هل نحن شعب يفضل الذكر على الأنثى ؟؟

مرحبا
أنا توني حامل و بعدي ما عرفت جنس البيبي
أتمنى يكون ولد ، لكن زوجي يتمنى البنت
و بالنسبة لنا الاثنين اللي يجي الحمد لله
اهم شي الصحة و العافية
شكرا ،

شوفي الغاليه

المحروم من الشي يتمناه ..

يعني انا من ناحية اهلي كله واحد عندهم لانه عندهم البنات والاولاد ..

اهل زوجب من تزوجت يتمنون اني اييب بنات لانه ما عندهم بنات كل خلفتهم اولاد ..

بس انا رضيت ال2 يبت البكر ولد والبنت عقبه ب سنه و3 شهور شرفت ... والحين من حملت ابو زوجي يقوولي انتي بتييبين ولد ما اعرف هل يتمنى حفيد ثاني ولا بس تخمين بس انا ما خبرتهم ان فيني بنوته

فانا اقول ان في ناس جاهله تفرق بين الولد والبنت .. وهذيل اصحاب القلوب الضعيفه الي ما يعرفون قدر النعمه

واسمحولي على الكلام ....مجرد رأي

الولد و البنت مثلا الغلا !

و متى صار الضنا مو غالي ؟


بس مثل ماقالت الاخت بجعه فيه ناس ماتقدر النعمة ، و بعد اللي عنده بنت يتمنى الولد و العكس .. للتنويع !

الاثنين حلوين وانا حتى قبل احمل كنت دايم اطالع

البنوتات الصغار واقول متى احمل ويصير عندي بمن البسها واكشخها

لكن زوجي كان دايم يقول اتمنى ولد يكون البكر

بس الان لما حملت قالو لي فيني بنوته . والله اعلم

بس الحمد لله زوجي بالاول تمنى ولد بس الان يحبها

وهذا مابعد تجي على الدنيا ودوم يكلمها ويناديها :)

ان شاء الله تجينا بالسلامه

وانا مع البنات انو المحروم من الاولاد يتمنى ولد والمحروم من البنات يتمنى بنت

يعني الاثنين حلوين وكل واحد يتمنى يكون عنده بنات واولاد وسوري طولت

انا عندي بنتين واكيد نتمنى ولد
لكن لو الله اراد واعطانا بنت ثالثة راح نكون مبسوطين وبالذات زوجي يحب البنات
ودايما يردد هالمقولة ( الاطفال هدايا من الله .. هل احد يقدر يرد هدية جاته خاصة من الله ؟)


اهم شئ ( الصلاح ) الله يصلح شأن الجميع ..

موضوع حلو كثير

أنا بالنسبة لي عندي بنت الله يخليها لي ولأبوها أن شاءالله

وأذا رزقني الله بالحمل الثاني أن شاءالله أتمنى طبعا ولد وزوجي يقول عادي بالنسبة لي بس

كل شي بيد رب العالمين

ما اعتقد يفضلون البنت على الولد ..
الضنى غالي ان كانت بنت ولا ولد ..!

بس الاغلب يتمنى انو يكون البكر ولد..
علشان يحمل اسم الابو ويكون له سند لما يكبر ..!

بس الاثنين غلات بعض ..
وربي يرزقك كل محروم ..!

انا بصراحة كنت اتمنى ولد اول ما حملت لأني وايد متعلقه في ولد اختي .. واحس البنات دلوعات ههههه فكنت احس اني ابا ولد مثله بس يكون ولدي انا ..

ويوم حملت الحين واكتشفت انها بنت يا سبحان الله كيف استويت احب البنااااااااااات اقول ماعرف كيف كنت اتمنى ولد .. محلاااااااااااااااااااااهم البنات والله ..


