قصة ولادتي بولدي حبيبي..

مرحبا عرايس..

جيت لكم اليوم بقصة ولادتي..والحمدلله اني اكتبها لكم وانا والبيبي بخير..اليوم لي 17 يوم من يوم ولدت.. :)

المهم..موعد ولادتي المقرر كان في 26-4 وعلى حسابي كان 24-4..وكنت جازمه وباصمه بالعشره اني راح ازود عالتاسع ..لاني في ولاداتي السابقه ازيد..بولدي الكبير زدت 10 ايام..وبنتي زدت اسبوع..
في يوم الخميس 23-4..جاني طلق..يروح ويجي..ومتراوح مابين الشديد والخفيف..وكان الوقت عالعصر..قمت شربت موية زمزم (كنت مجهزتها قاريه فيها ايات تسهيل الولاده)..وسوا لي زوجي كاسة دارسين..وهو اول مره يسوي دارسين ..فسواه ثقيل مرررره يلوع الكبد..بعد عمري عليه والله..سويت نفسي اشربه وبس راح يصلي كبيته في المغسله وقلت له اني شربته..
وكنت فرحانه اني جاني طلق..بس فجأة اختفى الطلق..وكأنه فص ملح وذاب..تحطمت واكتأبت..وجاب لنا زوجي عشا من بيتزا هت وحطيت حرتي في ذيك البيتزا.. :)..قال لي ها اوديك المستشفى؟؟قلت لا ليش اروح الحين بيفشلوني ماعندي شي..شفت الاحباط في عيونه وتحطمت زياده..اليوم الثاني الصباح..كان الجمعه 24-4..قمت من النوم الساعه 6 الصبح..لان زوجي عنده دوام 24 ساعه..وماقدر اجلس لحالي في البيت..رحت بيت اختي الكبيره..ومريت المخبز وشريت فطور..ورحنا عند اختي ولقيتها صاحيه..وفطور وسوالف ووناسه..وزوجي راح عمله اللي يبعد 100 كيلو عن المنطقه اللي احنا فيها..ورجع لي الالم يروح ويجي بس على خفيف مو مثل يوم الخميس..ولكن فجأه نزل مني دم..فعرفت انها علامة ولاده..وقلت لاختي قالت خلاص كلمي زوجك..كلمته وقلت له يجي..قال لي..اكيييد..لاني بستأذن..لاتفشليني؟؟ قلت له لا هالمره اكيد ان شاء الله..وانا في داخلي خايفه..لا يرجعوني..ورحت صليت الظهر وصليت بعدها ركعتين ودعيت بتسهيل الولاده..وان الله يبلغني رؤيه طفلي سليم ومعافى.. وانا في الطريق قال زوجي انشالله تبيضين وجهي وتولدين اليوم..سويت مشاكل على ماطلعت..وزاد خوفي قلت له اهم شي اني اقوم بالسلامه..:) ولما رحت المستشفى قالوا لي الرحم مفتوح 3 سم..بندخلك القسم لين مايفتح 5 سم..بعدين تنزلين غرفة الولاده..قلت اوكي..وانا عالكرسي المتحرك طالعه القسم..زااااد الالم بشكل رهيب..وماوصلت القسم الا وانا ما اقدر انزل من الكرسي المتحرك..واستغربوا من شكلي تعبانه واجد ..وفحصوني الا انا 6 ونص سم..وخافوا وقامو يراكضون ويقولون ولاده ولاده..وانا بمووووت من الالم سبحان الله..ودوني قسم الولاده وكانت الساعه تقريبا 12 ونص..وشرف عبد الكريم عالساعه 5 ونص قبل المغرب..بعد ماسويت الهوايل..حتى العمليه طلبتها..الله يسامحني بس
ويوم طلع كروم حبيبي..لفته وحطته على صدري وكنت في حالة ذهول بس اطالع فيه ساكته..قالت لي النيرس بوسه..وحطته على فمي وبسته..وحمدت الله اني اخيييرا قرت عيني بشوفته بعد انتظار تسع شهور بمرها وحلوها..وبعدها قام زوجي وارسل رسايل لكل اهلنا..وانهالت الاتصالات والتبريكات..وعلى شدة تعبي الا ان فرحتي غطت عالتعب..ولله الحمد..وزوجي سجد سجود شكر عندي في غرفة الولاده..اسأل الله ان يخلي لي ابنائي ويرزقني برهم ويجعلهم من حفظة كتابه..وتوته توته..خلصت الحدوته..