خوف وابي اهون .. انصحوني

عزيزتي الغالية ..

والله والله وكأنج ترمسين عني بالضبط .. بس الفرق بيني وبينج إن لج تجربة سابقة وأما أنا لا ... يعني إنتي ملجتي وجربتي وعقب تطلقتي .. أما أنا ما جربت بعدني بالمرة .. بس انا أمر بنفس الشعور والأحاسيس حى يمكن اصيح مع إني ما جربت ولا ملجت ..

تدرين الغالية .. لما دخلت العشرين بدوا ماشاءالله الخطاب يتقدمون لي طبعا بحكم إني صغيرة وعندنا بالإمارات يشوفون عمر البنت كونها صغير ما يهم الحريم أخلاقها ولا جمالها المهم البنت تكون صغيرة حتى لو تكون خسفة المهم صغير ة العمر .هذا عندنا بالإمارات وبمجتمع الحريم خاصة .... المهم كان عمري 20 سنه والناس بدت تخطبني ساعتها انا كنت احس بخوف فضيع وضيق وارفض على طول ...عقب ما ارفض ارتاح وافرح اني رفضت بس اهلي وايد كانوا يلوموني ويتعبون من النصايح لي وايد كانوا يحاولون معاي عشان أوافق على واحد منهم بس انا كنت أرفض بدون تفكير وبدون استخارة كنت ارفض بخوف مني وضيق غريب كنت احس فيه ... كنت ادور شي وسبب عشان ارفض وادور فيه العيوب واتحجج عشان يكون سبب مقنع للرفض بس اهلي كان يحزنون على الخطيب المتقدم لأنه وايد كان زين .. حتى امي كانت تزعل مني لأنني كنت عنيدة وارفض صدق بجهل مني ... وكنت اقول لهم بعدني صغيرة ابغي استانس شوي ...كنت اقول لهم صدقوني المرة الياي بوافق ولا بخاف ولا بصيح مثل الطفلة كنت اخاف افارق امي ..

ومرت الأيام وانا كل مرة أقول بخاطري المرة الياية ما برفض وبوافق على طول . ويتقدم لي شاب زين ويرجع الخوف والضيق والصياح ويكون البيت كله ينصحني عشان اوافق بس انا ارفض رفض يمكن اصيح ما ابغي .. بس والله والله إني ابغي اتزوج بس يمكن الخوف كان لاني بفارق أهلي وبفارق أمي وكنت اخاف يمكن يكون الريال مب زين عقب العرس او يمكن ما اتوفق بزواجي او يمكن اتطلق او يمكن وايد افكار كانت تحضرني .. انزين بس السبب الاول إني ما ابغي افترق عن اهلي وعن امي .. كنت احس إني بعدني مب مستعدة للزواج.. كنت أحس بشعور الطفلة اللي تصيح بأول يوم لها في الروضة وام الطفلة تحاول مع طفلتها تروح الروضة هذه الطفلة كانت أنا ...


إختي الغالية مرت الايام وصديقاتي تزوجوا كلهم وحده عقب الثانية وانا بعدني بخوفي والضيق بس هم يتزوجون على طول وحده ورا الثانية بدون خوف وضيق .. كنت افكر ليش انا بالذات كنت اصيح واتضايق من نفسي .. ليش ارفض العرسان ليش اخاف من فراق اهلي ليش اخاف من مشاكل الزواج ؟؟ يمكن من كثر ما اسمع حالات طلاق بالجرايد واالنت والتلفزيون .. كنت اقول بنفسي ليش صديقاتي ما يصدقون عمارهم لما يدق بابهم خطيب ويوافقون عليه شو ما كان الريال المهم زوج .. اتصدقون يوافقون بسرعه وبفرح كبير أما انا بصياح وخوف وضيق وعقب من حنتي يتم الرفض وعقب ارتاح...

إختي الغالية أنا ضيعت فرص ثمينة بسبب خوفي والضيق والصياح والرفض المستمر .. انا رفضت ناس وايد زينين تتمناهم اي بنت .. بس كنت غبية ومجرمة بحق نفسي ..

انزين والحين صار عمري 27 سنة ومحد يدق بابي خلاص .. لأني قلت لكم عندنا في الإمارات الحريم ما يخطبون البنت الللي عمرها 27 و28 و 29 خلاص يعتبرونها عيوز ...

مع إن شكلي والله كأن بنت عمرها 21 ..

إختي الغالية انا الحين وايد ندمانه واحس نفسي مستعدة للزواج بس شو الفايدة عقب الشو ؟؟ عقب ما فات الفوت ما ينفع الصوت .. احس عمري ما بتضايق ولاباخاف شرا اول .. أحس عمري صدق ابغي اعيش كزوجة وأم عيال ...

واللله إني استحي من نفسي بنت عودة عمري 27 سنة ومب امعرسة ..

اللهم اغفر لي بسبب جهلي .. انا أموت ضيق يوم ورا يوم .. صدق صدق انا ندمانه .. وابغي اعرس اليوم قبل باجر ..

