بسافر و بنتي صغيره ...

هلا ام جهاد شلونك و شلون البنوتة

انا من رايي اذا مو مضطرة على السفر و بس سياحة اجلي شكثر ما تقدرين احسن لك و لبنتك

انا بعد بسافر باخر الثامن و شايلة هم بس مضطرة على السفرة لانها حق علاج

بالتوفيق

هلا حبيبتي قد سافرة بنتي لمكة وعمره اربع شهور وتعبت لانه تتاثر بسرعه بالبرد والحر اكثر من وتحسفت اني اخذه معي بس لما جاعمرها سبع شهور رحنا دبي ونفس شي جننتني وقلت توبه مااروح بها مره بس كل مره اقول بخليها عند اهلي ولا اخليها تعرفين قلب الام وارد اقول تتعب معي ولا بعيد عني

انة بعد رايي انج تأجلين السفر اذا كان مو ضروري البنت صغيرة وماتستحمل السفر وانتي بعد بتتعبين وياها

والله يخليها وبتسافرين وياها اذا كبرت

ام عمار ...
هلا فيج اختي ذكرتيني بايام التجمع حوامل شهر ابريل الايام تركض سبحان الله قبل كنا نقول متى نولد والحين ما شاء الله وصل عمر اطفالنا شهرين
المشكله ان زوجي عنده اجازه بس شهر الي هي الاجازه السنويه و بياخذها قبل شهر رمضان بشهر بالضبط و اذا ما سافرنا بظل سنه كامله بدون سفر و انا خااااطري اغير جو و اطلع برى الديره شوي و اجدد نفسيتي بعد تعب و عناء الحمل بس خايفه على بنتي واجد و مو قادره اتخذ قرار خايفه اسافر و لا سمح الله يصيدها شي و بعدين الكل يلومني و اخاف ما اسافر و يطلع هذا كله مجرد مخاوف مالها داعي و الله محتاره


اسوله العسوله ...
ما اقدر اخلي بنتي لانها ترضع من عندي طبيعي وما تبغي المرضعه و اذا سافرت عنها 5 ايام اخاف تنفطم و هي متعلقه فيني واجد و لو تموت عطش ما تستسلم و تشرب المرضعه تنتظرني حتى لو كنت في الشغل و ما اتاخر 3 ساعات و ارجع لها و القاها تصرخ من العطش و ما تبغي الحليب الصناعي ولا المرضعه صعب اسافر عنها و الله ما كنت اتوقع الحياه مع الاطفال هلقد صعبه في الحركه و التنقل و الطلعه بس الحياه حلوه بوجود الاطفال

كربلاء ...
رايج مثل راي امي و خواتي .. قلبي متولع بالسفر ما اتحمل اقعد سنه كامل بدون سفر
تدرين اني اكتشفت اني حامل في بنتي وانا كنت في العمره ههههه
و مع هذا اعتمرت ما رضيت ارجع الديره والحمد لله ما صاد الجنيين الا كل خير و جبتها بالسلامه

استخير وصلي وشوفي واذا الله كتب حذي عتدك من ملابس وعلاج وكافة الاغراض وشكلك مثلي بتسافرين فيها ه

هلا حبيبتي
انا اول مرة سافرت كان عمر بنتي 3 اشهر و كان السفر من السويد للمغرب يعني من جو بااارد لجو متقلب مرة حار و مرة بارد بس الحمد لله البنية ما صار لها اي شي حتى اني مرات اخذها وياي زيارات يعني الطفل على ما عودتيه

انصحك ما تسافرين بنتي سافرت وعمرها سنه عذبتني وتعبت وسخونه

والحين يحذرون من العمرهوالحج للاطفال وكبار السن بسسب انفلونزا الخنازير

انا رايي مثل راي البقيه ..!
البنت بعدها صغيره ..
وحاولي تاجلين سالفة السفر..!

وتصبري علشان عيون البنوته ..!
واكيد راح تعوضين السفره بعدين ..
موفقه ..!

هلا بأم جهاد ..

بما اني رحت أبها ، ماانصحك تاخذين البنوتة وياك ، لأنه رايحين سفرة سياحية و فيها برامج بشكل يومي طلعات للأماكن اللي هناك ، جذي بتتبهدلين معها في تبديلها و غيره ..

بالاضافة الى انه هي ما تاخذ حليب صناعي ، بتتقيدين في رضاعتها بالطلعات هناك ،،

و لما رحت اللعام كان نهاية شهر 7 ، الجو بارررد ، ممكن تتأذى من الجو لا سمح الله ، تعرفين طفلة توها صغيرونة مناعتها ضعيفه ضد الامراض !

