قصة ولادتي الطويله العريضه بأحلى قمر ..

السلام عليكم ورحمة الله وبركاته

مرحبا حبايبي الكل وحشني وخصوصا بنات التجمع والله انبسطت لما سمعت خبر ولاداتكم طبعا مفتقده البعض ماادري عن اخبارهم واليوم حبيت اكتب ليكم قصة ولادتي الله يعينكم على طولها .............

بسم الله
مو عارفه شكتب لكن الى باقوله ان حملي وولادتي بمولودي الله يحفظه غييييير يعني الحمل مو مخطط ليه ابد ولما عرفت اني حامل بغيت اموت حتى دمعتي بغت تطيح وكان في بالي ان هالحمل مايتم استغفر الله ومع مرور الشهرين الاوليين استغفرت ربي واقتنعت انها نعمه من ربي الرزاق خلال حملي حسيت بتعب بس مو مثل الاول ومن الشهر الثامن مرضت مرض من شدته ولدي تغيرت وضعيته وصابني مثل الطلق وكان وضعه ان راسه على جنب ورجايله تحت وفي التاسع تعدلت وضعيته وكان راسه تحت نازل عدل في الحوض وكان موعد ولادتي المقرر 13 -4 وحسيت حالي بنفجر من الحمل تعبت وااااااااجد وقلت باروح المستشفى وباخليهم يعطوني طلق مثل ولادتي الاولى المهم يوم السبت تاريخ 8-4رحت المستشفى على ان البيبي حركته قليله وعندي الم لما سوت لي سونار قالت لي حركة البيبي حلوه ومافيه شي قلت ليها طيب والالم الي عندي قالت لي بكشف ولقته 1سم قالت لي بتتنومي قلت ليها ايه على اني باخد طلق يوم ثاني الاحد جت لي الدكتوره سوت لي اشعه وكل شي اوكي الراس تحت ووضع البيبي مطمئن وقالت لي ماراح اعطيش طلق راح اسوي لش تحريض طبعا عذبتني بس قلت ماعليه اهم شي اولد وقالت لي مجرد ماتحسين بآلام خليهم ينادوني هي مشت من هنا واني الالم يشتغل عندي من هنا طبعا هي قالت الى ممرضه ((هنديه)) تعطيني الحقنه الشرجيه عشان يزيد عندي الالم وينفتح الرحم والقمر نست انها تعطيني اياها مع مرور الوقت الالم قل وصار الالم العادي الا اني احس فيه في الليل قلت باروح ارتاح لاني مواصله مانمت جت لي ممرضه وقالت لي عطوش الحقنه قلت ليها لا قالت كيف ومكتوب في الملف انش تاخديها قلت ليها والحين شسوي قالت لي ماادري تبغي تاخديها بس يمكن ماتجيب نتيجه هي المفروض بعد التحريض وقالت انها راح تتهاوش مع الممرضه الهنديه طبعا الممرضه خافت وقامت تقول انها نست من الزحمه طبعا كنت راح اشتكي عليها بس عورت قلبي وسكت قلت ((جلى من لا يسهو ))جت لي الدكتوره يوم الاثنين وقالت لي بنخليش عندنا نراقب البيبي قلت ليها اعطيني طلق قالت ليش مافيش الا العافيه مابنستعجل قلت ليها عجل بطلع قالت لا مافي ماراح اكتب لش على خروج رحت الى الممرضه وقلت ليها تكلم الدكتوره المسؤله عني مو هذي وتقول اني راح اطلع قالت لي اوكي بشويتين جت دكتوره ثانيه وقالت لي يالله حبيبتي راح نعطيش طلق واني طايره من الفرح ولما فحصت قامت مختلعه طيحت قلبي وياها قلت ليها خير قالت لي مالقيت الراس بسرعه جيبو لي باسوي ليها اشعه ولما سوت لقت البيبي بالعرض رجوله في جهة اليمين والراس جهة اليسار قالت لي مستحيل لازم عمليه واني بغيت اموت كيف ؟؟ المهم ودوني غرفة الولاده على أمل انه يتغير وضعه واني صياح قلت ماراح اشوف ولدي وكل تفكيري فيه اقصد علاوي وهناك شافوني دكاتره وعورت قلبهم وقالو لي ماراح نخليش تولدي عمليه بس بشرط تساعدينا قلت لهم اوكي بس شلون قالو راح نعدل وضعه فروه وهو مو راضي بشوي مسكته دكتوره وراسه تحت في وضعه الطبيعي والثانيه قالت راح افتح لش جيب المياه وفتحت وخلاص تركز الراس تحت كلمو استشاريه وقالت لهم اعطوها طلق عن طريق الجلوكوز بشوي جت ممرضه اعرفها وقالت لي اني الي راح اولدش وعطتني ملين لعنق الرحم على اساس اني اولد بدون الم وبعد فتره لما جت تفحص قالت لي الرحم فاتح 4سم بس ماشفت الراس ونادت دكتورتي الا ولدتني بعلاوي طبعا خلاص الدكاتره الي عدلو وضعيته دوامهم انتهى هم والاستشاريه ولما جت الدكتوره لقت انه راسه بجهة اليسار ورجوله جهة اليمين واني قلبي خلاص شوي ويوقف راحو نادو دكتوره ثانيه وقالت مستحيل شلون كذا لما جت تسوي لي الاشعه صار مقعدي وقالت لي عادي نقدر نولدش من المقعده كونها الولاده الثانيه بشرط تساعدينا بعدين بالدف قلت لها موافقه ولا اولد عمليه وصل