ياسلااام ..
سويته من يومين وماكلت منه على رواااق الا اليووم ..صج كان حلوو ..
وشكله راقي للتقديم مع شاي العصر ...
الكميه تكفي ل40 حبه ..(انا سويت نص قياس بسكوت السابليه اما المرينغ نفس القياس)
مقادير بسكوت السابليه:
300 غ طحين جميع الاستعمالات(تقريبا 2 وثلاث ارباع الكوب)
165 غ(تقريبا اصبع ونص) زبده غير مملحه بارده ومقطعه مكعبات
40 غ سكر بودر (تقريبا 5 ملاعق كبيره)
صفار بيضتين كبار او 3 صغار
1 ملعقه صغيره مركز فانيلا أو ملعقتين صغار سكر الفانيلا
رشة ملح
مقادير مارينغ الفانيلا:
2 بياض بيض بدرجة حررة الغرفه
ربع كوب سكر عادي
ربع كوب سكر باودر
ربع ملعقة صغيره كريم التارتار أو (رشة ملح مع كم قطرة ليمون)
ربع ملعقه صغيره مركز فانيلا ..أو نص ملعقه صغيره سكر الفانيلا
مربى توت او مشمش او اي نكهه مفضله
الطريقه:
لتحضير بسكويت السابليه:
1-ينخل الطحين والسكر والملح يضاف له الزبده ويفتت باليد حتى يندمج الطحين بالزبده ,يضاف الفانيلا والصفار وحده وحده لحد ماتصير عجينه متماسكه ((اذا حسيتي العجينه متفتته ومش متماسكه زيدي نص صفار بيضه او صفار بيضه وحده واعجنيها عدل))يفضل العجن باليد.غطيه بالبلاستيك وخليه فالثلاجه نص ساعه.
2-سخني الفرن على درجة 320 درجه.طلعي العجينه ورقيها على سطح مرشوش بالطحين على ان يكون سمك العجينه مب اكثر من ربع انش..(لا تنسين بعدين بتخلين المارينغ بيكون على كل حبه ..) ..قطعي العجينه بقطاعه على شكل ورد ..وخليهم في قالب غير مدهون ..دخلي الصينيه في الثلاجه شوي علشان تجمد الزبده وماتخترب وقت الخبز في الفرن..وفي هالاثناء نجهز المارينغ..!!
لتحضير المارينغ:
1-يخفق البياض مع التارتار أو البديل لحد مايصير مثل الرغوه الناعمه’ضيفي السكر الناعم والعادي بالتدريج واستمري فالخفق لحد ماتصير الرغوه فيها لمعه(,لازم ماتكون سائله )..ضيفي الفانيلا..حطي هالخليط بكيس الحلويات وبقمع على شكل نجمه وحجمه متوسط او صغير ..وخلي الكيس على جنب
نرجع لصينية البسكوت اللي خليناها في الثلاجه طلعيها وجيبي كيس المارينغ وشكلي على اطراف البسكوت مثل ما موضح فالصوره . ودخلي الصينيه في الفرن لحد مايصر المرنغ جامد .. والبسكوت من تحت صاير لونه بني فاتح ..(اذا لاحظتي حبات المارينغ بدت تحمر بسرعه خففي على درجة حرارة الفرن لين 300) تقريبا راح ياخذون 10 -15 دقيقه في الفرن على حسب الحراره..
وهذي الصوره بعد ماطلعته من الفرن
بعد ماتبرد قطع البسكوت بملعقه صغيره حطي المربى المفضله عندج في وسط كل قطعه..
ملاحظه:
اذا زاد عندج من المارينغ شكلي في صينيه مش مدهونه نفس ماانا سويت ..وحطيه في الفرن ..امممممممم يذوب فالحلج ...أحلى شي
