حَتْقَوّوّزْ,يَعْنِيِّ,حَتْقَوّوّزْ...> يأإأإأ بختس يازكيه.أدخلو سريع00

|حَتْقَوّوّزْ,يَعْنِيِّ,حَتْقَوّوّزْ. ...>>> يأإأإأ بختس يازكيه...!
✖



لاإله إلآ أنت سسبحآآنك إني كنت من الظآآلمين





السلام عليكم ورحمة الله وبركاته

صبحكم الله بالخير ياجماعه...

بدووون مقدمأإأإأإأإأت....


مانيب قادرة أتحمل أكثر من تسذا ابخربهاآ وأكتب قصتي
ولا قسمن بالله ابنتحر واعلق عمري بمروحة مشغلة على رقم 3

أنا اسمي زكيه أبلغ من العمر 45 سنه أقطن مع دادي ومامي >> مهوب لايق
وغرفتي مطلة علىإٌ الشارع العام ..؟!
تبدأ قصتي من يومن عمري 6 سنوات يوم أني خقيت وطحت بحب ولد عمي
في يومن من الأيام أمي قالت يالله يازكيه مانتيب رايحه معنا بيت عمك وإذا بقلبي يرقص فرحاآ وأطاآمر على سريري المغطىإبالوثير
وتبدأ امي بمعركتها مع شعري عشان تمشطه لي وتجيب ذاك المطاط الأسود وتبدأ تربطه بشعري الىإٌ ماتطلع عيوني من قوة الربطه وأنا اروح أدهن خشتي بالفازلين >> لزوم الكشخه
وركبناآ سيارة أبوي وأخيرا وصلناآ بيت عمي وأنأ أول مادخلت وأنا أدور بعيوني مصطفىإٌ
وإذا بس اشوفه طالعن من غرفته وتسان أروح اتميلح عنده ومن شافني الا أنه رافعن ثوبه وعاضه وطايرن عني
أنا بديت احاتسي نفسي وأقول هه شكله مستحي بس لمتىإ على ذا الحال بس نرجع البيت ابفاتح أمي بالموضوع وأبخربها وأخطبه باين عليه أنه مستحي ومهوب مسوي شي
وأول ماوصلنا البيت إلا أني اروح لأمي وخدودي حمرا من الحياآ
وأقوله أني احب مصطفى وأبي أعرس عليه ماشفت إلا أمي عيونه جمر (كنايه عن الغضب واحمرار العين ) وتسان تفصخ نعاله وقالت والله انتس ماتستحين على وجهتس ولا وبعد الولد أصغر منتس أندزلعي عن وجهي لارتكب فيتس جريمه
وأنا رحت أركض ع الدرج ووانا ماشيه شفت نملتين بأوضاع مخله بالآدب خنقتني العبره وابتسمت في نفس الوقت وقلت الله يوفقهم
ودخلت عرفتي وانا ابتسي حبي اللي ضاع وانهدم
ومرت السنون والأيام وأنا كبرت وصاآر عمري 20 سنه >> باللهي
وأنا بين كل يومن والثاني تتصل علي وحده من خوياتي وتقولي أنه انخطبت أو باتسر عرسه وأنا محدن طاآق لي خبر
وتمضي السنين وبلغت من العمر 32وأعرسو ثلاث أرباع خوياتي الشيفه والحلوه حتى أني اذا رحت عرس ماآشوف خوياتي اللي مع اولادها تطامر بالكوشه واللي بدبلتها تترزز وأنا قلبي ينمصع من القهر
ورحت البيت وأنا أناظر خشتي وأقول صدز أني اخرع ومنيب حلوه بس لييش حظي تسذا لييش
لازم أسوي شي لازم أعرس أبجيب عياآل وأبفرح فيهم
وقررت ذاتس القرار أني أحط إعلان بذا المجلات في صفحة اللي يبون يعرسون
وكتبت أني :
زكيه عمري 32 سنه عاآطلة عن العمل بيضأآء البشره وومملوحه وأقدر الحياة الزوجيه وأريد شاباً لم يسبق له الزواج ابيضاني وطويل واذا يشبه مهند ميب مشكله حنون وطيب وعنده فلوس ..؟!