ولدي كان عمره سنة و 10 اشهر .. و خليته مع اختي ما اخذته وياي لأنه طالعه سياحة و تغيير جو مثل ما قلتي .. و الاطفال متعبين الله يخليهم !

انا اقترح عليك من الحين لين وقت السفر تحاولين معها تاخذ حليب صناعي بإصرار حتى تقدرين تسافرين بدونها .. اذا ما قدرتي خلاص أجلي السفر .. و كل تأخيرة فيها خيرة .

أنا نفس الشئ اختي مع اخواتي لا تسافر ي
انا مستحييييييييييييل اسافر وعيالي اصغار
يتبهدلو ويمرضوا ........والخ
اجلي السفر وكل تأخيره فيها خير
وخير فيما اختارهو الله

رايي مثل باقي الأخوات

وانا سافرت ببنتي لما كان عمرها 10 شهور ومرضت وسافرت بها لما كملت السنه ونفس الشيء مرضت وسافرت بها لما صار عمرها سنه و8 شهور ونفس الحال

فأستنتجت ان

أولا بنتي ماتتحمل السفر ولازم تمرض من تغير الجو

ثانياً الطفل مايسافر إياه إلا لما يكمل السنتين بيكون تمام على الأقل بيكون أكتسب مناعه شوي


وقررت الحين ان مااسافر مع ولدي إلا لما يكمل على الأقل سنتين إلا إذا سفر قليله ايامه ومافيه مشاوير وتنقلات ممكن

وأفكر ان شاء الله أروح المدينه وتعرفي المدينه مافيها تنقلات واجد وان شاء الله مايتعب


انتي فكري في الموضوع مره ثانيه إذا السفره مي ضروريه لاتسافري لاحقه على السفر أهم شيء صحة أطفالنا الغاليين


وأتمنى أكون أفدتش ولو بالقليل

والله يقدم لنا ولكم اللي فيه الخير والصلاح

???????????????????????

هلا أختي.. شوفي آنه سافرت قبل شهر وخليت بنتي وهي لها شهرين ونص والحمدلله ماصار فيها شي ولاحست بوجودنا.. الكل قال سافري وهي بهالعمر وقبل لاتدشين الدوام لأن ماراح أقدر أطلع إجازة الا عقب سنة... شفطت لها حليب حق يومين والباقي عطوها صناعي ولا أمي تقول البنت كل كانت راقدة ولا فيها غازات ولاإمساك ولاشي حتى ضحكوا قالوا أكيد هذي حليبج كان الخراب...

سافري أختي غيري جو كلها كم يوم وبنتج دام في أيد أمينة لاتحاتين...

اذا ما سافرت ما راح ينقص مني شي
بس حاسه بتعب و روتين قاتل ابغي اجدد ايام الخطوبة و بداية الزواج و اسافر مع زوجي كم يوم
و اجازته كل سنه شهر 7 او 8 حسب طلبة

و امي مستعده تاخذ بنتي اذا سافرت بس اخاف تنفطم الى وقت رجعتي و تعيفني وما ترضى تشرب من عندي بعدين

اظاهر مالي نصيب سفر السنه

ضايق خلقي و البحرين ما فيها شي سياحي
قال لي زوجي بنروح جزر حوار بدل ما نطلع برى الديره
بس ما تشجعت لان خاطري في سفر

لا أختي أم جهاد إن شاء الله بنتك مابتعافي صدرك.. آنه كاني رحت عنها 8 أيام والحمدلله من أول مارجعت خذت حليبي... بس أنتي بتتعبين شوي لأن الحليب بيتجمع في صدرك فتضطرين تدشين تحت الدش وتشفطين شوي من حليبج بالماء الدافي يكون ترتاحين من الألم... وإذا الله مو كاتب خلاص كل تأخيرة وفيها خيرة.. بس الصراحة باقولج آنه بعد هالسفرة ردت روحي لأني تعبت نفسيا من عقب الإجهاض ومن بداية حملي في بنتي خايفة كنت آجهض مرة ثانية ووسواس ذبحني لين ماولدت يعني فعلا كنت تعبانة,بس طبعا خذيت ولدي معاي لأن ذي مستحيل أتركه قلبي متعلق به وسنه كبير يعني ماراح يتعب مثل أخته الحمدلله..

سلامت بنتج اولى من السفر يا حبيبتي حتى نحن اماجلين السفر عشان بنتنا