ولد عمي مسويلي أزمه .. مدري كيف اتعامل معه

بسم الله الرحمن الرحيم

بنات ابغى اقول لكم عن موضوع متعبني نفسيا .. فكرت كثير قبل ما اكتب المشكله لاني ما ابي اعطي الموضوع اكبر من حجمه ..
لكن والله المشكله هاذي اعاني منها سنيييين سنيييين لازم احط حد لها

انا يابنات عمري 20 سنه .. عندي ولد عمي من يوم كنت صغيره وهو يلاحقني
كل ماقلت خلاص بيتركني في حالي يرجع يفتح نففس السالفه وياما كنت اتعب وامرض واترجاه يتركني في حالي لكن مافي فايده
يقول انه يحبني ..
وانا من كنت صغيره كنت اصدقه يومين وارجع اقلب عليه واصده بقوووه لانه فطرتي تمنعني اني اسوي شي من ورا اهلي او شي يغضب الله سبحانه وتعالى
فكنت ما اعطيه مجال ابدا حتى انه يقول كلام حب

وهو فيه صفات كثييييير ماتعجبني وغلط .. يوم كان يقلي انه يحبني اقوله اذا تحبني لازم تغير هالصفات ... ويوعدني انه يتغير لكن وعوده كلها بالهوااااا
والمشكله اني ادري انه يكلم بنات كثير فعشان كذا ماكنت اصدقه

المهم .. كبرنا واتغطيت عليه
لكن حنا بطبيعتنا نتواصل مع بعض في العيله .. يعني اولاد اعمامي مثل اخواننا ومتربين ويا بعض فنكلمهم ونتواصل وياهم لكن طبعا بحدود
فكنت اكلمه عالنت ( فقططططط ) ونسلم على بعض ونتكلم بعض الاحيان في بعض الامور وأبعلم أهلي طبعا وعادي ..
لكن بعض المرات كان يتمادى شوي بالكلام ويبدأ يتغزل فكنت اسكته بقووه واطلب منه يكلمني باحترام وهو يحترم نفسه فتره .. لكن يرجع لنفس الكلام
ومره سألني انه اذا تقدم لي واحد بمواصفاته هل اوافق او لأ ؟؟!!
انا كنت اقوله يافلان انت ماشاء الله تتصف بصفات حلوه والف بنت تتمناك .. لكن انا الشخص اللي ببالي واتمناه شخص مواصفاته تختلف عن مواصفاتك .. وهذا الشي مو لعيب فيك لكن انا اتمنى انسان بمواصفات معينه موب موجوده فيك .. هو سكت

ومره من المرات زودها شوي وصار يتكلم ويسولف بزياده وصار ياخذ راحته ..
انا تضايقت من الوضع بصراحه .. فقلت له يافلان انا ماقدر اكلمك كثير خصوصا ان انت ماتحاسب على كلامك وتقول كلام يضايقني وتتمادى .. وانا ضميري يأنبني وأحس اني اسوي شي غلط ..
زعل مررره وصار مايكلمني نهائي ..
وانا موب هذا الشي اللي ابيه .. لانه والله يعز علي واحسه مثل اخوي ومااحب انه يزعل ( ابيكم تفهموني ترانا متربين مع بعض مرررره وماتغطينا اللي لما كبرنا يعني شعوري تجاهه اخوووووي وهذا الشي اهلي كلهم يعرفونه .. حتى اوقات اذا مرت فتره طويله وماشفت واحد من اولاد عمومي اقول لأهلي والله زمااان عن فلان واقول لامه تسلم عليه )
انا اللي ابيه ان نكون مع بعض عاادي مثله مثل باقي اولاد عمومي .. سلام ووكلام بحدوود وإحترام .. لكن هو ماعنده حل وسط
المهم .. بعد كم شهر أعتذرت له واتفقنا انه انه عادي نتكلم بس يكون محترمني وينتبه على كلامه وبحدوود .. والحمد لله تصلحت الأوضاع


المهم
من بين البنات اللي كنت ادري انه يكلمهم وحده تقرب لنا من بعيد كان يحببببها وكل العيله تدري .. خطبها وملك عليها وبعد فتره فسخوا الخطبه بسبب مشاكل صارت بينهم

