سلام من الله عليكم عرايسناا الحلوين
طبعا اني عضوة بينكم بس بصراحة حبيت ادخل باسم ثاني عشان اعرض لكم مشكلتي العويووويصة
يمكن فيه عرايس تعرف مشكلتي فبيعرفوني حتى لو غيرت اسمي ،، وفيه ناس من القصة نفسها بيعرفوني حتى لو ماكانوا يعرفون اني مشاركة اصلا في منتدى عروس
حبيت اعرض لكم مشكلتي واستمع لآرائكم ونصايحكم فيها
يمكن تكون طويلة ماعليش اتحملوني واقراوها كلها ،، بتشوفون العجب فيها ،، ويمكن فيه ناس مروا بمثل حالتي فالامر عندهم عادي
يمكن تكون طويلة ماعليش اتحملوني واقراوها كلها ،، بتشوفون العجب فيها ،، ويمكن فيه ناس مروا بمثل حالتي فالامر عندهم عادي
المقدمة طويلة ماعليش خواتي
المهم // اني متزوجة من سنوااااااات وعندي ولله الحمد عيال ربي يحفظهم وخليهم وعايشة مع اهل زوجي بس في ملحق فوق واكلي برووحي يعني تقريبا مستقلة عنهم
الحمد لله علاقتي بزوجي منيحة وعال العال ،، بس مشاكلي بدت من زوجة اخو زوجي ،، ماقط مرة اديتها لو تدخلت في حياتها ،، بس هيه على طول نافخة روحها على الناس وعندها عيال الناس في الارض وعيال فوق فوق ،، وبين يوم وليلة رايحة ليها لباب شقتها طرشت الشغالة تصك الباب في وجهي ومن يوم ماكانت تكلمني بدون سبب !!
واللي خلاها تحط دوبها ودوبي انها كانت تبني ليهم بيت وعندها مكان في بيت اهل زوجي فاهل زوجي قالوا لزوجي لما اخوك يطلع من شقته ،، روح مكانه حتى يكون ليكم المكان اوسع !! ،، اهنيه صارت المشكلة
من سمعت رفضت رفض تام ،، بحجة انها تعبت في الشقة !!! ومن سمعت اني هالكلام رفضت اني اروح مكانها ،، مع ان ابو زوجي عارضها وقال ليها ان نص التكاليف كانت على حسابي وانتي قعدتي فيها سنواااااااااات وراح كل شي فيها فمالش حق حتى في الطابوق !!! وززادت المشكلة سوء وظلت حاطة دوبها ودوبي واني ساكتة عنها،، لدرجة انها ترمي ثيابي من الحبل !! وتحط الاغراض صوب باب شقتنا على اساس مااقدر افتح الباب ،، ووصل فيها المواصيل اني اشوف بودرة واشياء صغيرة تحت الباب !! وبعد ماسالت قالوا لي انتبهي ترى يمكن يكون عمل والله اعلم!! ونسيت اقول ليكم ظلت تتصل وتقول ليي ترى حلمت ليش حلم ورحت فسرته وطلع ان بيت اهل زوجش يصيرون ضدش فابتعدي عنهم من الحين احسن !!!وصادني خوف على عيالي اكثر شي وعلى زوجي
المهم مرت الايام وظلوا عيالي يخافون منها لان من تشوفهم تقول ليهم مو مربين !!! بدون سبب ،، ولا تستحي على وجها راحت لزوجي تقول ليه رب اولادك بدون لا يتهاوشون وية عيالها لو شي !!! قال ليها زوجي مايدخلش في زوجتي ولا عيالي انقهرت عليه ورمت عليه وانتونبكرامة نعال!!! انقهر زوجي كلللش عليها وعلى اسلوبها بس خاف يضربها لان عيب وحرام اصلا يلمسها بس صرخ عليها صرخة فهيه قفلت الباب عليها ودخلت واتصلت لزوجها وجى ،، تخيولا وش سوت !!! جرحت ايدها بسكين وطلعت الدم وشققت ثيابها وهم عليها ونزلت تحت لبيت اهل زوجي تصيح ولدكم هجم عليي !!! اكبر جدابة واني زوجته قدامه شاهدة وحتى لو بخليه يهجم على مرة !!! وقامت تصارخ عليي واني خفت منها تقول ليي بوريش واني اقول ليها ويش سويت ليش عشان كل هالحقد !!! تخيلوا وش قالت ليي ،، تقول خلش قاعدة وياهم لكن بوريش بجيش اليوم اللي ماتشتهينهم !! اني هنيه خفت على روحي ،، وقلت لزوجي ياخرابي شكلها بتعمل لي عملة سودة وبتفرق بيني وبين اهل زوجي !!
