هل ممكن أحبه في يوم من الأيام..؟؟؟

يعني ناتج كلامك تبين تنفصلين؟......طيب انفصلي .....وبعدين....تبحثين عن انسان تحبينه؟؟؟؟
فرظا لقيتي الانسان الي تحبينه..شلي يظمن لك انه بيحبك او انه مايتغير ويصير عنده نفس الشعور الي عندك الحين اتجاه زوجج...

مشكلتك اختي انك تقارنين زوجك بغيره .... غلط غلط ومية غلط...لما الزوجه تقارن زوجها بغيره معناتها حكمة على نفسها بالتعب ولارضى ...

ماراح اقولك حاولي مره ثانيه تحبينه لان انتي تحبينه يوم تطبخين له هاذا حب يوم تكوين ملابسه حب خلي هالكلام براسك وانتي بتشوفين حبك بعيونك لاحظي نفسك.....كتابتك للوضوع حب له محاولتك التقرب والتغير لاجله حب له كل هاذا حب بس انتي تفسرينه موحب ونفور ...

انتي لو ماتحبينه كان ذكرتي بكلامك كلمة الانفصال بس انتي تبحثين عن شي يقربك منه اكثر ....

الموضوع اختي لايحتاج دكتور ولا رقيه ولانصيحه ولا اي شي لان الموضوع كل حله بايدك تعوذي من ابليس وحاولي انك نهائيا ماتقارنينه باحد كله شوفي انه اهو الاحسن وانه حبه وحنانه لج اعظم شي يقدمه لك وبقولك كلمه يااختي اخذيلك جوله بالقسم وقولي الحمدالله على النعمه الي انا فيها
بنات يبجون على حياتهم الي ريلها مايكلمها والي يحتقرها والي يخربط من وراها والي والي والي .....قولي الف حمد وشكر وتعوذي من ابليس

وعذريني طولت عليكي شفتك محتاسه ومحتاره وكاتبه الكلام من قلبك قلت لزم اكتبلك

اختك
أم زهراء

ماراح تعرفين قدره الا اذا فقدتيه

بعيد الشر عنه قصدي لو انفصلتي ؟؟

لان المثل معروف (( ماتعرف قديري الا اذا جربت غيري ))

انا احس انج كنتي تعرفين واحد قبل والله اعلم ماحط في ذمتي بس لان صعب جدا اللي تقولينه وخصوصا انه لج خمس سنوات متزوجه .. لابد انج حبيتيه ولوو جزء بسيط بس مادري عنج


وبعد بقولج شي وانتي اختاري

(( واحد تحبينه ومايحبج ويمكن يذلج على حبج له ويغيضج )) ولا (( واحد يحبج ويموت عليج وطلباتج مجابه عنده وانتي ماتكنين له اي شعور بس عادي عندج لو تميتي معاه ))

هااا شنوو الاحسن الحين ؟؟

اتمنى انج تعرفين قدر زوجج عدل لانه مايستاهل اللي تسوينه فيه

والله يفك همج ان شالله

هلا والله أخت روز نورتي... صح كلامج خطأ اني أقارنه بشخص آخر بس مو بيدي ... مرة كنت أشوف برنامج النفس والحياة للدكتور طارق حبيب قال فيه جملة وحسيتها 100% تنطبق علي ... قال الزوجة اذا زوجها ملئ عقلها وقلبها مستحيل تفكر بغيره ولا تقارنه بغيره والزوج نفس الشيء...مو بالضرورة يكون انسان مثالي بس يلبي مواصفات الشخص الي يعجبها وهذا الشيء يختلف من شخص لآخر وإلي يعجبني ممكن مايعجب غيري وهكذا ... وأحس هذي مشكلتي الأساسية مع زوجي المسكين :(

حبوبة قطرية مشكوورة على ردج ... وانا ما أكره وأكن كل المعزة والاحترام ... بس ماأحس بمشاعر الزوجة الطبيعية اتجاه زوجها وحاسة اني غلطانة وتأنيب الضمير ذابحني ...حتى اني قلت له أنا ماعندي مانع تتزوج واذا تبي بخطب لك ...أقول شو ذنبه اني مو حابته هو قايم بالواجب وزيادة بعد

وهل كل البيوت تبنى على الحب

لنعد للقرآن الكريم

{وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجاً لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً إِنَّ فِي ذَلِكَ لَآيَاتٍ لِّقَوْمٍ يَتَفَكَّرُونَ }الروم21