وخلال فترة الخطبه وبعد فسخ الخطبه .. كنا عادي نكلم بعض وبحدود واحترام والوضع كان تمام

لكن المشكله انه بعد كل هالفتره كلمني ( وكان جداااا محبببط ويائس وحزين بسبب انفصاله عن خطيبته ) وقاعد يشكي لي حاله وقالي انه كلم والدته علي اكثر من مره وانه اذا بيتزوج عمره مابيتزوج غيري واني الوحيده اللي استاهل يتغير عشاني وانه عمره ماكذب علي في حبه .. لكن في سببين يخلونه يتراجع عن انه يخطبني ..
الاول سبب يتعلق فيني انا .. في شي في اسلوب حياتي هو مايوافق عليه .. ( مع انه شي خاص فيني وماله حق يتحكم فيه .. خصوصا انه شي موب غلط بالعكس جداا صح )
والسبب الثاني انه في يوم من الأيام سألني اذا بوافق على شخص مثله وأنا قلت لأ ..
وقالي اني أنهيت كل أمل عنده من قلت لأ
وفي هالمكالمه ( كانت بالتلفون )
بدأ يبكي ويعتذر لي عن موقف صار من زمااااان ويقولي انه غلط علي كثير ويطلب مني أسامحه ويبكي من قلبه ..
انا والله قطع لي قلبي .. لانه ولد عمي ياجماعه غصب عني مايهون علي
لكن انا ماقدرت اقوله شي غير اني مسامحته وطلب منه يقوم يتوضى ويصلي ركعتين عشان يرتاح ..
فطلب مني افكر في الموضوع ..
انا قلت له الموضوع هذا مستحيل وانه مثل اخوي ..قالي لاتردين الحين فكري وبعدين ردي
وطلب مني انه يكلمني مره ثانيه بالتلفون ..

المهم ..
بعدها بيوم شفته عالنت وقلت له اني مارح اكلمه مره ثانيه بالتلفون لاني تضايقت من طريقة كلامه خصوصا انه كلامه ماكان يخلو من بعض كلمات الغزل وانا ماااااااااااااااحب كذا وهذا الشي يخليني اشعر اني انسانه بلا اخلاق ..

وقلت له ان سبب الرفض لفكرة الزواج مايتعلق فيني انا وبس
كمان هو عنده اسباب مايقبلها عشانها فإذا انا ماظلمته برفضي له ..
واننا مختلفين في اسلوب الحياه وطريقة التفكير وإذا غامرنا وتزوجنا على امل اننا بنتفق
وبعد الزواج مااتفقنا ساعتها احتمال نفرق العيله بكبرها وتصير مشاكل بسببنا وقطيعة رحم

قالي انا قلت لك لاترديييييين الحيييييييييييين ..
فكري من كل النواحي ..
والأمور اللي ماتعجبك فيني والامور اللي ماتعجبني فيك نحلها بالتفااااهم
انا سكتت .. بس علشان اسكته

لكن انا يابنات مستحيل افكر اني اتزوجه .. لو تزوجته فمتأكده ان زواجنا بينتهي بالفشل لان مبادئه واسلوب حياته وطرية تفكيره ونظرته للامور مختلفه عني كليا ..
هذا غير اني مااشعر بأي مشاعر تجاهه غير مشاعر الأخوه والدم
هذا غير كمان ان اللي بيننا قرابه .. لو غامرنا بزواجنا فنكون بنغامر بعيله كامله
وغالبا مابنتفق ويا بعض ..

هو يقول حنا نحل الأمو بيننا ولو أنا وافقت يتقدم لي رسمي ..

مدري يابنات وش اسوي معاه ..
كيف اتعامل معاه ؟؟ وش أقوله ؟؟؟

أتمنى أتمنى أتمنى من كل قلبي تكون علاقتنا ببعض عاديه .. مثله مثل باقي اولاد عمومي
احترام متبادل ومعزه .. لا افراااط ولا تفريييط
لكن هو ماعنده حل وسط

شوروا علي يابنات وأنصحوووووني :(


وسامحوني طولت عليكم
جزاكم الله كل خير ويحقق أمانيكم ويفرج كروبكم ويسهل أموركم

أختكم