وانتقلت المدام لبيتها وقال ابو زوجي لزوجي عشان نتقل مكانهم واني رافضة بس زوجي قال هذا حلال الوالد ومو من حقها تمنعنا عن شي ،، واهنيه زادت نيرانها وظلت اطرش مسجات بالهبل كل سب وتهديد واني ماقط مرة رديت عليها قلت خلها بتتعب وبتسكت ( وللعلم ترى ليما الحين محتفظة بالمسجات )
واهنيه الجزء الثاني من المشكلة خواتي ،، بعد ماراحت المدام بيتهم الجديدقلت انتهى الشر وراح اعيش اني وعيالي بسلام اتاريها طامة جديدة على راسنا ،، ظهرت لينا اخت زوجي الصغيرة عمرها في العشرين بس مو متزوجة وقاعدة بس تراقب عيالي مراقبة شديدة لدجة ان حتى لو نزلوا واكلوا ش يمن بيت ابوهم العود تصارخ عليهم وياويليهم لو ركبوا الدرج ونسوا يتركون نعالهم تحت تزفهم زف ،، والاكثر من جديه ان بين يوم ويوم اجي بنتي وشعرها منكوش ولما اسالها ماترضى تعلم وفي الاخير قالت انها عمتها تصارخ عليها ادا تنزل تحت وتجز شعرها ،، وحاولت اقلل نزول عيالي تحت عشان لا يسببون لي مشاكل اني في غنى عنها ،،، وطول هالفترة كنت ساكتة ومااتكلم ،، ليوم ظلت بنتي تكتب على جدار شقتنا من برة اجت ليها عمتها اخت زوجي وضربتها وصارخت عليها بتني خافت فدخلت الحجرة ،، وتخيلوا العمة الفاهمة وش سوت !! جت فتحت الباب بدون سلام ولا استئدان وصارخت على بنتي وقدامي اني وزوجي وسكرت الباب بقوةةةة ومشت ،، والشي اللي يقهر اكثر اني لا اني ولا زوجي تكلمنا لها ،، يوم طلعت قلت لزوجي وقفها عند حدها لمتى بنظل جديه ماتحتمنا كلش قال كل شي ولا زعل الوالد وهوه مايرضى عليها اخاف لو تكلمت ليها الوالد يزعل !!!!
وفي يوم كنا طالعين لاقت بنتي على الباب وماتذكر وش الموقف بالضبط بس المهم ضربتها واني ااضايقت كلش ونفس الشي ماتكلمنا ليها !! ورجعتي شافتني وسالتني وش فيش قلت ليها مافيني شي بس ترى اني اضايقت يوم تضربين بنتي لان طبعت ايدش في خدها !! واهينه انقهرت وقالت كيفي بنت اخوي ( تخيلوا بنت اخوها بس للضرب) ،، وقالت من يومها لا اعرفهم ولا يعرفوني ولا اني عمتهم ولا هم اولاد اخويي ولا ينزلون تحت ،، قلت ليها هدي بالش اني ماقلت جديه بس ترى مااحد يحب يشوف عياله ينضربون تحته ،، خصوصا انهم مايدرون بهم ولا يهتمون يهم فليش يصير ليهم الحق يضربونهم !!
المهم بعدها بيوم نزلت كان بيت اهل زوجي عندهم هاليوم نجمع على الغدى ،، فيوم اني دخلت وسلمت عفست وجها وماردت حتى السلام وظلت محبوسة في الحجرة ،، وكل مااروح مكان تطلع منه!! وحتى على الغدى ماقعدت رفضت تقعد ،، اضايقت اني من حركتها واللي ضايقني اكثر ابو زوجي مايكلمها وحتى يوم رن تلفونها على طول قام ابو زوجي ( وهوه كبير في السن وعنده الام في القدم) تخيلوا قام وعطاها تلفونها عشان لا تقابلنا !!! وتحملت اسبوع اسبوعين بعدها قلت بس ياعين استحي ولا انزل ولا شي مابموت من الجوع ادا مااكلت هاليوم من عندهم الحمد لله رب العالمين
المهم وهيه اصلا استانست ليش احنا مانجمع وياهم ،، وبعدها بفترة بس حسيت ابو زوجي يمر مايسلم مع العلم الاول لو يشوفني في اليوم اربع مرات يسلم !! واني اسلم عليه وهوه يادوبه يرد لو يرد وهوه قالب وجهه ،، ياربي وش هالتغير ،، قلت ماعندي الا اخت زوجي الكبيرة متزوجة وعندها عيال بس على طول في بيت اهل زوجي ،، مرت الايام حسيتها تراقب لعيال ،، ويوم بعد يوم جت تمنعنا حتى ان احنا نحط اغراض تحت الباب ،، حتى كبت الاحذية وانتون بكرامة رفضت نخليه برة تقول خلوه داخل واحنا شقتنا مو كبيرة ياربي وين نخليهم !!! لما انقطعت علاقتها بنا ،، وصرنا كاننا عايشين في عمارة بروحنا !! سافر زوجي ورجع ماعمرهم طقوا الباب سالوني ادا محتاجة شي اني وعيالي الحمد لله اني مااحتجت ليهم بس السؤال ترى يكفي !!
والحين ابغي كل من قرا قصتي يدعي ليي براحة البال ،، والله يهدي بيت اهل زوجي ويهدينا جميعا ان شاء الله
ادري يمكن ناس بتقرا القصة ماتعرفني بس من الاحداث بتعرفني
ادري يمكن ناس بتقرا القصة ماتعرفني بس من الاحداث بتعرفني
اني اللي ابغي اتوصل ليه ،، ياترى وش سبب التغير المفاجئ لبيت اهل زوجي؟؟ هل له علاقة بكلام زوجة اخو زوجي ( يوم قالت انتين كل وية بيت اهل زوجش لكن بوريش اليوم اللي تتفرقين عنهم!!!!!!!!!!!)))