صباحكم خير و سعادة إن شاء الله...
أكيد كلكم تعرفون هذي الفاكهة...
احنا نسميها خوجة، و في ناس يسمونها بخارى أو خوخ أحمر... و أساساً اسمها برقوق :)
من فترة زوجي جاب كرتون، فقلت خلني أدور لي طريقة نستفيد منه بدل ما يخيس...
عاد دورت و لقيت هالطريقة على موقع أجنبي... و طلعت الحمد لله لذيذة...
تقريباً نفس نكهة كيكة الأناناس المقلوبة، فيها طعم حامض حلو :)
نبدأ بسم الله...
نحمي الفرن على حرارة 350... و نجيب قالب التشيز كيك و ندهنه بالزبدة... لكن في البداية تأكدوا إنه لما تصبون فيه ماء ما يتسرب منه، عشان نضمن إنه ما يسرب خليط الكيك...
الطبقة الأولى:
3 ملاعق كبيرة زبدة
ربع كوب سكر بني (وقتها ماكان متوفر عندي، فاستخدمت سكر عادي)
4 ثمرات خوجة مغسولة زين و مقطعة شرايح رفيعة
نحط الزبدة و السكر في قدر صغير...
نرفعهم على نار هادية، و أول ما تذوب الزبدة و تبدأ تطلع فقاقيع، نصب المقدار في صينية التشيز كيك اللي جهزناها...
نترك الصينية على جنب، لحد ما يبرد خليط الزبدة و السكر، بعدين نصف فوقه شرايح الفاكهة...
نبدأ من جوانب الصينية، و نخلي شوي من قطع الفاكهة طالعة على الحواف...
الحين نجي لخليط الكيك:
أول شي المواد الجافة:
كوب و ربع طحين
1 و نص ملعقة كبيرة بيكنج باودر
ربع ملعقة صغيرة ملح
ربع ملعقة صغيرة قرفة
ننخلهم مع بعض مرتين، و نتركهم على جنب...
باقي مقدار الكيكة:
60 غ = 6 ملاعق كبيرة زبدة لينة
كوب سكر
بيضة
ملعقة صغيرة فانيلا
4/3 كوب حليب سائل
نخلط الزبدة و السكر مع بعض...
و نضيف عليهم البيضة و الفانيلا، و نخلط لحد ما يصير قوام الخليط مثل الكريمة...
نضيف نصف مقدار الطحين و نصف مقدار الحليب، و نخلط شوي بس، يعني لما يمتزجون نوقف، و نضيف باقي الطحين و الحليب و نخلط لحد ما يختفي الطحين... ما نكثر خلط...
الخليط بيكون ثقيل شوي، مو سائل... فلما نجي نحطه في الصينية، نستخدم ملعقة كبيرة و نوزعه بحذر فوق الفاكهة اللي صفيناها، عشان ما تتحرك من مكانها و يخترب شكلها...
ندخلها الفرن في الرف الأوسط لمدة 45 دقيقة... نطلعها و نخليها ربع ساعة بعدين نفك القالب و نقلبها...
و انتبهوا، لازم تقلبون الكيكة و هي ما زالت دافية... إذا بردت تماماً، السكر بيمسك في الصينية و بتلصق شرايح الفاكهة فيها...
و هذا شكلها النهائي...
و عليكم بألف عافية (f)