إستفسار عن مرض هجرة بطانة الرحم

الدكتورة منيرة.. السلام عليكم ورحمة الله وبركاته

صديقتي مصابة بحالة صنفها أكثر من دكتور في أكثر من مستشفى بالبحرين على أنها مرض يدعى هجرة بطانة الرحم

وبالبداية قبل زواجها مسكينة صار لها أكياس بالرحم كبرت لدرجة استدعت انهم يسون لها عملية مثل القيصرية حتى يشيلون هالأكياس.. وبعد زواجها صار لها نفس الشي والاكياس كانت اكبر، وشالوهم لها مرتين أو ثلاث بس مو بعملية جراحية.. سووها عن طريق المنظار المهبلي.

الدكتور كان يكتب لها حبوب تمنع الدورة الشهرية لكم شهر حتى يريح الرحم من الاكياس والتجمعات الدموية.. وطول هالفترة كانت تعاني من التهابات شديدة بالمثانة وأثناء التبول أعزكم الله.. بالاضافة إلى انها دايما تحس نفسها جاااافة تماما حتى من الافرازات العادية اللي تتعرض لها اي وحدة.. وهالشي وايد مزعج بالنسبة لها..

كان الدكتور اللي يعالجها مخطط لها أنه يضبط لها الدورة ويساعدها على أن تحمل ولكن الله ما قسم هالشي لانها تطلقت للأسف.. وقال لها الدكتور الحين ما اقدر استمر في وصف الحبوب اللي تقطع الدورة الشهرية لفترة طويلة .. يعني لازم توقفينهم ونشوف شلون بتكون الدورة

صار لها مسكينة الحين 7 شهور تقريبا والدورة عندها غريبة عجيبة.. تنزل يوم وتختفي وبعد كم يوم او اسبوع ترجع تنزل بس بكميات قليلة.. والآلام اللي تصاحب الدورة وايد قوية لدرجة انها تضطر تروح المستوصف يعطونها ابرة مسكنة تنومها طبعا بس ما تعالج المشكلة.

من اسبوع تقريبا جاتها الدورة لمدة يومين بكمية قلييييييلة.. وبعدها اختفت تماااااااااما لاحس ولا خبر.. مسكينة ما بقى شي ما وصفناه لها .. ميرمية.. يانسون.. كركم .. حب الرشاد.. قرفة..... لا حياااة لمن تنادي.. المسكينة معدتها تقطعت والدورة ما نزلت بالمرة.

دكتورة الله يخليج وجهيها شلون تتصرف.. المشكلة ان دكتورها ترك البحرين ورجع ديرته.. وهي مو عارفة شلون تبدأ مع دكتور جديد مرة ثانية وتشرح له وضعها الصحي من جديد.

آآآآسفة على الإطالة .. بس قلت اشرح لج بالتفصيل عشان تفيدينا بإذن الله