صديقتي وضعت لكم مشكلتها بين ايديكم لا تفشلوها ؟

ا

ايوت

عروس مبدعة

10-05-2009 | 08:44 PM

بنات هذه مشكلة صديقتي كتبتها لكم وتبغى مساعدتكم .......ولانها غير مشتركة في هذا الموقع فطلبت مني انسخها واضعها بين ايديكم ... هي تبغي منكم تعطونها حل وتعلمونها هل هي على صح او على خطأ ؟؟ الله يوفقكم ويصلح لكم عيالكم وازواجكم .. ساعدوها الحرمه عايفة الدنيا وما فيها بسبب هالمشكلة ..

السلام عليكم ..

انا تعبت جدا من التفكير والهم .. وما لقيت احد افضفض له غيركم .. ياليت تسمعوووني للاخير وتعرفون قصتي مع اهلي وانا صارت لي مشاكل معهم قبل .. ياريت تساعدوني لاني محتاجه لرأي مختلف .. عن رأيي بدون انحياز .. واشوف هل انا على خطأ ام على صواب ..

انا بقولكم عن قصتي ومشاكلي مع اهلي اللي ما تنتهي ... من مشاكل الغيرة بين اخوي الصغير وولدي ... الى مشكلة الغيرة من خواتي لي ... الى مشكلة التفرقة اللي يعاملوني فيها امي وابوي بيني وبين اختي المتزوجه الثانية وبين اخواتي اللي مو متزوجات

تزوجت و جبت ولدي الكبير عمره 5سنوات واخوي الصغير عمره 6سنوات .. من اول يوم لولادتي اخوي كره ولدي وضربه وهو ملفوف عمره جم يوم .. واستمر مسلسل الكره لولدي والغيرة منه .. ما يحبه ما يخليه يلعب وياه يضربه يطنز عليه يبعد اليهال عنه ..

تم ولدي وحيييييد وصار انطوائي وشخصيته صارت ضعيفة ... وانا كل ما نتجمع ببيت اهلي تصير مشاكل مع اخوي وولدي .. و هواش وضرب الاول كنت اسكت واطلع مع ولدي من بيت اهلي ودمعته على خذه واذا شاف اليهال يلعبون يقعد بروحه عنهم لان اخوي ما يرضى يخليه يلعب وياهم ..

انا حاولت بشتى الطرق احببهم ببعض اشتري له هدايا وملابس والعاب والوان و اوديه معانا كللللللل مكااااان ... يعني البحر المنتزهات الحدائق المجمعات المطاعم .............ولكن لا حياة لمن تنادي ..

قمت استخدم معه اسلوب الشده اذا ضرب ولدي استحرق عليه .. و اعاتبه ساعات باللين ... ولا اسلوب نفع معاه ..

المهم الاسبوع اللي طاف صارت مشكلة مع اختي والسبب ان ولدي الصغير عمره سنة وحده كسر لها غرض من غرفتها وقامت تهاوشني قدام الكل انا رديت عليها ما سكت عنها لكن شلت عيالي و عيوني تدمع ورحت بيتي .. اخذت الغرض اللي انكسر وصلحته لها ورجع جدددددديد .. وانا كل ما ادخل بيت ابوي واطلع تطالعني بنظرات كأني انا مسوية جريمة مع ان الخطأ منها تركت هالغرض مرمي وياهل ما يفهم وش ذنبي وانا كنت مشغولة بشئ ضروري ما قدرت امسكه ..

خواتي وش سوو .. وقفو يمها مع انها غلطانه ...بس يتقربون منها .. لانها اشوية مريضة بس هذا مو عذر لتصرفها ... ليش وقفو يمها عشان يقهروني .. ويسوون حزب ضدي .. مع اني ما اقصر عليهم بشئ اخدمهم بعيوووني اوصلهم بسيارتي ليما وسخووها لي الكراسي والارضية .. اذا احتاجو اي شئ اقوم فيهم اختي بولادتها انا رحت وياها و جبت لها اغراضها و وصلتها لبيت ابوي بدل زوجها ما يستلمها من المستشفى .. ووووووووو شنو اعد ؟