بس انا اللي استغرب منه يوم ناس تحاول تتحكم بجنس المولود عشان اييهم ولد .. يعني اوكي تمنوا بنت ولا ولد عشان التنويع وعشان يمكن انتوا حابين شي معين تسوونه .. لكن انه اجتهد في تحديد جنس المولود .. لا .. هذا تعصب واحس تدخل في خلقة رب العالمين ..

مشكورات اخواتي على طرح ارائكم
وننتظر بقية الاراء

الاثنين حلووووين بس الي عنده ولد يبي بنت والعكس مثلي عندي ولد وخاطري في بنت علشان اجرب الاثنين بس لو طلع ولد بفررررررح فيه نفس الشييي

فعلاً في كثير نآس تفضل الولد على البنت
و خصوصاً إحنا الخليجيين و تحديداً السعوديين
و بالنسبه لي أنا لو تزوجت و حملت مارح يكون في فرق
بين البنت و الولد و كل نعمه من ربّي

اعتقد هاي تفكير اجدادنا مو تفكير هالجيل وانا اشوف وايد ناس يحبون،البنات لان بصراحه في هذا الزمن البنت اهيه اللي تصير عون لأهلها وثاني شي مثل ماقالو كل محروم يتمنى اللي فخاطره بس في النهايه البنت والولد نفس الشي الضنا غالي وعن نفسي انا اول حمل يبت بنت واستانسوو كل ااهل والثاني تمنيت ولد والحمدلله الله عطاني ولد وسميته ع ابو زوجي والحن ثالث حمل ونتقطع قلبي على الاثنين بس فضلت اني اييب ولد لان ولدي وحيد اهلنا كله عندهم بنات ونفس الوقت ابي اسمي على ابوي وافرحه

بنات او الحرمان والله ما يعرف قيمهم الا المحروم اعرف وحده عندها بس ولد واتزوج على كبر جلست زوجته 10 سنوات ما خلفت وقبل سنه زرقهم ربك توام بنات ويقول لو اجيب عشره غيرهم راضي الحمدالله نعمه والله يرزق غيرهم ان شاءالله بنات واولاد اهم شي العافيه والاصلاح
الشخص يحمد ربه مو يتشرط اهم شي الذريه الصالحه والله يرزق كل المحرمين اللهم امين

و الله بالنسبة إلي , الي من ربنا حلو و راضية فيه
و كل واحد له إيجابياتو و سلبياتو , بس أنا بحب تكون كل الخلفة نفس الجنس سواء بنات أو أولاد , بحس بكون أريح
بس إلي من الله أحلى شي ~


:f:

الله يطعم الجميع الذكر والانثى

صحيح نحن شعب يفضل الذكر على الأنثى والسبب هو أننا نعيش في مجتمع ذكوري الولد يمتلك الصلاحيات المطلقة في كل شئ والبنت ممنوع عيب انتي بنت تكبر البنت كأنها سوت شئ غلط ولما تجئ تتزوج وتحمل لا إراديا تتمنى أنها تجيب ولد لانه مصدر قوة بالنسبة لها وما تتمنى البنت لانها بتكون مقهورة أو مظلومة هذا هو الواقع

في اول حمل لي تمنيت الولد وزوجي بعد كنت ادعي ربي أني اكون حامل في ولد ولما قالوا لي بنت حمدت ربي أنا وزوجي وقعدت أدور لها اسم مميز وسميتهاا أبرار وانا وابوهاا متعلقين فيهاا وأيد خاصه ابوهاا والحين حامل بعد سنتين للمره الثانيه مااخبي علييكم أتمنى يكون ولد بس اسأل ربي طفل سليم معافى وانه يقنعني ربي في اللي يرزقني فيه الله يرزق كل محروومه الذرية الصالحه ويرزق كل من تتمنى البنت بنت سليمه صالحه واللي تتمنى الولد ولد سليم معافى اللهم أمين يارب العالمين

الولد سند لأبوه وأمه وأمه بعد ما يكبر ..

لكن أيضاً البنت اذا احسن الوالدين تربيتها كانت لهم ستر من النار ..