بنات البحرين سؤال عن الدكتورة زينب الجفيري

*

**ام عبادي القمر**

عروس ماسية

06-07-2009 | 02:22 PM

بسم الله الرحمن الرحيم
الحمد الله رب العالمين
اللهم صل على محمد وآله وصحبه اجمعين

شخباركم ان شاء الله تكونون بخير

بسالكم بنات البحرين

اني ابي اروح للدكتورة زينب الجفيري الصبح في السلمانية
بس بسالكم هل لو قلت لهم اول ماادخل بغيت زينب الجفيري يخلوني ادخل عليهااا
واذا طلبت منها اتسوي لي سونار او التراساوند
تسوي لي ولا تعطين موعد حق مرة ثانية ؟؟
الي تعرف ياريت ترد علي الله يجزاكم كي خير ان شاء الله

ز

زهرة السعادة

عروس ماسية

06-07-2009 | 02:25 PM

اول مرة اسمع عنها
فما عندي فكرة حبيبتي
ان شاء الله البنات يفيدونج

M

MiSs-GuCci

عروس برونزية

06-07-2009 | 02:27 PM

انا ما اعرف عن موضوع النساء والولاده بس عموما العيادات التخصصيه اللي في الفاتح إذا الصبح لازم تحويل من المركز الصحي او انج تروحيين لها في عيادتها الخاصه وتقوليين لها ابي اتابع عندج الصبح وتعطييج ورقه عليها الختم مالها عشان يعطونج موعد انا هذا اللي اعرفه وان شاء الله البنات يفيدونج اكثر وماعلييج إلا العافيه إن شاء الله

*

**ام عبادي القمر**

عروس ماسية

07-07-2009 | 12:52 PM

يسلمووو بنات على المرور
يعني مايصير اروح لهااا على طول السلمانية
والي تعرف كم تاخذ على الزيارة الوحدة تقول لي لانة قالوا لي واجد غالية!!!!!!!

*

**ام عبادي القمر**

عروس ماسية

08-07-2009 | 03:36 AM

للرفع:(

ق

قلب البتول

عروس ماسية

08-07-2009 | 08:34 AM

اختي كانت تروح لها اسعارها مثل اسعار كل الدكاترة في السلمانية اذا بتروحين الى عيادتها في الفاتح اما سعر عيادتها في مجمع الرعاية الطبي فما ادري بس كاني سمعت اختي اتقول اول اشهر 20 وبعدين 15 وكل زيارة اتسوي اشعه بس يمكن غيرت اسعارها لان هالكلام من سنتين

عالعموم اختي تمدح في هالدكتورة

~

~توت~

عروس مشرقة

08-07-2009 | 08:50 AM

سلام عليكم

خيو تاخذ اول زياره 20 دينار والزيارات الثانيه اقل بس مادري اذا زيدت اسعارها بعد وفي العياده في نفس الوقت تسوي ليش الألتراساوند

بس في السلمانيه مايصير تقولين ليهم ابي دكتوره معينه الا اذا قلتين لها وهي حولتش عليها في السلمانيه

وماعليش شر ان شاء الله

*

**ام عبادي القمر**

عروس ماسية

08-07-2009 | 03:22 PM

والله شجعتوني اروح لها
لانة بكرة عندي موعد عند منى الشرقي وكلش مو متشجعة اروح لهاا
ولانة سمعت الدكتورة زينب الجفيري تاخذ على كل دخلة 30 دينار
وبتصل بتاكد بعد عن اسعارها الساعة 4 بعد اشوي
يسلمووو على المرور
والله يعطيكم الي تتمنونة حبوبات

ع

عروسة حمود

عروس مشاركة

08-07-2009 | 05:57 PM

هلااا اختي ام عبادي القمر

اني اتابع عند زينب الجفيري اول مرة اخدت علييي 25 دينار (فتح فايل + التراساوند )

وبعدين كل زيارة تاخد 20 طبعا شاملة الالتراساوند

الدكتورة عموما مو سيئة بس فيها ان مو اعيدها واجد بعيدة بسبب الزحمة عندها

وتفتح عيادتها بس الاحد والاثنين والثلاثاء

واي استفسار انا حاضرة

*

**ام عبادي القمر**

عروس ماسية

08-07-2009 | 08:55 PM

عروسة حمود يسلموو على المرور حبيبتي

يعني كل مرة تاخذ 20 دينار ولازم اتسوي التراساوند واجد زين

بسالش خيووو انيتن اتابعين عندها علشان حمل او علاج

واني قلت بروح اليها من غير موعد بروح الساعة 4
وقلت بخليها اتحول فايلي على السلمانية

أ

أم كرار 1

عروس جديدة

09-07-2009 | 11:13 PM

السلام عليكم

خيو بالنسبة للدكتورة زينب لجفيري وايد زينة بس بالنسبة لأسعارها ما عندي أي خلفية عنها لأني ما أتابع عندها برغم أنها تقرب لي من بعيد .. و في حملي الأول تابعت عند الدكتورة منى راشد الشرقي و الحمدالله ارتحت ليها و لأن ولادتي كانت قيصرية لأسباب معروفة مبدأيا في الحمل فقررت الدكتورة منى تحويلي على استشاريين الطب الخاص في الفاتح (السلمانية) .. و خيرتني بعدة دكاترة ومن ضمنهم الدكتورة ( هدى لجفيري ) في الفاتح وايد زينة و سعرها كلش مناسب تاخذ عشرة دينار شاملة الاستشارة و الالتراساوند .. و الحين بفضل الله حملت و لي الشهر الخامس الحين و رديت تابعت عند الدكتورة منى الشرقي ..