وهاذي اختي اللي ولدت ولدها قريب سنه لولدي الصغير ... لكن في فرق كبييييير في المعاملة .. بين ولدي وولدها ... وبيني وبينها ..
ابوووي يعززززها ويحبها وااايد اكثر مني وامي بعد .. ما ادري ليش مع اني ما اطلب منهم طلبات مثلها .. وهي دوووم تروح عندهم وتقعد وياهم وانا لو اروح دقيقتين استثقلو مني ومن عيالي .. وانا تصيدني ظرووف صعبه محد يوقف يمي .. وهي بالعكس الكل يساعدها ويوقف يمها .. ولما زوجها ما يعطيها فلوس ابوي وامي يساعدونها .. و زوجها دايما يمدحونه مع انه ما يزورهم و علاقته وياهم سطحيه عكس زوجي اللي يعتبرهم مثل اهله .. يعني يفرقون وايد بيني وبينها في المعاملة في المال مع اني مو محتاجه لهم بالعكس هم اللي يطلبون مني فلوس دايما ويوم صارت حالتي المادية صعبه جدا جدا جدا محد فيهم فكر حتى يساعدني بريال واحد ؟؟

المهم الجمعه اللي طافت اخوي الصغير جاي وياه واحد يصير لنا وقام يلعب وياه بيروحون حديقة يم بيتنا قلت له خذ معاك ولدي ما رضى قلت للخدامه روحي وياه وديه .. وعطيته فلوس رجع خذه احمر وقالت لي الخدامه ان اخوي ضربه في الشارع ولو مو واحد كبير فكك بينهم جان صار فيه شئ ..
انا قلت له شوف اذا مرة ثانية تضربه بضربك بالنعال قام يصارخ علي في وجهي ويهاوشني >>>يقلد على اختي اللي هاوشتني قبل ولاحضو كم عمره وكم عمري ؟؟ انا عصبببببببببببببببببت وقمت اصارخ عليه واهاوشه ورميت عليه المخده كلهم قامو علي خالاتي واخواتي وامي تقولي هذاك ولدك وهذا اخوك ليش تفرقين بينهم ؟؟؟ >>>اللحين طلعت انا اللي افرق ..

ومن هالهوشة قلت لها مدام عيالج يسوون جذي وكل جمعه واحد مهاوشني لاني جايه بيتكم ولاني زايرتكم .. ازوركم اهم واغم روحي مع مشاكلكم .. مع العلم ان ابوي قاعد على الغذا ويمدح في اختي وزوجها انه كريم مع العلم ان زوجها حتى سرير لولده ما اشترى له ولا حتى سوا لها حفلة عرس ومن مهرها اثثت شقتها .. كل هذا نغزة علي ان زوجي مو كريم لانه رضا اني اساعده وابني وياه البيت مع العلم ان البيت نصه كتبه بإسمي على اني ما اشتريت وياه الارض بس ساهمت ببناء وتأثيث البيت .. ومع ذلك يمدح ويبجل بزوجها وانا زوجي حريص وبخيل .. ويمدح بتخصصها ومسونها كأنها دكتورة مع انه حتى شهادة دبلوم ما تعادله وانا شهادتي بكالوريوس علم نفس .. بس هو يبي يسوويها احسن مني هي وزوجها وولدها .. وانا ولالالالالالالالالاشئ ..

طلعت بعد الهوووشة ولا كأني طالعه حتى محد كلمني واسمعهم وراي يقولون حاطه بالها مع اليهال وعقلها صغير وحساسة واللي تقول ما ادري شو ؟؟ هذا بعدني ما فتحت الباب
..و اول يوم دوام رسمي بعد اجازة نهاية الاسبوع وانا اودي ولدي لامي مدام انا بالشغل .. واليوم خليته عند الخدامه ما وديته لها وبسبب :.. 1. لان اخاف يخرب شئ من عندهم واتصير مشكلة . 2. لان امي عندها ولد اختي يجيبونه الظهر لان اختي تروح تدرس وما تهتم بولدي عدل يحبي في الارض بروحه ويجيبه ابوه وسخ مو كل الاوقات وعطشان ولا جوعان ولافيه نوومه لان اخوي ما يخليه ينام ويرتاح الظهر بعد ما يجي من الروضة . 3. لان اخوي الصغير اخاف يضربه ويسوي فيه مثل ما سوى في ولدي الكبير وخصوصا انه اللحين اشوفه مرتين يضربه مع ان عمره سنة وحده . ولااحد تكلم له وادبه ..

انا قررت اني ما اودي عيالي بيت اهلي اذا بزورهم وبعد قررت اني ما اروح اتغذى عندهم كل جمعه مجرد زيارة خفيفة عالطاير .. عشان صلة الرحم .. وقررت اني اخلي ولدي عند الخدامه اذا رحت الشغل خصوصا ان امي حتى ما اتصلت تسألني ليش ما جبتيه ولا افتكرت حتى .. مع ان اختي لو تأخرت نص ساعه ما جابت ولدها في نفس الوقت تتصل وكم مرة تصير جدامي هالشئ ..

