلت بيت عمي ولما ركبت شقتي اشوفها ما تتحرك انسدحت عشان تتحرك مافي شي اكلت ليما فطست بعد ماكو شربت ماي بعد ماكو قلت يمكن لان الجنين كبر من جذي تقل حركته قلت ان شاء الله خير وتتحرك عقب شوي وكنت كل شوي يعني بين كل نص ساعة تقريباً احس بشد في بطني قلت اكيد الجاهلة قاعدة ليي في صوب واحد ومو عارفة تتحرك قمت تمشيت في الشقة ومثل الحال تغديت واكلت برتقال بعد مثل الشي واني ما ابي اقول لزوجي واختي مسكينة رايحة السعودية تكمل لي باقي الاغراض وكل شوي تتصل مستانسة تقول لي وش اشترت لبنتي واني قلبي يعورني بس ما ابي اقول لها لا تتضايق المهم جت المغرب سبحت وصليت وقلت انزل تحت يمكن مع الازعاج والسوالف تتحرك نزلت تحت وقعدت وسولفت واكلت حتى اسكريم بارد اكلت عشان تتحرك مثل الشي مافي حركة اهني خلاص ما قدرت اتحمل اتصلت لزوجي وقلت له تعال ودني بيت ابوي الجاهلة ما تتحرك يمكن لي رحت اهناك وشافت الاغراض اللي شرتهم خالتها لها تتحرك جى واخدني واني طالعة من بيت عمي شافوني حمواتي واستغربو طالعة هالحزة وين بتروحين؟؟؟ قلت لهم السالفة وخافو عليي عدل المهم رحت بيت ابوي وقلت لاختي بالسالفة جان تعصب وتتصل المستشفى الامريكي وتقول لي بسرعة قومي وبيت عمي كل شوي اتصال يتطمنون علي قلت لها لا لا تتعبين روحش انتين توج جاية من السعودية وباجر عليج دوام من الصبح بروح السلمانية اتصلت في زوجي وقلت له ارجع لي بروح المستشفى المهم رجع ورحنا السلمانية وخبركم نص الليل بس زحمة وعلى ما جى دوري دخلت وقلت لهم الموضوع ودوني عشان التخطيط والا الممرضة مو محصلة نبض واني بموت من الخوف قامت اخدتني للدكتورة عشان يسووون لي التراساوند وسوت لي والا الصدمة تقول لي ...والله مادري وش اقول لج بس ما قاعدة اشوف حركة ... اني اهني سيدة قعدت اصيح ودبحت روحي وقالت لي تبين تترقدين قلت لها لا ورميت الاوراق وطلعت اصيح وقلت لزوجي قال لي لا تخافين يمكن اهني غلطانين واني حالتي حالة رجعت البيت وخبركم صياح ونياح والكل يسكت فيني ويقولون لي يمكن غلطانين السلمانية ومادري شنو صبري باجر بنروح الامريكي واني طول الليل صياح وامي تقرأ قرآن وتدعي وتتوسل المهم قعدت الصبح واختي راحت الدوام الا دكتورتي دوامها الساعة 3 العصر واني دابحة روحي من الصياح لا أكل ولا شرب لما جت العصر رحت المستشفى ودخلت على الدكتورة وسوت لي التراساوند ومثل الشي انصدمت لان كل شي فترة الحمل كان تمام ما عرفت وش تقول لي واني سيدة قعدت اضرب روحي واصيح والكل هناك تجمع الدكاترة والمسؤول رجال ونسوان والكل يجودني يبون يهدؤوني واني مثل المجنونة اصيح واضرب في روحي المهم وهذي حالتي ذاك اليوم يوم ثاني من الصبح رحت السلمانية وقلت لهم خلاص نزلو الجاهل سوو الاجراءات ورقدوني

وتمو يحطون علي طلق صناعي لمدة اربع ايام تميت مرقدة وعلى الطلق دبحوني دباح والحمدلله ولدت يوم الجمعة

والحمدلله بس بعد نفسيتي تعبااااااااااااااانة ثمان شهور بدش التاسع وفرحانة اول حفيد للعائلة واول مولود لي وعقب ما كملت الاغراض كلهم راحت مني في لحظة
مو قادرة ادش المنتدى اتذكر سوالفي وياكم بس قلت لازم اخبركم ..

بتوحشوني وبيوحشني تجمعكم وااااااااااااااااايد

اشوفكم على خير وادعو لي الله يعوضني عن اللي راحت

وان شاء الله كلكم تقومون بالسلامة يا رب