علما ً استشارتها عشرة دينار + الالتراساوند خمصطعش دينار

اكيد تتسائلين ليش قمت اتابع عند منى الشرقي وماتابعت عند هدى الجفيري رغم كفائتهم المتساوية ..

هذا الله يسلمش الراحة النفسية للثنتين طبعا و الكفائة للثنتين بس لان عيادة الفاتح ما ارتاح ليها من كثرة لهنود الي فيها :ss:

و السبب الثاني الحمام الي هناك ما ارتاح ليه ..

اما عن حجز الدكتورة زينب لجفيري طبعا بيكون في مبنى الرعاية الي صاير فوق مفروشات سيتي الي صوب السلمانية اما انش تبين تحجززينها في السلمانية نفسها فهي تداوم في السلمانية بس الصباحي في وحدة المخاض و الولادة يعني ما تقدرين تدخلين عليها كأستشارية الا في عيادتها الي وصفتها لش و هي مو استشارية في مستشفى الفاتح

*

**ام عبادي القمر**

عروس ماسية

10-07-2009 | 02:15 AM

هلا خيووووو
اني كنت اراجع عند منى الشرقي واليوم المفروض موعدي الصبح
بس مارحت لان بصراحة ماتعطي الواحد فرصة يستفسر او ماتشرح الحالة بالضبط
يعني يوم عرفت انه فينين الياف مجرد قالت لي عاادي ولا يسوي شي لاتخافين
بس ماقالت لي ولا شي يعني هم خارج او داخل الرحم واي حجم بالضبط ولا قالت لي نصايح كلش
كلة مستعجلة علشان المرضى الي برة المفروض تاخذ عدد مرضى على قد الوقت الي عندهاا كم ساعة
وتعطي كل مريضة حقها ربع ساعة على الاقل للفحص والكلام مع المريضة او تعطي المريضة فرصة تسال شي

علشان جدي اني ابي اروح لدكتورة تفهمني وضعي بالضبط
لحد الحين ماني عارفة شنو وضعي مع الالياف وهل احتاج عملية او لا

ع

عنوني

عروس برونزية

11-07-2009 | 01:46 AM

سمعي خيو ام عباددي

اني اعرف دكتوره زينب لانه قريبه مني ومن الأهل

إذا تبين حق وحده تفهمش بالظبط كل شي روحي حق زينب

حتى في الكشف والعلاج راح ترتاحين ليها

وتقدرين إذا تبين تحولش على الفاتح حق علاج لانها تروح هناك الصبح

بس ايام معنيه في الأسبوع

*

**ام عبادي القمر**

عروس ماسية

11-07-2009 | 10:58 AM

مشكورة خيوو عنوني عل المرور
وان شاء الله يوم الاحد بروح لها وان شاء الله يكون كلشي خير

ب

بقايا فجر

عروس ماسية

11-07-2009 | 11:50 AM

اني اروح لها العيادة في مجمع الرعاية
وكلش اسعارها حلوة حتى حق الي على قد حالهم
مواعيدها بعيدة كلش بس لين على الارجنت رحتين لها تدخلش بين المواعيد مالها اذا قلتين لها ارجنت
وما عليش شر خيو

ا

المشتاقة

عروس متألقة

11-07-2009 | 12:32 PM

انا تابعت عندها في الحمل
وارتحت لها وايد
بس العيب الوحيد مواعيدها كلش بعيدة واي حالة طارئة ما تحصلينها
اسعارها اعتقد مناسبة للكل

*

**ام عبادي القمر**

عروس ماسية

11-07-2009 | 03:20 PM

مشكورين بنات على المرور
شجعتوني اكثر اني اروح لهااا

ز

زهرة الجنه

عروس فضية

11-07-2009 | 07:47 PM

روحي لها اختي وتوكلي على الله
صراحه قمه في الطيبه والذوق
وتطمن المريضه وتهتم فيها وتعطيش وقت تشرحين ليها كل شيئ وتسألينها على راحتش
واول دخله عليها ب 25 دينار مع الألتراساوند
والله يشافيش يارب ويفرج عنش خيه

*

**ام عبادي القمر**

عروس ماسية

11-07-2009 | 09:39 PM

مشكورة اختي نون على المرور
وربي يرزقش ويرزقنا ويرزق كل محروم بالذرية الصالحة السليمة ان شاء الله

ب

بحرينية بحرينية

عروس نشيطة

26-07-2009 | 05:13 PM

مرحبا..

أني عندي تكيس في المبايض وحبيت أتابع عند الدكتورة زينب الجفيري..

بس ماعندها مجال الا بعد العيد >> أحس واااااااااايد بعيد وأبي أتطمن..

تنصحوني بمن مثل مستواها..