السلام عليكم ورحمة الله وبركاته
كيف حالكم ياعرايس أحلى منتدى..وحشتوني وايد
ويايبة لكم موضوع من شغل ايدي وجهدي الشخصي ان شاء الله انه يعجبكم
(i)تنويه :الموضوع جهد شخصي ولا احلل نقله دون ذكر المصدر ومنتدى عروس(i)
فكرت اقدم توزيعات كهدية لولادة بنت خالي حبيبتي الي ولدت بالسلامة ويابت احلى ناصر طال انتظاره عشر سنوات ربي يحفظة ويجعلة من الذرية الصالحة..ويرزق كل بنات المسلمين بالزوج والذرية الصالحة
وصورت كل الخطوات لخاطر عيونكم يالغاليات
بسم الله نبدأ...
أول شيء التوزيعات كانت بالألوان الذهبي والاخضر والبيج نفس ألوان تجهيزات استقبالها والفرشة وسرير البيبي
* صور الاشكال الي حطيت داخلهم الكاكاو واهم سلة على شكل بيضة ودبدوب ولباس بيبي وعلبة مكعبة شفافة
* الشرايط والقش نوعين ناعم وخشن و3 اشكال استخدمتهم في تزين المكعبات الشفافة واهم على شكل دبوس بيبي وعربة و عبارة new baby
هذي الاشكال للتزين
*والكاكاو اخذته من باتشي مدور وبالبندق واخترت هذا الشكل لانه يناسب كل الاشكال الي بستخدمها في التوزيعات ولانة لون غلافه ذهبي.
*حطيت في كل بيضة شوية من القش البيج وداخلة كاكاوه وسكرته بهذا الشكل
*لزقت الكاكاو باستخدام مسدس الشمع على الدبدوب كأنه ماسكه بيدينه الثنتين بهذي الطريقة
*حشيت لبس البيبي بقش اخضر نفس لونه علشان ينتفخ شوي وحطيت الكاكاو مكان الراس بهذي الطريقة
*شريت عيون بلاستك صغار يتحركون ولزقتهم على الكاكاو صار كأنه بيبي وهذي صورته
حده عاجبني ياختي عليه
*المكعبات الشفافة حطيت داخلهم شوية قش وكاكاوه
*بعدها سكرت العلبة وحطيت حولها شريطه ولزقتها بالشمع وهني ساعدوني خواتي وحدة تقص وحدة تلزق فديتهم مايقصرون
*بعدين لزقت فوق كل مكعب شريطة على شكل ربطة ناعمة وفوق الشريطة لزقت الاشكال هذي كلة باستخدام الشمع
*وهذي صورة لكل الاشكال مع بعض
*هذا الشكل الاول الي بحط فيه نوعين من التوزيعات قبل التزيين
* زينته بالشرايط وهذا بعد التزيين
* فرشتة بالقش الخشن ورتبت فيه هذي التوزيعات
*وهذا الشكل الثاني رشيته بالرش الذهبي واهو عبارة عن ستاند والي فوق صينية متحركة
*بعدين حطيت على الصينيه من داخل شريط دبل فيس لاصق اثبت عليه التوزيعات اخترت نوع دبل فيس الرقيق مو المتين القوي وثبت الدبدوب الكبير ورتبت التوزيعات فوق الشريط الاصق الي اهم المكعبات والبيبيات
وزينت الستاند بوردتين ذهبيات وشريطة ذهبية وعبارة new نازله منها اشكال ادوات المولود وماكنت ابي ازين اكثر لان حابة يكون شكله ناعم احلى وارقى.
اتمنى يكون موضوعي عجبكم والي يعجبها تدعيلي بالخير انا وخواتي لاني محتاجة لدعوتكم
(f)واسعدوني بتقيمكم وردودكم الحلوة ..دمتم بود ومحبة(f)
