خواتي ادخلو اقرو وساعدوني برايكم ..مهم جدا

السلام عليكم ورحمه الله وبركاته
كيفكم عرايس ان شاء الله تكونون بالف خير وصحه وسلامه وسعاده يارب

ماجيت اكتب لكم الا من ضيق بصدري وهم قاتلني والله. ما اعرف كيف ابدي كلامي بس بجد اجس اني راح اموت قهر . قصتي كلها ملخبطه زي مانقول بالعدني لا لها راس ولا لها رجول.
احس ان مشكلتي من اهلي ومن الشخص اللي احبه.
من ناحية اهلي مافي شي اسمه حب ولا حنان ولا تفاهم ولا شي. كل في فلك يسبحون كل واحد له تفكيره وحياته رغم اننا عايشين في بيت واحد. انا اكبر اخواني احنا اربعه عمري 29 تقريبا . مشكلتي ماحد فاهمني ولا يشتي يفهمني. اذا اتكلمت اكون غلط وكلامي مايجي على هواهم. اذا سويت شي مايعجبهم.ياناس حتى لبسي يعايروني ويقولو ماعندي ذوق خاصه امي.رغم ان الكل من جيران واهل واصحاب يعتبروني قمه في الذوق ويتجننو من تنظيمي وترتيبي لروحي او اي شي اسويه.تصدقو حتى شغلي ياخلق يتدخلو فيه. انا محاضره بالجامعه ورغم كذا مش عاجب كل شي اسويه يتدخلو فيه.الحمدلله له الحمد والمنه متفوقه بدراستي وشغلي وهذا الشي اللي محسسني اني عايشه وعندي هدف احققه باذن ربي.بس ايش الفايده اذا احس اني مقهوره ومعزوله عن اقرب الناس لي. يابنات وربي ما اذكر متى اخر مره اخذتني امي او ابي بحضنهم.هذا شي مش موجود عندنا او حتى مسحو على راسي.مافيش حنان مافيش حب.حياه جاااااافه.امي غريبه ماتعترف بشي اسمه عواطف ولا مشاعر كل هذا عندها قلة ادب وضعف.ما انكر ربتنا لو مش هيا ربي يخليها ماوصلت للي انا فيه بس في نقص وماتحب احد يناقشها او يكلمها كاننا بمعسكر عايشين.وابي ما اشوفه الا قبل النوم بعذر يتعب ويشقى طيب خلاص كبرنا من يوم ماوعيت على الدنيا وهو رامي كل شي على امي.اذا احد طلب منه شي يجنن ويصيح ويقول عشان كذا ما احب ارجع البيت.يعني يتهرب من مسؤولياته.ياناس اتغربت ودرست بالخارج وعشت بين ناس لا اعرفهم ولا يعرفوني كان بيننا عيش وملح ورافه وموده وكل شي.عند اهلي حتى دعم معنوي مافيييييش بالمره.
عندي اثنين اخوان واحد منهم يشوف العمى ولايشوفني ياناس مايكلمني ولا حتى يناظر المكان اللي اكون جالسه فيه كاني مش موجوده ولا كاني اخته الكبيره. يكرهني ولايطيقني الا اذا احتاج فلوس وبس ساعتها يعرف ان عنده اخت. وياريت يعتبر هذا شي يضن انه من حقه عليا اني اسوي له اللي بنفسه واحقق رغباته.كنت اقول يابنت اتقربي ليه سايريه شوفيه ايش يحتاج والله سويت المستحيل بس ماينفع حتى وصلت لمرحله اشتري فيها حنانه بس اخيرا عرفت ان الحنان والحب ماينشرو هذول ينولدو مع الانسان ويعيش معاهم.بس بجد اخي قاااااااسي رغم انه اصغر مني.سكتت وبعدت عل وعسى ربي يهديه بس لسى.اتخيلو يتمنى يزوجني بمزاجه لواحد هو يعرفه عشان دخل مزاجه وارتاح له.هو اساسا يمكن مصلحه والادهى الرجال لا براسه ولا شي صاحبنا بيروح يخطبه عشاني يعني ايش اني صرت سلعه للبيع والشراء.بجد كرهته.اخي الصغير حبيبي رغم صغر سنه بس احسه ربي يحفظه متفهم و واعي.علاقتي به كصديق.بسبب علاقتي هذي معاه اسبب له مشاكل من الوالد والوالده.هم يظنوه كاتم اسراري ويعرف فين اخبي فلوسي.رغم اني والله مش مقصره بحق البيت.بس اهم شي يعرفو فلوسي تروح فين. وهو مسكين مايعرف شي لانه هذا شي هو يقول من اسرارك لا تقوليه لاحد. اختي اصغر مني وهي بعدي مباشره.احس شخصيتها قويه حتى رايها تفرضه على ابي وامي واللي براسها تسويه بالطيب بالبطال تسويه.اللي تحتاجه وبنفسها تلاقيه.عكسي انا تماااااما.انا فضلت اشتغل واتحمل مسؤوليه نفسي عشان ماحد يسمعني كلام يسمم البدن ويهينني.
