كيف اتصرف مع زوجي ... ؟!؟

السلام عليكم ورحمة الله وبركاته ..


بنات عندي مشكله وياريت تساعدوني فيها .. اليوم اول ماقعدت من النوم تميت ساعه كامله افكر في حل لمشكلتي .. وفكره توديني وفكره تجيبني .. والله مب عارفه شسوي .. بقولكم مشكلتي باختصار ..


انا وزوجي تصير بينا مشاكل كل فتره وتعدي .. مشاكل عاديه مثل اي زوجين .. لكن انا مادري هل زوجي يتمادى معاي او هذا شي طبيعي ..

بقولكم اخر هوشه صارت من بينا .. طبعا امس فليل .. تم زوجي يلمحلي انه يبي يسافر هالويكند مع ربعه .. انا تضايقت .. وقلتله ليش ؟؟ يقول ابي اغير جو .. طيب وانا ؟ يعني انت متملل ومتضايق وانا مبسوطه ومابي اغير جو ؟؟ المهم لين ماطفشني وقلتله كيفك سافر .. قالي اصلا مانطر موافقتج .. وبسافر اي وقت لو ابي .. انا سكت .. بعدين قالي انا كنت امزح معاج بس كنت ابي اشوف ردت فعلج .. انا اكتشفت في ريلي صفه ان هو لو يبي يسوي شي يقولي عنه ولو شاف ردت فعلي سلبيه يقول كنت امزح معاج ووو الخ ...

وتمينا نتناقش ونتهاوش شوي وشوي نهدي .. المهم لين مليت وقلتله خلاص انا رايحه انام .. وقعدت اقول شنو هالعيشه كل شي زفت .. الخ .. هو قالي لاتحندين اخر الليل وسكتي ( طبعا كان فالصاله ) .. انا قلتله كيفي بقول اللي ابيه .. شوي الا جاني الغرفه وهو معصب ويصارخ .. وبعدين بدا يسب يابنات ويقول كلام خايس .. طبعا انا مارضى حد يسبني .. او يعاملني بهالطريقه .. قلتله لا تسب وتكلم عدل .. وتميت ارد على كلامه .. وبعدين مد يده .. وتم يقولي ان انا مب كفو وان انا ياهل وانا ماعرف السنع وماعرف شي .. وتم يلمح بالطلاق .. ويقول عادي لو رحتي بتجي غيرج .. اما انتي بتخيسين في بيتكم ..

تخيلوا بنات يقط علي كلام ويسب ويهاوش وصوته عالي وانا لو رديت عليه بكلمه مد يده علي .. المهم قعدت اصيح .. حاول يسكتني لكني ماسكت .. وعصب ومسكني بالقو .. حاول يصكر حلجي بالقو .. والله الحين احس بألم صوب حلجي والم في يدي .. كله منه حسبي الله ونعم الوكيل .. خصوصا اني حاطه تقويم .. طبعا انتو تعرفون ان البنت ضعيفه مو نفس الريال .. وهو يستخدم قوته ضدي .. :( يعني هذي الرجوله في نظره ... والشي اللي يذبحني من داخل .. ان ابوي .. الله يطولي بعمره .. ماعمره مد يده علي .. حتى لو سويت شي غلط .. ممكن يعصب او يزعل او يهاوش بس يمد يده على بنته لا والله ولا مره .. وهذا بكل سهوله كل ماصارت مشكله مد يده ..

عاد انا امس قلتله مو من حقك تمد يدك ولو مديتها بتصل في الشرطه ... هو شكله خاف شوي .. بس قام يستهزء ويقولي يالله اتصلي مو مسوينلج شي .. :(


ايه ونسيت اقولكم هو حاقد علي بس عشاني امس سهرت وهو نام .. تم معصب علي من هالسالفه .. اول شي غثني على الغدا وتم يهاوشني لين ماصحت وعقب رقدت .. ولما قعدت هو طلع ولما رد صارت هالمشكله بينا اللي قلتلكم عنها .. وهو بعد محتر لاني ادخل النت وادخل هالمنتدى .. مع اني والله ادخل لما يكون مش موجود او يطالع تلفزيون او ماعندنا شي نسويه .. وبعدين منعني من اللاب توب .. وقالي مب احسنلج لو خذيتيه وخشه عني :( وانا اليوم لما قمت تميت ادور لين ماحصلت اللاب توب وشبكت منه عشان اقولكم هالمشكله .. ابيكم تساعدوني بنات ..

انا ماعرف شسوي .. فكرت اروح اقول حق امه المشكله .. وفكرت اقول حق امي .. وفكرت اخذ اللاب توب لاني عرفت مكانه وقبل مايرجع من الدوام ارجعه .. وفكرت اخلي اللاب توب عندي وخله يشوفه وبالطقاق .. يعني شبيسوي ... بيكبر السالفه بكبرها انا بعد .. والله مو عارفه افكر ..

هو يبي يمشيني على كيفه .. يبيني اقوم الصبح وارتب وانظف ولما اخلص انزل تحت عند اهله ولما يجي استقبله واحطله الغدا .. واذا يبي ينام انام حتى لو مافيني نوم غصب يعني وماسهر ...

