من كم أسبوع كنت أتفرج على Rachel Ray، و كانت تسوي هذي الأكلة...
هي أساساً وجبة للفطور، لكن ممكن تسوونها غدا أو عشا و يكون جنبها سلطة...
هي الفكرة مو جديدة، لكن هي أضافت عليها إضافات خلتها مميزة و بنكهة رائعة...
من ناحيتي غيرت فيها شوي بس :)
نبدأ بسم الله...
الكمية لشخصين:
بنحتاج:
زبدة
3 فصوص ثوم مهروسة
8 شرايح توست
جبن سايل
4 بيضات
ملح – فلفل أسود
جبن بارميزان
بقدونس مفروم
أول شي نحط الثوم مع الزبدة في قدر صغير و نطبخهم مع بعض، بدون ما تحترق الزبدة بس تاخذ نكهة الثوم...
نجهز صينية بايركس كبيرة، و ندهنها بالزبدة اللي جهزناها...
الحين ناخذ التوست و ندهن كل قطعتين بالجبن السايل و نسكرهم على بعض، مثل الساندويتش بالضبط، بعدين نجيب قطاعة دائرية و نقطع الخبز من النص... أنا سويت حركة و قطعتهم على شكل قلوب [FONT=Wingdings]J[/FONT]
نصف الخبز في الصينية و ندهن الوجه بعد بالزبدة و ما ننسى قطع الثوم أحلى شي [FONT=Wingdings]J[/FONT]
نكسر بيضة وحدة داخل كل فتحة، و نرش الوجه بالملح و الفلفل و شوية جبن بارميزان، و آخر شي البقدونس...
ندخل الصينية الفرن على حرارة 350، و نخليها لحد ما يستوي البيض...
إذا خفتوا على الخبز يتحمر كثير و البيض للحين ما استوى، غطوا الصينية بورق ألمنيوم بدون ما تسكرون جوانب الصينية... يعني بس حطوا الألمنيوم على الوجه و خلوا الجوانب مفتوحة عشان يطلع البخار...
بنقدم مع طبقنا صلصة طماطم:
بصلة صغيرة مفرومة
فصين ثوم مفرومين
صلصة طماطم جاهزة،
أو حبتين كبار طماط مقشرة و مقطعة مكعبات صغيرة + ملعقة كبيرة معجون طماطم
ملح – فلفل أسود
أوريغانو
نحمر البصل و الثوم بزيت الزيتون...
بعدين نحط عليه الطماطم و معجون الطماطم، مع شوية ماي، أو الصلصة الجاهزة، أنا استخدمت Prego
هذي أفضل نوع عندي و في منها نكهات كثيرة... وهذي صورتها...
و هذي الصلصة...
نبهر الصلصة و نخليها تتسبك على نار هادية لين وقت التقديم...
و هذا شكل فطورنا بعد ما جهز...
و عوافي على قلوبكم (f)