وحطيت ذا الاعلان ومضى يوم يومين وماجاني خبر وفي اليوم الثالث إذا بتلفون بيتنا يرن وأطممر وأرد عليه
الوو
أنا بكل نعومه :نعم
الاخت زكيه
انا يس >> ابوريهم أني أحتسي لغات
قال بالنسبه لتقديمتس على طلب عريس بس تقدم لتس واحد
أنا قلت بقلبي يله قضآء أهون من قضاآء وقلت له ومن هو سعيد الحظ ..؟!
قالي بصراحه هو مصري بس والله انه شاب كويس وتسذا
أنا شهقت أخرته يازكيه تتزوجين لتس مصري
وجلست أفكر قلت معليه هذا هيفاآ متزوجتن مصري ومدلعه يمكنه يآخذني ويدلعني وتسذا
ورحت وأنا اطامر وأدندن وقلت لأمي يمه في ناسن بيخطبوني ماشفت الا امي المسيكينه تركض وتطامر على السرير وتسوي علامه النصر
وهمن هدت أمي وقالت لي من هو يابنتي ومن ولده ومن أهله ..؟!
أنا بدت براطمي ترجتف وبالموت تطلع منها الكلمات قلت لها يماآه تراه مصري
قالت لي وشفيها يابنتي عادي هذا بنت وهبي خذت له مصري ومستانسه معه أهم شي الاخلاق يابنتي
المهم وأتصل ع المجله مرتن ثانيه وأعطيهم عنواني عشان يجي المصري ونتباحث ونتباصر بأمور الزواج
وجاآ اليوم الموعود وأنا قلت لازم أكشخ وأطلع حلوه واليوم يومتس يازكيه
واتصل على بنت جيراننا فتحيه عشان تسوي لي المكياج لانه فتحيه راعية حركتات وتسذا
وجت فتحيه وحطت لي مكياج وسوت شعري بف تقول هذا اللي يناسب له ولبست جلابيه كشخه موف ومنقطه بالبرتقالي
ويومن دخلت أمي الا انها ارتاعت مني بس سكتت وبلعت روعتها ماتبي تخرب فرحتي
وعطتني الشربات وقالت لي يالله يازكيه أدخلي وقدميها للعريس >> قلبنا مصاريه
وأدخل وانا مييته من الحياوجالسه أتخيل ليالي الحلميه وأول مادخلت فز المعرس من متسانه وبدا يتمقل فيني وانا اقول في خاطري عمىإٌ وش ذا عمره ماشاف خير ..؟!
المهم قالي حطي الشربات واخرقي استعقلي العروسه ليا ساعه وانا استنى
أنا
هو : بتبصي في ايه أنتي ياخدامه مافكيش مخ روحي شوفي العريسه فيين
أنا :في خاطري ماباقي الا ذي مصري ويشرشحني قلت له وانا منهاره اخرق برا مش عايزه أشوف وششك >> قلبت مصريه أعنبو ذا الحال الوصخ
هو فهم أني العروسه وماشفته الا ماشي مليون تسنه ماصدز خبر اني اطرده ..
ويوم انه طلع جت امي تواسيني وتقلي يالله قضاء اهون من قضاء وخيرة ومن هالحتسي
وتمضي الايام والسنون وأنا أكبر ومحدن طاق لي خبر
وأمي تقلي يالله يازكيه متى أشوف عيالتس وافرح بتس وصار عمري 39 سنه وحتى التسلاب عيال العيله طلعو علي حمله خلوهاآ تعنس
ويومن من الايام وانا منسدحه على بطني وافرفر بذا القنوات ما اشوف الا قناة زواج وأهب واسمعهم يقولون اللي تبي تعرس تقدم طلب وتجي تسكن بذا البيت شهر ثمن المعجبين يتقدمون لها ومن هالحتسي قلت مابه الا ذا البرنامج
ورحت وقدمت ع الطلب بعد اسبوع اتصلوو علي وقالو لي مبروتس لانضمامتس معنا وانا تشققت من الفرحه وقلت لامي وبديت أجهز نفسي اسافر لبيروت وأذا بي اجهز شنطتي وحطيت كل جلابياتي الكشخه وشريت لي مع كل جلابيه حجاب مناسبن للونها ومانسيت الديرمه والفازلين >>لزوم الكشخه