الخبر الى استشاريه كبيره هي بالسن لما جت لي قالت مستحيل اخليش تولدي طبيعي عورتي قلبي قلت ليها ليش قالت حرام حجمش صغير والبيبي وزنه 3 و400 كيف راح يطلع من المقعده قلت لها عادي الاول جبته 3ونص قالت مستحيل لان اكبر شي في البيبي الراس تخيلي انه طلع من المقعده يمكن الراس يعلق وتروحو فيها قلت ليها حاولي تفريه قالت مستحيل الرحم مو لعبه وبعدين ماي مافيه اسمعي كلامي واتصلي بزوجش كلمت ابو علي وقال لي خليهم ينتضرو عليش شوي قلت ليه مافي وقت يا اسويها يااولده بالمقعده قال لي والله محتار خفت على ولدي وقلت ليهم موافقه وتوكلت على الله ورحت غرفة العمليات بس للامانه الممرضات ودكتورتي ماتركوني مشو وياي للغرفه طبعا الاستشاريه ماهنت عليها وقالت ليهم بنفسي راح اشرف على عمليتها عورت قلبها ونزلت لى غرفة العمليات وراقبة الوضع وشرف(( عباس )) الساعه 1و40 دقيقه يوم الثلاثاء الفجر 11-4طبعا لما خلصو وجو يصحوني ماصحيت لاني ماكنت نايمه ولا ماكله وصار لي تقريبا ساعتين وشي ولما ودوني الغرفه كان في بالي ولدي وصحيت من شدة الالم وجتني الممرضه الي اعرفها قالت لي كنت ملازمتنش طول العمليه ماخليتش ولما سالتها عن ولدي قالت لي صورته ولما شفته اخوه علي طبق الاصل ولما سالت عنه قالو لي انه في الحضانه ماراح يجيبوه لي الا اذا صحصت صرت حديث الكل والدكاتره كلهم جو لي يشوفوني والكل تأثر لحالي كيف قلب حاله وان الله كاتب والكل مستغرب حتى الاستشاريه جت تقول والله ماتوقعت كذا لو عارفه انه راح يفتر كان عطيتش طلق صناعي عشان يفتح الرحم اسرع بس الله قدر ..غير كذا المهدأ كل 8 ساعات بس والله يجي الالم قاااااااتل وكني اطر الشي منهم حدي باموت وهم يقولون شوي وراجعين وهم يروحون وينسون حالهم الله يعين بعدها جت امي وخواتي وخالتي وعلاوي طبعا علاوي جلس يبوس في ايدي عورت قلبه ودمعت عيونه وكان خايف قلت له شفت جبت لك عباس باخليك تشوفه وكلمت ممرضه وخلته يشوفه وكان مبسوووووووط طبعا العصر جو الاهل وقال لي زوجي راح اروح اشوف ولدي ولما راح قال احلى من علاوي ههههههه قلت له حرام اصلا هو يشبه قال لي اول ماطلع بس الحين غير تخيلو الكل شافه وجلسو يوصفوه الا اني كل مااقول ليهم جيبوه يقولو بعدين وبعدها اكتشفت انه عنده الصفره وكلمت ممرضه وااخدتني عنده وكانت عيونه مربطه لانه عند جهاز وقلبي يتقطع عليه بعدها طلعت على مسؤليتي لان القسم الا اني فيه القيصريه زفت وبعدين عذبو ولدي من سحب الدم قررت اطلع بعد يومين من العمليه وهم بالاساس القيصريه عندهم تجلس 3 ايام اليوم الثالث كذا بس لما رجعت العصر البيت كنت تحت تاثير المهدأ وفي بالي اني اقدر اقوم واقعد اللهم الم خفيف وفي الليل يعصرني الالم حتى لدموع طاحت عذبت خالتي وياي الحمام وانتو بكرامه مااعرف ادخله بروحي ومااقدر اقوم بروحي ولا اجلس ولا انام حتى اخو زوجي قال لي راح ارفع لش السرير من جهه مثل المستشفى وصرت انام واجلس واني قاعده 10 ايام واني على هالحال لا يمين ولا يسار ودموعي مافارقتني من شدة الالم حتى ولدي مااعرف امسكه حدي ارضعه بس هذا الوقت الى اتقرب منه وخالتي اذا شافتني غفيت تعطيه صناعي مسكين فعلا العملية قااااااااااتله من جد الحين بعد مرور شهر و4 ايام عليه الحمد لله اقدر احمل ولدي واناغيه واضمه طبعا التهب علي جرحي مرتين ومو عارفه السبب مع اني مهتمه فيه وعندي هوس تنظيف من ناحيته بس من وين جى الالتهاب ماادري بس الحين الحمد لله تحسنت واجد وهالعمليه مااتمناها الى احد الله يبعد احبابنا والله يساعد الا سوتها ..

الله يحفظ زوجي واولادي وحبايبي لي ويحفظ ليكم اولادكم واحبابكم ..........

وفي النهايه اشكر الكل عذبت الكل وياي بس والله ماقصرو اشهد ليهم انهم وقفو ياي وقفه محترمه وبعض البنات ماقصرو سألو عني فرحو ني جد بسؤالهم والله يوفق الجميع ويسهل على الجميع ياااااااارب..

اشكر الي اتصل فيني ام حبيها ورابنزول وريحانتي الا شرفتني وخصوصا ريحانة المصطفى ماقصرت والله بين فتره وفتره تذكرني مشكوره ياقلبي والله ينولش الا في بالش ويحفظ لش جوده..
واسمحوا لي على الاطاله..