بعد ما سمعتوني وكسبتو فيني اجر ............... ابغي منكم تساعدوني بالحل .. وتكسبو فيني اجر لاني تعبااانه منهم ومن معاملتهم لي ...

ا

السمسم

عروس مبدعة

10-05-2009 | 09:07 PM

اختى الكريمه ربي يكون فى عونك بس انى شايفه ان تصرفك صحيح انى لو منك معاش ناخد اولادى معاى خليهم بالبيت او خلى ابوهم ياخدهم مشوار او خليهم فى بيت اهل زوجك وانتى امشى لوحدك زورى اهلك وقومى بالواجب دون ان تتغير معاملتك معهم وادا سالوك تحججى باى شى وهما اكيد حيفهموا لوحدهم

ا

ام عزوز العسل

عروس مشرقة

10-05-2009 | 09:16 PM

لا حول ولا قوة إلا بالله
المشكلة إن هذيلا امج وابوج وهلج يعني ماتقدرين تسوين شي وماتقدرين تقطعين صله الرحم
انا معاج في إلي بتسوينه واأيد قرارج إذا بتروحين بيت هلج لا تاخذين اليهال معاج احسن لج
وما عليج إلا الاستغفار ياختي ترى يسوي العجايب والله والله يهديهم إن شاء الله

ا

ايوت

عروس مبدعة

10-05-2009 | 09:27 PM

طيب تتوقعو ليش يسوون جذي وياها ؟؟ وش السبب ؟؟

سألتني ما قدرت اجاوبها ؟؟ يمكن يغارون منها ؟!!!

ج

جوبي

عروس مشرقة

10-05-2009 | 09:34 PM

اختى الله يساعدك بس انااحس انك كثيرحساسه ومشاكل اليهال المفروض ماتخليك تفكري بهاالطريقه والغيره بين اخوك وولدك شيءطبيعى بهاالعمركبري عقلك ولاتشعلى نارالغيره في صدرك مهماكان انتم اهل وخوات اشغلى وقتك بشي مفيدبدل التفكيربالمشاحنات وتقربي من اخواتك وحبيهم واحسنى الضن فيهم وتكلمي مع امك في طريقه تأديب اخوك وعاتبي اختك وضميهاوصفى قلبك هذول اهلك مالك غنى عنهم وقولي لامك الي بخاطرك وتوصل لاابوك مايميزبينك وبين اختك ولايسوى مقارنه بين ازوجكم حبيبتي الدنياماتسوى واحلى مافيهاوجودالأب والام مابيك تفقدينهم بسوالف تافهه وحزازيات والله لايقدراذافقدتيهم بتحسين بالم وتتمنى كل لحظه موجودين فيها سامحيني طولت عليك بس وسعي صدرك وادعي انك تحصلين راضى والديك وفقك الله

.

.. أمــ عــلــيــ ..

عروس ماسية

10-05-2009 | 09:42 PM

الله يكون في عونك
انتي جربي زي ما قلتي تزوريهم على الطاير وخلي اولادك مع ابوهم ...
واذا رحتي الدوام حاولي تحطيهم بحضانه أأمن لهم من القعده لحالهم مع الخدامه ...
لو سألوك بعدين وين اولادك ما نشوفهم قولي لهم اللي بخاطرك وخليهم اللي يزعل يزعل واللي يرضى يرضى ...

اكثري من الاستغفار ... والدعاء لهم بالهدايه والصلاح وان الله يلين قلوبهم عليك وعلى اولادك ... خاصة آخر الليل ,, وأوقات استجابة الدعوه ....
هذا اللي نقدر نقوله ,,,
الله يكون بعونك ويسهل أمورك ويلين قلوبهم ويحببهم فيكم ...

غ

غاليه بنت عبدالله

عروس مبدعة

10-05-2009 | 09:50 PM

والله ما املك الا ادعي لج ربي يسخر لج اهلج و يحنن قلبهم عليج

قصتها عورت قلبي هالبنت
و فعلا ً حسيتها مظلومه
مب زين جيه ,, مب زين يستغفلون الانسآن الطيب و يقطون عليه كلام جارح
و يعاملونه بأسلوب متدني ,,

الله يهديهم يا رب
و على ربي يوفقج يالغلآ ,, و يخلي لج زوجج و عيالج

ا

ايوت

عروس مبدعة

10-05-2009 | 10:44 PM

بنات شكرا لكم على الرد انا بطبع لها الردود او بسيفها وخلها تشوفها وترد عليكم لايييييف احسن ..