وسافرت واآنا أودع امي وهي تقلي الله يعطيتس رجل يازكيه
ويوم اني وصلت ذا البيت الا كل البنات سيفور من المغرب وتونس ولبنان وأنا اكبرهن وأسمنهن والبنات كاشخين بذا البنطلونات الضيقه وأشياء طالعه يالله لاتعاقبنا بس
قلت والله محدن يبيهن على ذا الفصاخه أكيد كل المتقدمين لي وه يابختس يازكيه
وسكنا بذا البيت وانا كل يوم يامتهاوشه مع ذي او متطاقه مع ذي ويومن من الايام جت المسؤوله وقالت يوم الاثنين بنسوي حلقه اس ام اس مدري وش ..؟!
وأنا قلت لها بردون (صرت أحتسي فرنسي مع ذا المغربيات ) مدام من يطلع ولده ذا ..؟!
قالت لي يازكيه ذا تجلسون قدام التلفزيون وتجي لكم رسايل من المشاهدين والمعجبين وتسذ
أنا تحمست قلت أكيد كل الرسايل لي وجا يوم الاثنين وجلست معهن وكل الرسايل لناديه المغربيه البثره
وأنا ولا رساله جاتن وعلى أخر رساله شفت اسمي وانا ودي أطامر من الوناسه
كان رساله من سوداني كاتبن فيهاآ
آي الشغاله زكيه بتتهاوشي مع فوزيه ليه وماتنظفيش البيت للبنات ليه أي
انا
وتسان اقوم وانا متحطمه واروح غرفة التلفون واكلم امي وانا دميعاتي ع خدي
انا : يما مانيب قادره اتحمل اكثر من تسذا ابطلع اليوم قبل باتسر
امي : اها بس انثبري ما باقي الا ذي خليتس بمكانتس واكشخي بجلابياتس وطلعي شوي من قذلتس وحطي بوجهتس المتمزع فازلين وبذا البراطم المتشققه ديرمه وحطي لتس اغنيه مثل ذا البنات وارقصي بس بدون أغراءات
كود الله يفكني منتس وتعرسين
وأنا اسكر التلفون وأسوي مثل ماقالت لي امي وبديت اتدلع وتسذا وجا يوم الثلاثا اللي هو يوم النومنيه وجلسنا بالصاله وانا صكتني ام الركب من الخُوف
وإذا بي انا اول نومنيه ومعي أسما ورولا
وأنا من يوم الثلاثاء وانا اتميلح واغير بذا الجلابيات كود الجمهور يخق وينقذني
وجاء يوم الجمعه وجت اللحظه الحاسمه وحطو ذيك الموسيقى اللي انا طقتني ام الركب معه وبديت اتنافض من الخوف
واذا بس اشوف رولا تطامر هي واسماء لانه نسبة التصويت لهم وحده 49 والثانيه 50 وأنا 1 بالميه بس
مشيت من البرنامج وانا اجر اذيال الخيبه معي واول مافتحت باب البيت الا امي اتفلت بوجهي وقالت لي اجل يازكيه تفشلينا وتطلعين نومنيه الظاهر يالشيفه مانتيب عارسه
وتمضي الايام والسنون >> مسكت معها

وصاآر عمري 45 سنه ويومن من الايام اتصلت علي فتحيه وقالت لي حطي على قناة حتتقوز النهار ده وانا احط عليها اذا بها ملفات تقديم ومواصفات وتسذا
قلت مايبيلها شي يابت ارسلي ملف وذيتس المواصفات اللي تخقق

أرسلت:
أنا بثينه أبلغ من العمر 25 سنه بيضاء البشره وطويله أعمل ببنك الرياض حنونه ورومانسيه بالحيل
وأملك ماكينه قديمه زنجر أم اسد >> تسمع بالتخقيق
وإلىإٌ اليوم ماجاني خبر ولا شي


مايستفاد من القصه
- الزواج قسمه ونصيب ولو تجري جري الوحوش غير رزقك ماتحوش
-ذا القنوات كلها تسذب وتسذب وماوراها فايده
-اذا خقيتي مع حد لاتصيرين وحدتن خفيفه ترى الثقل زين



ههههههههههههههههههههه

اعجبتن هالقصه ونقلته

اتمنى ترووق لكم


( منقول من صاحبة الموضوع قمر القصيم)