اعرف بتقولون هذي امور بسيطه وسويها وعادي .. لكن يابنات انا شاكه اني حامل بس مو متأكده وابي انطر كم يوم وبعدين اتأكد .. انا كنت اسوي كل اللي يبيه الاسبوع اللي طاف .. وعلى نهاية الاسبوع والله بدا ظهري يعورني وماقدر واخاف اسقط بصراحه من جذي قلت بريح نفسي وماراح اسوي شي .. خصوصا اني سقطت اول حملي بسبته .. :( كنت شاكه في اول حمل اني حامل وقلتله بس ماصدقني وكان يبيني امشي واتحرك واسوي وبعد ماطلعت النتيجه اني حامل .. تخيلوا وضع الحامل وتغير الهرمونات .. وكنت متنسيه على كل شي .. على زوجي والغرفه والبيت ومع هاي كنت صابره والله مع ان جبدي كانت تلوع بس شسوي .. وهو ماكان يحس .. وانا كنت حساسه طبعا وقت الحمل .. وهو كل يوم هواش وزعل ويخليني اصيح كثيررررر ومره مد يده علي وانا حامل تخيلوا ؟؟؟ واخر شي سقطت :( .. انا خايفه ومابي اسقط مره ثانيه بسبته وامس قلتله ان سقطت مره ثانيه مب احسنلك ..

يابنات مافي اغلى من الضنا .. كل شي يتعوض الا الضنا لو راح مايتعوض :( .. يعني شاللي بيبقى لي ؟؟؟ ذيك الحزه راح اعاف زوجي للابد ومابي اشوف رقعت ويهه ..

وفوق هاي كله يابنات .. قبل ماعرس .. قالي زوجي ان راتبه بيكفينا خصوصا ان احنا ساكنين في بيت اهله والاكل والسكن عليهم يعني مو دافعين شي .. وقالي ان راتبه بيكون لي .. وقسم بالله ان الحال الحين مو جذي ابدا ... هو مايصرف علي .. تخيلوا بنات والله انا اشتري اي شي ابيه من فلوسي :( لو ابي عبايه انا اشتريها لو ابي بجامات واندر وير انا اشتريهم لو اروح الصالون انا اللي ادفع .. كل شي يابنااااااااااااات والله كل شي من راتبي :( .. هو مايعطيني شي .. انا ماطلبت المستحيل لكن لو يعطيني كل شهر 1000 بيكون سوا واجبه الشرعي .. تعرفون من واجباته ان يصرف علي وانا ماشفت شي من هذا ابد .. لا وازيدكم من الشعر بيت هو كان يبي وحده مب موظفه .. يعني اللي يطلب هالشرط المفروض انه يوفر الفلوس حق زوجته مب يخليها هي تصرف على عمرها ...


انا ابي اعرف الفرق بين الحين وقبل يوم كنت عزوبيه ؟؟؟ شالفرق يعني دام انا اللي اصرف على نفسي الحين ؟؟ والله ارجع عزوبيه احسنلي .. معززه مكرمه في بيت اهلي واي شي ابيه اخذه وخلاص ..

بلا ذل بلا كلام فاضي .. ماشفت من الزواج وهالريال الا عوار الراس والسنداره والقهر والكآبه .. :( يبيني اسويله كل اللي يبيه وهو مايفتكر فيني ..


انا والله مسكينه .. ماطول الساني ولا اسويله شي ولا غاثته ولا اقوله عطني وهذا جزاي ... والاسبوع اللي طاف كان مسافر مع رفيجه عشان رفيجه كانت عنده شغله برا البلاد وخذ ريلي معاه .. والله يابنات انا سكت وماقلت شي وقلتله الله يحفظك واستمتع بوقتك .. وفوق هاي كله لما رجع شريتله هدايا وعطيته .. وهو طبعا فرح فيهم لان كان يبيهم .. المهم .. تخيلوا مافكر يجيبلي اي شي بما ان رد من برا ؟؟؟ انا ماطلب شي خيالي ولا الماس او ذهب .. حتى لو غرشة عطر .. اي شي .. المهم انه تذكرني وجابلي شي ...
صج اني ماعطيته الهديه عشان يعطيني .. لكن اقل شي انه يفكر فيني وهو برا ويتذكرني بشي .. لو تخيلنا الوضع بالعكس .. يعني لو انا اللي مسافره .. اكيد مليون في الميه كنت جبتله شي .. وفكرت فيه .. لكن هو .. ؟


في النهايه ..
اقول في نفسي استاهل اللي يصيرلي .. انا اللي جبته حق نفسي .. لاني ساكتتله وماطالب بحقوقي .. وبالعكس اتعاطف معاه ومدلعته .. وكان هذا جزاي ..

ونسيت اقولكم .. ان لما تزوجنا كانت شهادته ابتدائي والحين صارت اعداديه .. وانا طبعا ادرس فالجامعه .. لكن والله العظيم والله يشهد علي اني ولا مره عايرته او ذكرتله هالنقطه !! مع ان هو من نفسه يحس بالنقص والفرق لكن انا ماجيب طاري هالموضوع ابدا ... واحسسه ان هو الاحسن ..


ونقطه اخيره ..
هو تقدم قبلي حق بنات وارفضوووه تخيلوا .. وانا وافقت من سوء حظي .. والحين يظن ان لو طلقتي .. بترضى فيه وحده ؟؟
بيكون مطلق ومفلس وتعليمه اعدادي .. من اللي بترضى فيه؟؟؟
والله اعرف ناس يقربونلي عندهم ولد مافي احسن منه وقلبه ذهب وجامعي وراتب ووظيفه محترمه وكل شي ومسكين ماتوفق مع اللي خذاها وطلقها بعد شهر بسبب مشاكل من البنيه واهلها .. وصار له سنه يدور بنت وماحصل ..
تبون هالعله اللي عندي يحصل بنت ترضى فيه !!! :mad: اخ من حظي الردي ..