بلييييز لا تفشلوووني ..

والبنت والله كاسرة خاطري وهي حبووبة ومتعاونة وياهم دااايما تساعدهم وتوقف يمهم لكن هم الله يسامحهم ما ادري وش يبون اكثر منها ...!!
مع ان امها ما شاء الله عليهم حبوووووووووووووبة وااابد تنحط عالجرح تبرى بس شخصيتها ضعيفة قدام بناتها وابوها .. يقط حجي وبس اشوي عصبي وشديد ..

وباجر بجيب لكم الردود .. بس بليييييز لا تفشلوووني لاني اشوفكم تعطووون لكل مشكلة حلول واقتراحات مفيدة .. وجزاكم على رب العالمين

w

weeb

عروس رائعة

10-05-2009 | 11:36 PM

الله يهديهم انا راي انج تخفين زيارتج واذا رحتي ع خفيف يعني سلام ع الطاير عشان يحسون شوي انج حاطه في خاطرج منهم ع فكره تراهم ياثمون ع هذا الشئ ترا الرسول عليه الصلاه والسلام نهى عن التفرقه بين الابناء وعيالج حطيهم عند اهل ريلج ولا مذله اهلج وسمحيلي

S

SHREEFA

أخصائية اجتماعية

10-05-2009 | 11:49 PM

كان الله في عونج ان شاءالله
مهما كان هؤلاء اهلك
وخليج حريصه على صلة الرحم
خصوصا مع والدينك ربي يخليهم لج
زوريهم يوم الزواره
وانتي بالدوام تقدرين تخلين ولدج عند الخدامة وربي خير حافظ ان شاءالله ماعليه الا العافيه خصوصا اذا انتي تثقين بالخدامه هذي
ولاتخلون الاطفال هم سبب المشاكل ابدا ابدا
لان اليوم يتشاجرون وباجر يلعبون مع بعض
ويكبرون وينسوون
وامج كلميها بالتلفون يوميا تطمني عليها
ولاتكثريين الروحات لهم خففي الشوي من الزيارات وخليها يوم الزواره
وهالشي حقج انتي علشان ماتتعبين نفسيا من المشاكل اللي تصير مع الاطفال
واقرأئي هذا الدعاء قبل الخروج من المنزل صباحا :

((استودعت الله نفسي وزوجي وذريتي في ديننا ومالنا وخواتيم اعمالنا اللهم استودعتك بيتي وعمالتي عن الزنا والكذب والفساد اللهم حصن بيتي من أوله لآخره ومن أعلاه لأسفله اللهم ابعد عنه الحرام بأنواعه اللهم اخرجني عزيزة وردني إليه أعز وأجعل لنا فيه سعادة في ديننا ودنيانا وصلى الله على سيد الاولين والاخرين سيدنا محمد صلى الله عليه وسلم ))

دمتم سالمين
اختكم شريفة

ن

نوفه الجميله

عروس نشيطة

11-05-2009 | 12:00 AM

أنا الي أعرفه ان زيارة الأهل واجب .. لكن اذا شفتي منهم مضره انتي مب ملزومه تزورينهم

الله يعينج ياختي ..هاي الغيره بعينها والله.. حسد الله و أكبر

ا

احااااسيس ولكن

عروس جديدة

11-05-2009 | 12:08 AM

حبيبتي الله يكون في العون تحملي الاهل يتغيرون ويسون تفرقه وانتي سوي زي ماقالوللك الاخوات والله يعينك.......

ح

حلم السعادة

عروس ذهبية

11-05-2009 | 12:15 AM

السلام عليكم
بصراحه ماني عارفه شقول حق صاحبتج غير انه هذوله اهلها ومالها غنى عنهم
مشكلتها مثل مشكله بنت خاااااالي كانج تتكلمين عنها بضبط
بنت خالي كل في بيت اهلها ومن كثر ما تروح اهلها استثقلو منها بصراحه يعني اهيا مطيحه حظها عندهم لما تروح يضربون اعيالها ويصارخون عليهم ولا احد يحترمها بس كل هذا بسببها اهيا الحين اهيا عرفت انه ابتعادها اهو الحل الانسب لها وفعلا بعدت وصارو يشتاقون لها ويسالون عنها وانا عندي مثل والي اهو روح بعيد وتعال سالم انتي لا تقاطعينهم زوريهم بس بدون اعيالج ومده زيارتج ماتقل عن ربع ساعه لا تقطعين صله الرحم روحي لهم وزوريهم ويوم الجمعه قعدي في بيتج مع ريلج وعيالج او روحي بيت اهل زوجج طلعي طلعه عائليه يوم الجمعه طلعي مع ابو الاعيال والاعيال وديهم لعبيهم وخلي يوم الجمعه مخصص فيج وفي اعيالج ولا تصيرين ذليله حق احد يا اختي وان شاءالله تتعدل الاوضاع ويعرفون قيمتج بعد ما تبعدين عنهم