اتمنى ربي يسامحني ويغفر لي بجهلي ورفضي قبل للعرسان والله أني الحين ابغي اتزوج لإحساسي إني مستعدة الحين خلاص كبرت وابغي اعيش مع زوج .. يارب ربي يغفر لي ,,,

صدقيني اختي انتي تشبهيني وايد .. تدرين اشوفالدمعه في عيون امي الغالية ..احس انا السبب ..امي تناظرني بعيون حزينة اشوفها تباني استقر .. امي اتشوفني وايد كئيبة ..صدقيني ما ارمس ولا اكل ولا احب اتكلم وايد مع حد لاني كله ياسه وندمانه .. تتمنى اتشوفني عروس على الكوشة .. انا وايد حزينة عشان امي لاني انا سبب حزنها ..انا ما فرحت امي شرات ربيعاتي .. صدق صدق ابغي اعرس الحين ياريت انخطب .. صدقوني انا وايد ندمانه كبر شعر راسي .. انا الحين اكتب والدموع بعيوني ...

اسمحي لي على الاطالة

اختيه فطومة والله ثم والله نفس اللي يستوي لي .. نفس الشعور ونفس الأفكار
جانج نسخة عني او جانج انا بالضبط
تعبت من هالافكار وتعبت من هالشعور والناس كلتني وكلت اهلي وخواتي

بزواجي الأول غصبت عمري بس عسب ارضي امي وابوي بس للأسف ما قدرت اكمل وكنت صغيرة يوم تقدم لي !! كنت بعدني 17 و يوم كملت الثانوية ملجت !! المهم سالفة الزواج الاول طويلة واستوت عدة مشاكل ..

ارجع للموضوع الاساسي وهو الخوف والضيق ... انا فعلا كنت بديت اقتنع اني مريضه او فيني مس والعياذ بالله
تجيني حالة ضيق فضيعه واتم اصيح واصيح بشكل منهار ..

حبيبتي فديتج لا تقسين على عمرج جيه !! ماتدرين رب العباد شو مخبي عنده والارزاق بيده ..
احسني الظن بالله وكثري الاستغفار .. صدقيني هذا اللي اسويه دوم والقى رب العباد دوم وياي ويطيب خاطري
هالعريس ابدن ما كنت متوقعتنه .. منو يبا مطلقة ؟؟! حتى لو ما صار دخول :)
تميت استغفر الله واكثر من الاستغفار مب عسب يرزقني بالرجل الصالح وبس ولكن عشان يغنيني عن الناس ويكفيني شرهم والحمدلله بعد طلاقي كملت دراسة واشتغلت ^_^


الله موجود فقط احسني الظن بالله ... اكثري الاستغفار وبتشوفين العجب والله اني مجربة وصار دواي الاول والاخير

الله يرزقج بكل اللي تتمنينه حبيبتي ومشكورة عالرد

عزيزتي الغالية ..

كنت أحس إني بعدني طفلة صغيرة يعني ما كانت عندي رغبة اني اكون مع زوج كان شعوري مثل الاطفال مع إنه كان عمري 21 او 22 لين 25 كنت احس بعدني طفلة .. كنت احس طفلة وناس غرب بياخذونها من اهلها فأخاف واصيح واقول لأهلي لا انا بعدني طفلة ليش تبون تفتكون مني .. بس ربيعاتي شعورهم مختلف عني بالمرة كانوا يفكرون بالزوج وكانت فيهم الرغبة والشهوة والارتباط بزوج وريال.. والله مب دلع مني ولا تكبر ولا غرور اني كنت ارفض عرسان وايد زينين والله ربي الشاهد على كلامي .. بس السالفة اني كنت اشوف عمري ياهل وما كانت عندي الشهوة والرغبة اني ارتبط برجل ... تدرين وكنت اسمع من التلفزيون وكنت اقرا في النت والجرايد والمجلات عن مشاكل الزوج وهمومه وكيف الازواج ما يقدرون وكيف يكون الشاب في ايام الخطوبة مثل السمن على العسل ويسوي فلم هندي لخطيبته ولما يسكرون الباب على عمارهم ويخلص العرس تبدأ المشاكل والخيانات الزوجية وتدخل ام الزوج او سوء معاملة خوات الزوج كل هذا خلاني انفر من الزواج واخاف وايد واضيج وايد .. اخاف ابتعد عن اهلي .. ماشاءالله مافيني شي غير هذا الشعور ... ماشاءالله مافيني شي لا سحر ولا عين لاني اقرا على عمري ماشاءءاالله ليل ونهار .. صدقيني اللي فينا انا وانتي مب عين ولا سحر
تدرين كنت اعتقد اني الوحيد اللي اتصيح واتخاف لما يخطبونها ناس بس اكتشفت اني في حد غيري شراتي .. صدق صدق انا ندمانه .. واحس الشعور اللي في داخلي اني ابغي اصير ام وابغي ارتبط بزوج صالح ياني الحين متأخر .. شو الفايدة ,. الحمد لله على كل حال .. البنت حلاته اتعرس وهي صغيرة ..يالله الحمد لله على كل حال
اذا تبين اترمسيني راسليني على الخاص...

هيه حبيبتي فاهمه لأنها نفس الأفكار ونفس الاعتقاد ..
ومع ان الحال ما يسر الا اني ارتحت لما عرفت اني هب الوحيده اللي عندها هالشعور .. يعني سامحيني اختيه
الواحد يوم يشارك هموم غيره سبحان الله تهون عليه بلوته .. ومشكورة انج شاركتيني
ما تتصورين شقد اقدر لج هالمعروف

الله يرزقج بكل اللي تتمنينه ويستر عليج ويفرج همج اختيه