صديقتي و الزواج,, ايش الحل؟؟؟

السلام عليكن خواتي,, بدخل بالموضوع

انا لي صديقة من يومنا صغار و البنت اخلاق و تخاف الله و كل من شافها اعجب باخلاقها
و تربيتها,, والله اهلها ناس رائعين و مو مقصرين معاها و البنت بنت قبايل و عيلة معروفة و غنية

المهم من 7 سنين البنت هذي تعرفت على واحد بالنت و الولد هذا كان اخلاق و محترم
و الله ما اقول الا الحمد لله ان ربي حماها و ما طاحت على احد ما يخاف ربه

بعد ما تعرفت عليه بفترة الولد سافر امريكا يدرس و هي رجعت لصوابها وقررت تقطع العلاقة
وفعلا قطعت علاقتها فيه

هالكلام من 7 سنين و والله يا بنات انا تزوجت و جبت بنت و هي كل ما جاها عريس يا ترفضه او اذا وافقت تتفركش الزواجة

و تخيلوا انها الى الان دايم تفكر فيه و تحكي عنه و تمدحه,, ما تتصورون قد ايش تحبه

المهم من كم يوم ارسل لها هالولد ايميل (بعد ما انقطعوا عن بعض كل هالسنوات) يقول لها ان هو بيتخرج قريييييب و انه بيرجع البلد (طبعا الولد درس بكالوريس و ماجستير في امريكا)
و انه يبي يخطبها من ابوها و ان هو جاب رقم ابوها و قال لاخوه الكبير

بس فيه مشكلة وحدة كبيييييييييييييرة يا بنات و هي
ان الولد مو قبيلي و البنت بنت قبايل و اهلها شيوخ

اهل الولد مستواهم المادي نفس مستوى عيلة البنت و كل شي نفسهم بس اللهم ان ذولي قبايل و ذولي لا


البنت كلمتني تصييييييح تقول لي ما توقعت بعد هالمدة يذكرني,, يقوم فجأة يقول لي ابي اتزوجك

تقول انا من زمان ابيه و احسه مرة يناسبني و كل ما خطبني واحد قمت اقارنه فيه
و من هالحكي

تقول الولد قال لها بالايميل انا لما اجي بروح لابوك و بكلمه بس ابي منك تعلميني ايش اتوقع منه,, هل بيرفض ولا لا


بنات انتوا ايش رايكم؟؟؟؟ اثنين صار لهم 7 سنين بعاد عن بعض محد يعرف خبر عن الثاني
مع هذا دايم يفكرون ببعض و ما زالوا يحبون بعض و الغريب ان لا البنت قد قالت له احبك ولا هو قد قال لها


عرايس ابي رايكم,, صديقتي الحين تقول ابيه و المشكلة هل تتوقعون اهلها يرضون؟؟؟ كيف ممكن تقنعهم؟؟؟

انا والله يا بنات قلت لها انا احس بلاش من هالموضوع و كملوا حياتكم بعاد عن بعض بس ما عجبها كلامي فقلت لها بشوف العرايس كان هم معي ولا لهم راي ثاني



تكفون لا تطلعون بدون رد,, والله البنت حالتها تضيق الصدر و ما تنام من كثر التفكير