آ

آخر العنقوود

عروس ماسية

11-05-2009 | 12:25 AM

تقريبا نفس مشكلة ربيعتي

وهي لما اتسير عند اهلها

اتخلي عيالها عند ابوهم

وما اطول عندهم

و

واضحه كل الحكايه

عروس مشاركة

11-05-2009 | 04:36 AM

لو آنآ ؟!!

كآن الجمعه الأولى بعد الهوشه ماأروح لهم أمأ بعدين أروح وسلام وشويه جلسة خمس دقايق وبسس لا عشى ولا غدى بعد دامهم كذآ

والعيآل عند أبوهم أو أخذينهم عشآن يشوفون جدتهم وجدهم بس قوليلهم ما يتحركون أحسن لهم عشآن لو تسبب أخوج فيهم تقولين لهم

عيالي هاديين عايلكم السبب يعني حتى لو أخوي والله مارضى يضرب عيآلي صدق عيآل وينجازون بس بعد قهر لمآ يحطون اللوم عليهم وهمآ بريئين

ولو سألوا وقالوا لج ليش جيه ماتجين أو شيء قولي اللي في خآطرج

والله يسهل أمورج ويهدي سركم والله يعينج

ع

عيون وليد

عروس ماسية

11-05-2009 | 05:22 AM

لاحول ولاقوة الابالله

ياشين الظلم والتفريق في المعامله بالذات اذا كان من اقرب الناس

والله مادري وش اقول لك

تصرفك سليم بس انا تلو مكانك اكلم اهلي واقلهم ليش تفرقون في المعامله يعني وضحي لهم انك زعلانه ذولي اهلك

الله يهدي النفوس ويكون بعونك ويقوي صبرك والله قهر

م

مرموم

نائبة المشرفة العامة

11-05-2009 | 08:40 AM

هلا بك أختي ايوت...كيفك و كيف العيال ؟ إن شاء الله بخير

أختي هذه نصيحتي لصديقتك :

ما تخليكي حسّاسه و تفكري كتير...و اللي عايز يقول و يعلّق بكيفه...

و ما في أهل يغاروا من عيالهم...يعني بالله إنتي بييجي عليكي يوم تغاري من عيالك و من سعادتهم ؟

إنتي بس معصبه و واخده الأمور بحساسيه شديده...ما راح تنفعك كتير...

أهلك مهما غلطوا معاكي...يظل تحتاجي لهم...وازني أمورك...ما تقدري تستغني عنهم و بتحتاجيهم في وقت ما...

لذلك....مش علشان مشكلة صغار تقومي تزعلي و تعمليها زعله...

الصغار بكره بيكبروا...و راح يتصافوا مع بعض...و بتظل المشاكل قائمة بينك و بين أهلك...

الآن...بالنسبة لعيالك...لما تروحي بيت أهلك حاولي تسيطري عليهم شويه...ما تنسي إنه أهلك شبعانين من عيالك لأنهم يشوفوهم كل يوم...( أنا دايما ضد إنه الواحده تستهلك عيالها في بيت أهلها...و أحب الواحده اللي تخلي أهلها يشتاقوا لعيالها و لضمّتهم )

و في ناس فعلا تضايق من العيال و حشرتهم...و يحسوا إنهم مفروضين عليهم...لذلك لما تروحي حاولي تكوني معاهم و ما تخليهم يخربوا...و قولي لأهلك إني وصّيت عيالي اليوم ما يضايقوكم أبدا...

كلمي والدتك اليوم...و ما تعانديها...و قولي لها أنا حسيت إنه العيال فعلا عاملين لكم إزعاج...عيالي و أنا عارفاهم...لذلك بخفف الحمل عليكم شويه...و إن شاء الله يوم الجمعه آجي و أجيبهم معي...

و بتشوفيهم وقتها يوم الجمعه كيف مشتاقين لك و لعيالك و لأخباركم...