ذكر في الآية الكريمة

1. لتسكنوا

2. مودة

3. رحمة

لم يتطرق القرآن للحب والعشق والغرام

وإضافة لذلك الإحترام والتقدير
آمل التدبر في الآية
والله المستعان

السلام عليكم في البداية حابة ارد على اختي الجوهره ترى الموده المذكورة بلقرآن الكريم هي اسمى درجات الحب ، وثانيا شوفي يا اختي اوركيد يمكن المشاعر الي تعانين منها ناتجة عن شي حدث في الماضي يعني ممكن انك انجبرتي عى الزواج من هذا الشخص مو قصدي انهم اخذوكي وخلوكي توافقي بلغصب لا قصدي مثلا هشخص تقدم لك سألو عنه طلع خوش رجال بعدها قالو لك فكري يا بنتي ترى هلرجال ما في احسن منه وانتي فكرتي ووافقتي لكن من داخلك ما حسيتي انك وافقتي عليه عن اقتناع وهذا سبب مشكلتك هي ان نفسك دايم ترجع بافكارها للماضي بحكم تخصصي مرت علي كثير من هذي الحالات ، بس الحل بيدك حاولي انك تحبيه كيف ممكن يكون هذا شوفي ايجابيات زوجك وحاولي تتقربي منه اكثر سولفي معاه كثير خلي نفسك كأنك بفتره خطوبة توك تعرفين زوجك جيبي له هدية من وقت لآخر اشتري ملابس حلوه من شانه اكتبي له رسايل وشوي شوي راح تتخلصي من شعور البرود الي انتي حاسه فيه واي مساعده انا حاضرة وبالتوفيق.

حبيبتى مين فاهمك ان الحب هوة اللهفة الرعشة
حبيبتى الحب =احساس بالمان والاستقرار والاستمرارية

راى انك محتاجة تشغلى فراغك بشىء مهم

والله العظيم يا أخت الأقمار 6 هذا بالضبط إلي صار وكأنج تقولين قصتي تمام التمام ... أهلي قالو لي من جاءكم من ترضون خلقه ودينه وهو أحسن الموجود ...بالنسبة لمجتمعنا هو من الأحسن بالفعل ...بس أنا ما اقتنعت به من الخطوبة يعني ماحسيت بالقبول أوني تقبلته بالعكس لما شفته بالملجة انصدمت وقعدت معاه أبدا ماحسيت تقبلته أو عجبني ... وأنا ما أتكلم عن حب الأفلام أنا أقصد الحب الطبيعي إلي مفروض يكون بين الزوجين ...لما الوحده زوجها يسافر لازم تفتقده وتشتاق له مو تحس بالفرح والسرور وماتتمنى يرجع بسرعة ويضق صدرها لين رجع ... أنا ماأحس هذا شيء طبيعي خصوصا لما يكون إنسان طيب وحنون علشان جذي أنا أقول هذا الشيء مضايقني ومأثر علي

هلا بك أختي

أختي طيب ما في أي أحاسيس عشره بينك و بينه ؟

يعني مرّت عليكم أيام حلوه...أيام رمضان و أعياد و مناسبات...حمل و ولاده...فرح و عزاء...

كل هذا لم يكوّن له رصيد عندك ؟

يعني أختي لو جارتي قعدت معاها 5 سنين جيران...لو راحت واللا غابت عني راح أزعل...بسبب إحساس العشره...صح ؟

اختي توقعك تكون هي مشكلتك وها الخطأ الي يوقعون فيه اغلب العوايل صحيح الخلق والدين مهمين في الزواج بس لازم يكون فيه تقبل نفسي قبل الزواج لان التقبل النفسي بين الزوجين مهم كثير وهو اساس العلاقة الزوجية بس يلغالية حاولي بكل الطرق انتي ما تبين تنفصلين يعني لازم تجتهدين وتسوين الي قلت لك عليه صلي دايم صلاةاليل وادعي الله انه يفرج همك قولي آمين.
واذا احتجتي اي شي انا حاضرة

مساء الخير شو اخبارك يا غاليه

انتي عايشه معه مده خمس سنوات تقريبا يعني هذا مو حب له ما توقع شخص يستطيع يعيش مع انسان مده طووويله هذي بدون حب له
با حياة الزوجيه ا هم شي فيه احترم والموده والحب وتبدل المشاعر ...
وانتي تحبينه وهذا اكيد من كلامك انك ما ذكرتي كلمه انفصال منه ...
طيب هو طيب معك ويحبك انتي حبيه ولا تقارنين احد فيه بيكون ملك في عينك

