السلام عليكم ورحمة الله وبركاته
انا مو عارفه شنو اقول ولا اشلون اطلع اللي بخاطري
ابي اتكلم بس ماعندي احد ....
احس روحي تعبانه .. ومالقيت غير اني انزل الموضوع
ما راح يعجبكم الكلام اللي راح اقوله
لأني اصلا مب مقتنعه بهالشي بس شاسوي
قلبي يقولي شي وعقلي شي ثاني
انا قبل كنت على علاقه بشاب من جنسيه ثانيه
علاقتي معاه ما تعدت محادثات على المسنجر ومسجات لا اكثر
العلاقة استمرت فتره طويله يعني تقريبا 4 سنوات بس متقطعه
يعني مو مستمره .. نهد بعض ونرد نرجع
ليمن تقريبا من سنتين الحين صارت شبه معدومه
يعني بمعنى اخر نهيت هالشي بشكل نهائي على الاقل من طرفي
بس المشكله
بعطلة الويك اند اللي طاف كنت وااايد افكر فيه
بكل صراحه واحشني بدرجه ما تتصورونها
طول الويك اند كنت غالقه موبايلي
بس اول امس لمن كنت افتح الموبايل كان بخاطري
القى مسج منه
وحشني .. وتمنيت انه يرسل لي مسج
بس ما صار هالشي .....
البارحه .. وصلني مسج عادي منه
كنت نايمه بس اليوم الفجر شفته
فرحت .. تذكرني وبنفس الوقت امنيتي تحققت
ادري هالشي غلط ..
انا ما رديت على المسج
وعشان اكون صريحه اكثر معاكم
انا كنت حالفة من فتره اني ماراح ارد عليه
لا بمسجات ولا بايميل ولا اي شي
بس الحين انا نفسيتي تعبانه
انا بالدوام ومو قادره حتى اشتغل
بقلبي حرقه وبعيني الدمعه
قولولي شاسوي!!!
لمن قطعت علاقتي فيه كنت دائما اقص
على روحي واقول اني ما احبه وبس متعلقه فيه
لانه اول شاب بحياتي وكان واايد يحبني ويهتم فيني
بس اللي قاعد يصير لي الحين شنو معناته؟!!
تعبت من اللي انا فيه
ابي ارجع له وبنفس الوقت اعرف هالشي غلط
عقلي يقولي لا وقلبي اي
كلامي اللي اقوله كله غلط بس انا تعبت
خلاص ما اقدر اكثر من جذي
لين متى بتم على هالحال!!!!