الله يوفقك يا رب

أ

أحلى عرايس الكون

عروس متألقة

11-05-2009 | 09:04 AM

تصرفك صحيح ........... العيال لا تودينهم عند بيت اهلك وحاولي لا تكثري زياراتك علشان يشتاقون لج واحسن لا تزورينهم بالمره لمدة شهر أو شهرين ومع الوقت تجوفينهم يتصلون فيج ويعزمونج على كل شي . اما عن اختك ، كلنا عايشين هذا الشي التفرقة بين الخوات ، اهلي يحبون اختي الصغيرة اكثر بس شاسوي ، حاولت أنه يكون عندي شي ومب عند اختي والحمدالله ما احد يستغني عني الحين .... المهم صيري اجتماعية وايد يعني روحي عند اهل زوجك أو الجيران وربعك زيدي من الزيارات اكثر ، و اختج بتنقهر لان بيكون لج شعبيه اكثر بين الناس

والله يوفقج ويسهل عليج

*

**ام يارا**

عروس فضية

11-05-2009 | 10:56 AM

انا معاارضه رايك حبيبتي بشده ,,, حبيبتي زوجك ماارح يدوملك طووول العمر يمكن يتخلا عنك بااي وقت ,,,
لكن هاذولا امك وابوكي واخواتي من لحمك ودمك ,,, والظفر عمره مايطلع م اللحم لاتصغري عقلك وتتدخلي في مشاكل الصغار ,,, يمكن ولدك هو اذيه من وراكي ويااذي اخوكي واخوكي مايسكت له ,,, المهم لاتتدخلي في مشاكل الصغاااااار نهائيا ,,, لاتقااطعي اهلك عشاان الصغار ترى ماافي شي يستاهل هالزعل كله ,,, انتي مكبره الموضوع ,,, يكن اختك الكبيره الاي تقولي ان انتي افضل منها في حياتك معا زوجك وحياتك العلميه ,,, يمكن هي ماتدخل في مشاكل الصغار ومو حساسه بعكسك تمااااام ,,, عشان كذا ابوكي يعطيكي نغزات في الكلام عشاان تحسي ,,, وبعدين كيف تتضربي انتي واخوكي الصغير الي عمره 6 سنوات بدون احترام وتقدير لبوكي الي قااااعد يتغدى ,,, انا حاااسه انو انتي قلبك ابيض وطيب بس حساااااااااااسه ,,, اسمعي روحي لامك في وقت ماايكون عندها احد ,,, تفاهمي معاها قوليلها الشي الي يضيقك ,,, والوحده ماارح تتوفق في حياتها الا لمن يكونو ابوه وامه راااضين عنه تمااااااام ,,, ترة الشغاله ماارح تكون ارحم من امك على طفلك ,,, كثري استغفار كل ماحسيتي نفسك منفعله استغفررررري

اسفه يمكن كلامي ماايعجبك بس هاذي وجهة نظرررري ,,, موفقه في حيااتك حبيبيتي

*

**ام يارا**

عروس فضية

11-05-2009 | 11:13 AM

بعد ماقريت الردود الثاانيه ,,, حبيت اصحح شي ,,, فتح عيونك حبيبتي ,,,

الاخت نوفه الجميله تقول ,,,الله يعينج ياختي ..هاي الغيره بعينها والله.. حسد الله و أكبر ,,,

هاذا طبعا كلااااااام غلط لان مااااااااااااااااافي اب وام يغيرون من عياااالهم الاب والام يحبون يشوفون عيالهم احسن منهم دائمااااااااااااااااااا ,,, لا وكماان حسد استغفر الله العظيم

الاخت احلى عرايس الكون تقول ,,,لا تكثري زياراتك علشان يشتاقون لج واحسن لا تزورينهم بالمره لمدة شهر أو شهرين ,,,

هاذي حبيبتي تسمى قطيعه رحم بعينهااااااا ,,, لاحبيبتي لازم تروحي على الاقل في الاسبوع مرره عشان تسلمي على الوالد والوالده ,,, ترى لو فقتيهم رح تحسين بقيمتهم في حياااتك

وتذكري دائما اختي انو حتى لو ضايقوكي لاتنسي قول الله تعالى < وبالوالدين احسانا > وترى رضاء الله من رضاء الوالدين ,,,
معليش اختي استحملين لاني احبك لازم اتكلم ,,, لاتدخلي في مشاكل الصغار ابداااااا ,,, اوكي ,,, اتفقنا

اختك المحبه لك كل خير ,,, ام يارا