الموده تأتي من حسن العشره وهذا ماتكفل الله به للزوجين

عليكِ بالدعاء والصدقه غاليتي

وقولي هذا الدعاء(( اللهم صب محبة زوجي في قلبي صبا صبا وأرنا ذلك))

والله يسعدك ويرزقنا واياكِ الذرية الصالحه

الله يعينك يارب ويفرج همك وهم جميع المسلمين يارب

انتي فاهمه الدنيا غلط
انتي ادورين حب الافلام وهذاك مو واقع
اذا هو طيب شلي يمنعج تحبينه
تردين شنو
تفكيرج
انتي اللي مانعه نفسج ومسكره قلبج
ليني شوي
ودوري الحب فنفسج بتلقينه

اختتي يعني انتي ماعندج غيره الا تكرهينه ..لازم تعرفيين ان اكبر نعمة انا اهو يحببج ونتي تكرهينه مو انتي تحبيينه وهو يكرررهج اختي اتمسكي فيييه فكري كلا اب امور ايجابية وربي يوفققج ويسعدج

انا فاهمه عليييج اختي

ويمكن لان اهو ماعبر عن حبه لج عشان تبادلبنه

يمكن فيه برود بالعواطف

حاولي تخلينه يعبر

اتوقع لما تحسين انه يحبج ويبيج بتحبينه

ودامه ولله الحمد شخص طيب يعني مافيه عيوب تكريهنها

نصيحتي لج

لازم تلقين حل ممكن تستشيرين حد الاخصائين الاجتماعين

حرام تمر سنينكم بدوون حب

السلام عليكم يا عرايس حابه بس انبهكم لنقطه مهمه:
الي تمر به الاخت من مشاعر نتيجة عدم اختيارها شريك حياتها بملئ ارادتها وهذي ردة فعل طبيعية يعني هي قالت انها ما شافت حتى زوجها لما اجا تقدم ليها وبليلة الملكة شافته ومن هنا بدأت صدمتها ونفسيتها لان يا بنات التقبل النفسي يجب ان يكون قبل الزواج يعني على الاقل الوحده تشوف الي خاطبها وتقعد معاه بحضرة الاهل حتى لو من غير كلام ، طبعا البنت في هذي المرحلة لازم تستشرين ذوي الخبرة ومن ناحيتي كأخصائية اجتماعية انا والاخوات والمشرفة على القسم راح نساعدهاو من الواجب عمل خطه تدريجية حتى تتقبل البنت زوجها وتنزاح تلك المشاعر السلبية تجاهه وتبدأ بلانجذاب اليه و ان شا ءالله ما راح يكون الاكل الخير.

الاقمار6;9537210:
السلام عليكم يا عرايس حابه بس انبهكم لنقطه مهمه:
الي تمر به الاخت من مشاعر نتيجة عدم اختيارها شريك حياتها بملئ ارادتها وهذي ردة فعل طبيعية يعني هي قالت انها ما شافت حتى زوجها لما اجا تقدم ليها وبليلة الملكة شافته ومن هنا بدأت صدمتها ونفسيتها لان يا بنات التقبل النفسي يجب ان يكون قبل الزواج يعني على الاقل الوحده تشوف الي خاطبها وتقعد معاه بحضرة الاهل حتى لو من غير كلام ، طبعا البنت في هذي المرحلة لازم تستشرين ذوي الخبرة ومن ناحيتي كأخصائية اجتماعية انا والاخوات والمشرفة على القسم راح نساعدهاو من الواجب عمل خطه تدريجية حتى تتقبل البنت زوجها وتنزاح تلك المشاعر السلبية تجاهه وتبدأ بلانجذاب اليه و ان شا ءالله ما راح يكون الاكل الخير.

اسمحي لي اختي

مو من نظرة وحده راح اتاكد اذا هالشخص مناسب والا لا

بالاستخارة بس هو الشي الوحيد الي راح ياكد هالشي

مااتوقع المشكله في انه اساءت اختياار

لانه اهو مافيه شي بالعكس اهي تمدحه

ويمكن لو تقدم لاي وحده بتوافق عليه

المساله محتاجه نقطه التقاء للمشاااعر عشان تقدر تحبه