اتعرفت على شاب كنت احس انه زي اخي بدايه.اتطورت الامور وقال اتمنى اتزوجك تقبلي.قلت اهلي تعرف طريقهم كلمهم واطلبني من ابي. طبعا ابي مايحب المواجهه يموت بالمماطله.كل مايتصل الرجال على امل تحديد موعد يجي هو واهله ابي يماطل ويطلع بعذر. جيب شهاده جيب وظيفه جيب بيت مش فاضي مشغول بالاخر اللي طلع مع ابي يصايح عليا انا. انتي تعرفيه انتي اصرفيه..... اصرفيه ليش طفل شابط بلعبه ولا ايش.وكله اعذار وكلام مادخل راسي.واقطعي علاقتك بيه.قلت حاضر.بس ماقدرت.صرت اكلمه مره بالاسبوع او بالاسبوعين بالسر من وراهم يطمن فيها عليا واطمن عليه.
مشكلتي مع اللي احبه ملخبطه.يمكن عشان بحياتي مالقيت اللي يهتم فيني ويحسسني بالامان والحب اتمسكت فيه.كل شي وارد.بس امنيه الاستقرار ويكون عندي بيت ليا وحدي وزوج يحبني ويراعيني ويخاف عليا هي اللي مسيطره عليا.عشان كذا اشوفه مهرب ليا؟يمكن.بس بجد تعبت.تعبت من الاحساس بالذنب اني اكلمه من ورا اهلي وتعبت من الاحساس باني عايشه بالظلام ليش ما اعيش بالنور.كل هذا ولساني اقول لروحي اصبري عشان يكون روحه ويسوي لنفسه شي ويوقف على رجليه.بس والله تعبت.يمكن سنتين ونص وانا اسكت روحي واصبر نفسي بس ماعاد اقدر. هو وظروفه من جنب واهلي وجننانهم وحالتهم من جنب.حاسه كاني بينهم وكل واحد منهم يشدني لناحيته.
اخرتها قررت اسافر واكمل دراستي .صارت الدراسه مهرب ليا من حالي واللي انا فيه.اهلي بصراحه مايهمهم.عادي يعني.روحي ادرسي اهو تشغلي روحك بشي مفيد.وحبيبي يهددني اذا سافرتي تخسريني. لماسافرت اول مره اهلي مابكو عليا.ماغير اخي الصغير لاننا متعلقين ببعض البقيه لا.صعبه الوحده تحس انها غريبه بين اهلها ومالها قيمه ولا شي.
صرت عايشه حياه منعزله عنهم.اكل واشرب اكثر الاحيان وحدي.انام في اوقات هم فيها صاحيين عشان اتجنبهم بس.اسهر الليل عشان قيام الليل واقرا قران عشان اهدي قلبي.
بس لازم الاقي حل لحياتي دي لاني خلاص قربت اجنن. والسفر مش حل.يعني حتى اذا رجعت بعد 5 او 10 سنين يبقى الحال على ماهو عليه.غريبه بين اهلي.راح ارجع واخواني اللي اصغر مني كلهم اتزوجو وانا وحيده.
ياااارب يوفقكم انصحوني يابنات.مادخلت اكتب لكم اللي من تعب قلبي والله.صرت ما انام وحياتي كلها بكى وهم.
ربي لايوريكم هم او كرب ويشرح صدوركم ويبعد عنكم كل مكروه يااارب
شورو عليا
تحياتي