بعد 17 سنه الله كتب لي

خواتي لا تياسن من رحمته الله سبحانه وتعالي عن تجربه انا عشتها

تزوجة وانا عمري تقريبا 16 سنه وكل اللي تزوجت معي حملت وانجبت ولكن انا حملت واجهضت وحملت واجهضت والعمر والايام تجري وكل شهر اقول هذا الشهر ويمضي والشهر اللي عقبه وبعدها حملت حمل خارج الرحم وضعفت عندي البطانه ضعف شديد لدرجة فيه دكتورة قالت لي بالحرف الواحد مستحيل يصير حمل وزوجي واقف زوجك ينجب بس

انتي لا تخيلي شعوري وانا اسمع هذه الكلمة وطبعا يترجمها لي مترجم عربي ووين كنت في الهند في الغربه بصراحة انصدمت وصمدة ولم ينطق لساني بكلمة وكمل كلامة الجارح وقالي لي عندك الرحم ميت ومتليف ولا تعلق فيه بويضه رديت عليه وقلت له ومن يحي العظام وهي رميم اللي يحي العظام وهي رميم قادر يحي بطانه الرحم وطلعت عنه وانا امشي وحابسه دمعتي وكانه داخلي شعور يقول لي سوف تحملي وكنت اكذب هذا الشعور وتم هذا الشعور معي ملازمني كل الوقت مستحيل احمل وقلت الي زوجي انا مستحيل احمل تزوج انا سوف لا احقق لك حلمك يقولي من قال لك قلت الدكتوره ورد عليه وقال هل الدكتوره تعلم الغيب وفعلا استوت وايد مشاكل وبيني وبينه ليست مشاكل علشان الحمل مشاكل وحده تريد تتزوجة وسبحان الله الله بعد ريلي عنها من هني وحملت انا ولم اتوقع في لحظه بانه سوف يصير حمل ولا واحد من مائه حتي كل ما اروح اي مستشفي في دولتنا احس هذا الاحساس اخذ المواعيد ولا اروحها اقول ليش اتعب نفسي انا سوف لا احمل...

والله يا بنات اني لو رحت عند اي دكتوره اخذ الحبوب واستخدمها ووقت الصوره تطلع البطانه ضعيفة ويوم تقولي الدكتوره البطانه وايد ضعيفه ياتيني ياس واحباط وافر الحبوب في الزباله واحط الياس بين عيوني مرات عده سويت هذه الحركة وحتي زوجي احيانا اروح من وراءه علشان ما يسالني شوه سويت او شوه قالت عن البطانه وافر الحبوب واترك العلاج واروح عند دكتوره ثانيه بعد فتره وهكذا والياس ملازمني وشعور سوف لا تحمل...

وكنت الشي الوحيد اللي لم اتركة قراءه سورة البقره والاستغفار وسويت صدقه جاريه وكفاله يتيم والدعاء والاحباط يعلب بقلبي
وشوف الشي اللي لم اتوقعة الدوره جاتني اخر شهر 2 ولم تاتيني 3 ولا 4 وقلت اكيد الدوره انقطعت اكيد مثل ما قالوا لي البطانه ميته وسوف لا احمل وبدايت وشهر 4 حاسه بضيق واختناق وفكر اعوذ بالله منه وكارهه الدوام واريد انام و8 ايام تقريبا من شهر 5 قلت بسوي فحص ...

والله يا بنات ولا امل ولا نقطة امل بس من باب تجربه وكنت توني داخله 17 سنه من زواجي من 3 شهور وحتي والله اكب البول في الفحص وقاعده اقول في نفسي شوه باقي عن عشرين سنه متزوجة باقي لي 3 سنوات وكم شهر وكم عمري الحين وانا الف اشوف الفحص + + + موجب هذا حلم او تهيه لا مستحيل اكيد هذا الفحص خربان وتم الفكر يلعب بي بعدها سويت فحص دم قالوا لي مبروك حامل وانا واقفه بزهول اتصلت بزوجي اخبره وامي وبعد رحت عند دكتوره اتاكد تاكدت الخبر صحيح ولم اخبر احد اقول يمكن مب صحيح ..

شفتن كيف الانسان لما يعاني اكتب لكم وانا تخنقني العبره واتمنا بس اشوف اللي عذبني بالانتظار سوه بنت او ولد الله يبارك فيه ...

خواتي لا ياس من رحمت الله والله كتبت لكم قصتي علشان اعطيكم الامل بالله سبحانه وتعالي وانه رحمت الله فوق كل شي وامره اذا اراد شي يقول له كن فيكون وايه سيدنا ابراهيم وسيدنا زكريا تدل علي رحمت الله بنا نحن البشر..